診所職場事【寶豬趣聞】 拎報告 上回 ｜珍寶豬
廣告
【診所職場事】有日一位女士嚟到診所。
佢問我：「照肺嘅報告今日照幾時有呀？最快嗰隻！我要最快嗰隻！」
我：「你預返兩日左右報告會返～星期六有得拎啦」
佢：「肯定呀嘛？我星期一要用㗎啦，你肯定呀嘛？」
撰文：珍寶豬
我：「你而家見完醫生寫埋紙，即刻去埋化驗所就冇問題㗎啦，星期六會有報告返，我再打俾你叫你拎報告，不過星期六我哋開半日～開到一點，你要拎就要一點前過嚟㗎啦，到時我再打俾你叫你嚟」
佢：「得啦得啦，同我登記啦」
登記完，見完醫生，寫埋紙，女士離開前千叮囑萬叮囑：「你記住呀！我急要㗎！我要最快嗰隻呀！」
我：「嗯」
到星期六早上，報告返咗，十點九左右，我打電話俾女士叫佢拎報告。
電話一通，我：「喂？XXX小姐呀唔該～」
佢一出聲就破口大罵：「我今日放假呀！你打嚟做咩呀？我五天工作㗎！星期六日唔聽電話㗎！」
咁你又聽？
我：「唔好意思呀小姐，我係診所…」
我都未講完，佢又繼續一輪咀炳我：「唔咩好意思呀？你放假我打嚟嘈醒你呀！幾點呀？邊有人咁早打嚟㗎？我五天工作㗎！我放假㗎！我放假打嚟做咩呀？有咩緊要事要我放假嗰陣聽你電話呀？死人冧樓都唔好再打嚟呀！痴線！發神經！咪再打嚟呀！」
嘟。
佢CUT咗我線了。
…你唔記得咗你要拎報告嗎？你瞓醒會否想起我？
診所一時正，落閘收工，依然唔見急要XRAY嘅女士…話之你～到我放假啦YEAH！
