買樓是負債還是資產？

最近在網上讀到一篇文章《今時今日，我才不會去買樓》，反映很多年輕人的觀念，對上車的一些錯誤觀念。

作者說：「太古城500呎要1,000萬元？點解要用畢生積蓄同佢癲？」

第一，係囉，點解要同佢癲呢？冇咁大個頭就唔好戴咁大頂帽，這些樓是讓資深投資者、換樓客去買賣的，可不是讓未買樓的年青人上車的。

首期都要500萬元，對很多人來說何止一生積蓄，簡直係兩、三世人的積蓄！其實要買1,000萬的單位不難，只要懂得技巧及方法，先由一個300多萬元的細價上車盤起步，賺了錢，再換大，換兩三次就到了。

第二，太古城500呎單位要1,000萬，這單位是頂級貨色，一般貨色700多萬有交易，作者買貴了。

作者又說：「當你用五年儲到首期，犧牲那五年的自由與放肆！」

第一，甚麼是自由與放肆？幾錢斤？係咪個個人都鍾意呢？回看身邊一些年輕人，有些沉迷打機，有些沉迷吃喝玩樂，又有甚麼意義呢？

作者說：「辛辛苦苦儲錢買樓，將來回望只有層樓就會後悔」。如果回望過去幾年，只是吃喝玩樂，又或者只是打爆了99個Game，又有甚麼意義呢？難道就不後悔嗎？

就當真係辛苦幾年先儲到首期，如果你識得玩，一間變兩間，兩間變三間，將來唔單止有自住樓，仲有收租樓，有錢、有資產，想點自由放肆都得啦。

作者又說：「為了繼續供樓，即使討厭你的工作但卻不敢轉工。」

首先，如果你有自住需要，唔買樓都要租樓，咪又係唔可以隨便轉工，如果你買樓是用作投資，仲簡單，層樓有租客幫你供，鍾意轉幾多次工都得！

其次，如果你識得玩，多年之後，你有幾層樓收租，毎個月唔使供之餘仲有錢淨，夠洗夠食，所謂財務自由的境界，莫講話轉工，全情走去做義工都得！

作者又說：「他沒有樓，沒有債，租樓住，想做甚麼就做甚麼。」

成世人租樓住，難道又不是負債嗎？供樓總有供完的一天，再加上隨着個人成長，賺錢愈來愈多，再加上物價上漲，人工愈來愈高，供樓只會愈來愈輕鬆。相反租樓呢？租金會跟隨物價上升，而且永無終點，到死嗰日都要交租，那個情況更恐佈呢？

說到底，作者看到的就只是付出，只看到自己要付幾多首期，要儲幾多年，上車之後要供幾多錢，要犧牲幾多。

然而1% Anthony與戰友們看見的，除了付出，還有收獲，睇到層樓可以賺幾多錢，可以賺幾多正現金流，可以幫你累積財富，賺取將來的財務自由。點睇？點做？每個人有不同抉擇，只是一念之差。