有社交恐懼症嘅人點返工?3個簡單解決方法

有社交恐懼症嘅人點返工?3個簡單解決方法

雖然好多人都話學校就係社會嘅縮影,但職場同校園生最大嘅分別在於,大部分職業都需要同人溝通,正所謂「識人好過識字」,如果想上位,更加要識得點交際。尤其喺辦公室嘅世界,先撇開「擦鞋仔容易上位」唔講,即使平日同同事相處,好多時都需要互相幫忙。俗語話「你可以無朋友,但唔好製造敵人」。

撰文:藍橘子 | 圖片:網上圖片

社交恐懼症

相反喺學校讀書,唔識交際至多返學無朋友,同考試成績無直接關係。

現今社會,我哋將80%溝通都搬咗去網絡世界,請假用whatsapp、辭職用whatsapp已成為常態。驟眼看係科技令社會進步,但亦令有社交恐懼症嘅患者不斷上升。

當同其他人溝通,會不受控發抖、喉嚨收縮、反胃、痛肚、流汗…就連對手望一望手錶,你都會立即心絞痛,心諗係咪自己講嘢太無聊?係咪阻住對方嘅時間?

你好可能患有社交恐懼症。

社交恐懼症, 職業, 溝通, 辦公室, 交際

而以下係幾種簡單解決大家社交恐懼嘅方法:

1)『活得自私一點』

當然,我所指嘅自私唔係叫你對其他人態度差,或睇住同事死都唔伸出援手。

而係想像你同別人溝通係一場演講,唔需要專注台下觀眾嘅反應,即使一個觀眾睇手錶,仲有千千萬萬觀眾睇緊你表演,唔好理咁多,做好自己就足夠。

要記住:「無論對方做任何反應,都唔關自己事,我都必須講晒自己想表達嘅嘢」

社交恐懼症, 職業, 溝通, 辦公室, 交際

2)『用第三者角度看待自己』

假設你有一個重要嘅計劃書需要向客戶講解,而你有社交恐懼症。不難想像整個會議都非常尷尬,你亦講到一塌糊塗,全公司都暗暗恥笑你。

即使事情未發生,你都可以想像出清晰嘅畫面,而需要做嘅唔係強行去改變自己,而且幻想出一個分身,以旁觀者角度去看待自己嘅尷尬演講。

每個人嘅大腦都有種「自我感覺良好」習慣,例如見到新聞發生罕見病毒,你會想像自己無咁容易中招。見到學校歌唱比賽,台上參賽者唱得好難聽,你會不期然諗自己即使唱歌唔好聽,但表現一定好過佢!

同樣,用旁觀者角度睇自己嘅尷尬演講,心裡就會萌起一種自信,覺得自己可以做得更好,清除臨場嘅恐慌。

3)『自己呃自己』

社交恐懼症並唔會一時三刻能夠輕易改變,但你可以只靠一瞬間,改變自己思考模式,令呢種缺點轉化成優點,從而增加自信心,降低恐懼帶來嘅影響。

例如有社交恐懼症患者一向比較心思細膩,容易察覺到危險,細心察覺出對方反應,容易獲得對方信任。只需要克服內心不安同恐懼,工作表現一定比其他人出色。

雖然呢種只係自我催眠,但以往社交恐懼症患者,內心總會有「唉~我連同人溝通都做唔好,一定做乜都唔成功」嘅思維。其實兩者都係一種催眠,點解唔向好嘅方面諗呢?

而家網絡上好多「講粗口嘅人比較聰明」「遲到嘅人比較聰明」「懶嘅人比較聰明」嘅即食圖片,亦都係一種自我催眠罷了。

The user will never see this