診所職場事 寶豬趣聞 網上擂台|珍寶豬

診所職場事 寶豬趣聞 網上擂台|珍寶豬

【診所職場事】有日有位小姐嚟到診所~

佢行埋嚟登記處問我:「係咪有醫生?」

撰文:珍寶豬

我:「係呀,睇醫生嘅我同你登記先呀」

佢:「咁有冇針打?我頭先打過嚟問㗎」

我:「哦~你頭先打嚟問我哋有冇開呀嘛?你想打咩針呀?」

佢:「麻疹加強劑呀」

我:「唔好意思,我哋冇呀」

佢:「我要打麻疹針呀」

我:「我哋冇麻疹針打啊~」

佢:「我頭先打嚟你唔講嘅?」

你有屁問過我有冇麻疹針呀大佬?你估我曉讀你心咩~

我:「你頭先都冇問過我,你淨係問我哋有冇開咋嘛」

佢:「呢期咁HIT,唔駛問都知啦下嘛?」

哇,呢期HIT咩我都要主動講晒嘅,你唔嫌我煩,我都嫌自己煩啊~你當我錄音機咩~

我:「下次如果你想查詢我哋有咩針打嘅,可以打電話嚟問啊」

佢:「咁而家冇你唔駛SAY SORRY呀?」

何解我診所冇疫苗俾你打都要道歉呢?

我要唔要搵埋醫生出嚟道歉呀?

訂疫苗係醫生訂㗎喎~醫生,你要露出胸部道歉嗎?

我:「阿小…」

佢未等我講埋就插咀繼續講:「你覺得而家擺上網嘅話會點呀?我會上好多網講俾大家知等大家評理㗎啦~」

你想搵人評理定俾人抨你呀?

我:「嗯,我冇咩意見,不過最好三思啦」

佢翻個白眼,伸出食指指住我:「唔好睇小我呀,我都有啲料」

之後有啲料嘅小姐離開了。

而家咩都擺到網上擂台~我怕你上台之後發覺俾人打嗰個係自己咋。