香港真係需要阿爺救?

香港真係需要阿爺救?

朋友:「你睇樓市會跌到幾時呢?」

筆者:「應該唔會太耐,跌多一成左右應該見底。」

朋友:「肯定唔會啦,經濟真係好差。今次死梗啦!」

筆者:「點差法呢?」

朋友:「自由行又冇晒,大陸經濟又差。」

筆者:「係會有影響,跌兩成已經足夠反映啦。」

朋友:「唔同呀!今次阿爺未必會救香港。」

筆者:「點解一定要阿爺救呢?香港自己唔識救自己咩?」

唔知幾時開始,大家都深信,如果冇阿爺撐,香港死梗。

愛國的朋友固然深信不疑,近日有內地股評人發表評論,反對中央再次出手救香港,得到很多大陸網民的支持。記得去年,筆者與家人回鄉探親,談到反水貨問題,有大陸親友高聲疾呼:「如果唔係得大陸人去香港買嘢,香港一早玩完啦!」

奇怪的是,連一些本土意識比較強的年青朋友亦深信不疑。

近期香港股市、樓市明顯下跌,各路英雄都挖出了很多負面因素,全城唱淡。就連一些比較激進的年輕網友都深信,大陸經濟正在轉差,香港肯定冇運行,經濟會一直差落去,股市、樓市會一直跌落去,總之講到好似就嚟滅亡咁,永無翻身之日!

香港帶旺深圳

記得2003年的時候,香港正處於歷史低谷。疫情過去,香港經濟開始復甦,2004年大陸開放自由行,被視為經濟的轉捩點,踏入高增長期,無論香港還是大陸的朋友,大部分都認同這次是「大陸救了香港」,久而久之形成一個信念,香港必須要依靠大陸,如果唔係得阿爺力撐,香港一早玩完。

近年中港矛盾加劇,回望過去,筆者並不太認同。首先,開放自由行是否代表救港?其實不同國家或地區的人民,互相到對方的地方旅遊、消費,是自然不過的事。

當年香港人何嘗不是瘋狂地北上消費?尤其是100港元兌120人民幣的年代,筆者都曾經跟朋友個個星期北上水療按摩、大吃大喝,難道我們會說自己在「救大陸」嗎?為甚麼內地人來港旅遊消費就是「救港」呢?開放自由行,只是一個公平的政策,點解講到好似恩賜咁呢?

就是深圳為例,梁特首說香港學到一半已經好好。最近的施政報告,不停說甚麼「一帶一路」,講到好似香港一定要依賴大陸,否則死路一條。

回想過去30年,1984年鄧小平南巡,深圳率先開放改革,無數香港資金及企業進駐,無數市民北上旅遊、消費、探親,深圳亦因此而極速發展。香港繁榮因為有阿爺關照?還是深圳(及週邊地區)繁榮因為鄰近香港呢?

中港經濟互惠互利 不是恩賜

筆者不是在計較,只是想提出,中、港兩地的經濟活動,是互惠互利,不是恩賜。

再講未來的發展,無可否認大陸經濟差,香港必然會受影響。因為這十年來,我們已經習慣依賴大陸了,但係咪代表大陸經濟差,香港一定死梗呢?

2003年以前,其實香港一直都是做外國人生意,只要重拾當年的香港精神,真係會一直差落去?真係會死?經濟下行,樓股下跌,無可避免,但不會死!只是回到一個相對的低點再起步而已,有甚麼好怕?

回望過去,過分依靠大陸,反而不健康,就像糖衣毒藥。就以自由行為例,來的時候,蜂湧而來,經濟高速增長的同時,很多人都賺到錢,然而卻令百物騰貴,樓價瘋狂。走的時候,蜂湧而退,經濟急速轉壞,是相當投機,不正常的。

香港的情況還不算太差,澳門情況更嚴峻,賭收大跌,樓價一年內已跌了三、四成。今次調整,正好讓我們回到一個相對正常的起點再出發。

相關文章