成交冰封 代理轉行唔撈

樓市

廣告

筆者:「陸小姐,最近幾好嗎?」

代理:「我冇做代理啦。」
筆者:「吓?乜咁突然呀?幾個月冇見啫……」
代理:「冇生意嘛。」
筆者:「唔係話劈價劈到膨膨聲咩?」
代理:「劈鬼咩?講到牙血都出埋,都冇乜業主肯減。」
筆者:「報紙講到血流成河,風聲鶴淚架喎。」
代理:「你聽佢死丫,新界可能多啲,市區真係好少。」
筆者:「有嘅,總有業主等錢洗。」
代理:「間中一個半個,最平嗰間咪俾咗你食咗囉。」
筆者:「仲諗住而家有再平啲添。」
代理:「唔係化?仲要平過你嗰間?送俾你好唔好?」
筆者:「有嘅,畀多兩個筍盤嚟啦。」
代理:「五、六百萬打上都有啲,四百萬以下真係少。」

筆者:「咁都唔使唔做架,而家响邊度發財呀?」
代理:「未搵呀,休息幾個月先啦。」
筆者:「咁又係,反正有老公養。」
代理:「得閒過開嚟搵我飲茶啦,叫行家幫你留意吓。」

美國宣布加息0.25厘,講了幾年,終於都加!

由專家、學者、傳媒、財金官員等組成的空軍部隊,早已磨拳擦掌,準備踩多幾腳,誰知四大銀行竟然宣布,維持最優惠利率不變,仲大派定心丸,稱現時資金充裕,未有條件加息云云。

成交繼續淡靜

對二手市場又有乜影響呢?從負面角度看,靜市相信要維持一段較長時間。如果膨膨聲加息,相信會有更多業主投降,膨膨聲跌夠兩、三成,無論成交價、成交量都會極速見底反彈,就算價錢冇咁快升番,最少信心會增強,成交會增加,代理行業可以走出寒冬。

情形就好似金融海嘯之後,樓市在短短三個月內急跌三成,已經有不少買家出來接貨,再過三個月,劈價盤殺晒,加上量化寬鬆(QE),銀行放水,市場極速見底反彈,整個寒冬只有半年左右。

今次美國加息,但香港銀行唔跟,明顯銀行仍然在放水,業主自然冇咁易投降,減都唔會減得多。買家受到耳濡目染,信心脆弱,只有繼續拉鋸。結果就是成交仲少過SARS,代理朋友可能要繼續拍烏蠅。

港銀繼續放水

從正面角度看,樓市下跌幅度相信會較預期低。師傅教落,銀行通常都會落雨收遮。初步看,今次美國加息,香港銀行唔跟,似乎已經表態,並不看得太淡。

雖然不少專家學者,仍然不斷發表樓價跌三成、跌五成的預測,筆者都係信銀行多啲。現時市場上充斥不少負面報導,每日都看見不少經過精挑細選的劈價、撻訂新聞,然而細心看看,有幾多真係關自己事呢?

好似筆者撰稿當日,看到一單沙田第一城震撼價265萬元成交,吸引不少眼球,細心再睇,原來係乜鬼七按、十按盤,財務公司追數的交易,這些特別個案,作為報導很引人入勝,然而散戶有機會可以買得到嗎?

當劈價盤掃得七七八八,樓市就離底不遠了。大家要留意往後的利率走勢,今次香港銀行唔跟,唔代表下次銀行唔跟,謹慎為上。

太古城上月最新放盤叫價是多少?

太古城上月最新放盤叫價大約…各區樓市買賣詳情請看

九龍區有哪些大型屋苑放盤呎價最低?

九龍區不少受歡迎的大型屋苑呎價對比上月都有回落…各區樓市買賣詳情請看