畸型劏房 繼續熱賣

筆者：「開放式嘛，有乜問題？」
朋友：「擺完張床、衣櫃、梳化就已經冇晒位。」
筆者：「仲需要擺乜嘢呢？」
朋友：「食飯枱呢？連食飯枱都冇位擺。」
筆者：「擺張食飯枱做咩呢？」
朋友：「好笑啦，返屋企唔使煮飯食？」
筆者：「咁細，擺明畀一個人或者一對小情侶住，煮乜鬼飯？﹗」
朋友：「唔通日日落街食呀？」
筆者：「就算買外賣，一、兩個人食，開張枱仔咪得囉。」
朋友：「呢啲咪係畸型囉！」
筆者：「時代唔同，呢個係新常態。」

最近出現很多劏房新樓，每日起碼接到三、四個代理的電話或者Whatsapp，最多代理推介的是位於慈雲山的鑽嶺，實用面積由198呎起，折實售價約322萬元起，呎價約1.5萬元。

代理的Selling Point，當然係市區樓唔使400萬元，可以借足九成，30幾萬元就可以上車。聽見我話無興趣，代理就即時轉章Sell西灣河柏匯，面積由187呎起，折實呎價約2.1萬元，Selling Point當然係港島區新樓400幾萬元，投資一流。最後就到佐敦的匯萃，面積由222呎起，折實呎價逾2.4萬元，之後還有紅磡的環海東岸，亦是主打開放式。

細單位需求幾何級數升

你有你鬧，佢有佢賣。畸型劏房銷情理想，最主要原因，當然是因為政策扭曲下，政府推高樓價。

鬼唔知三房好咩？邊個唔想要生活空間？買得起先得架？！在政策扭曲下，借錢愈來愈難，400呎的單位賣800萬元，小市民買不起，發展商唯有將它斬開兩間，每間200呎，賣400萬元。市民已經接受了高樓價現實，係就係細間啲，總好過冇磚頭楂手。

除了價錢問題，生活文化轉變亦不得不接受。以往一個家庭，兩夫婦加兩個子女，首先是住兩房，子女長大了，每人需要一個獨立房間，就要搬三房。

然而今天年青人未讀完書，就嚷着要搬出去過獨立生活，子女長大了，不是要三房，而是要一個兩房，加兩個開放式，細單位需求幾何級數上升。

從實際生活考慮，到底一個開放式單位，能否生活？事實上，很多年青人，即使跟家人同住，放學、放工回家都躲在房間裡，打機也好，煲劇、玩電話也好，就如筆者家中老三，除了去洗手間及吃飯，根本就不用出來，這是年青人追求的獨立空間，最重要的不是寬敞，而是獨立，相見好，同住難。

工商廈也劏

這個情況不但出現在住宅，甚至工、商廈亦有這種情況。過往年青人都崇尚加入大公司，期望平步青雲，企業需要幾千呎，幾萬呎，請很多員工。

今天很多年青人已經不再追求這種規律化的打工生活，他們有自己的想法，想過自己的生活。再加上營運成本高企，企業都想辦法精簡架構，很多工程會外判，造就了很多創業的機會。

近年市場上湧現很多幾個年青人的小企業，一個年青人的自由工作者，他們不需要幾千呎、幾萬呎的工商廈，幾百呎就已經足夠，於是市場上就出現了很多拆細的工廈、商廈，有價有市，除了買賣呎價較高，租金亦有支持。

例如筆者與戰友們的工廈拆售項目，買家買入之後仍然可以收到逾4厘租金回報，有些買家甚至買一個單位自己做迷你倉，反正新居只有200呎，容不下雜物。

(圖為鑽嶺示範單位，林浩賢攝)