診所職場事【寶豬趣聞】 經期小姐|珍寶豬

診所職場事【寶豬趣聞】 經期小姐|珍寶豬

診所職場事】有日有位小姐嚟到診所。佢問我:「姑娘呀?我有冇機會見見醫生呀?」登記就有啦。

撰文:珍寶豬

我:「睇醫生呀?同你登記呀~你俾你嘅身分證明文件我呀。」

佢耍手擰頭笑住講:「哈哈哈,唔係呀,我唔係睇醫生呀」

咁你冇機會了,BYE。門口嗰邊,THANKS!

我:「你咩事要見醫生呀?藥廠?」

佢:「哈哈哈,唔係呀,我經期嚟嘅」

你經期嚟關醫生咩事呀?

我聽到一舊雲:「經期?你M到同醫生有咩關係呀?」

佢:「哈哈哈,姑娘你真係搞笑啦,唔係嗰啲呀,我係保險經期呀」

經紀呀頂你個肺。

我:「哦~咁你搵醫生有咩事呀?醫生唔駛買保險㗎啦,佢本身已經有㗎啦」

佢:「唔係,我係嚟同醫生商量吓啲嘢啫」

我:「關於啲咩呀?我幫你講俾醫生知啦,你講俾我知得㗎啦」

佢:「醫生上星期咪幫XXX寫咗份表嘅,我係佢個經期。嗰份表呢可唔可以改少少嘢,少少嘢得㗎啦」

我:「你想改啲咩呀?醫生填錯嘢呀?」

佢:「冇冇冇,醫生冇錯!醫生完全冇錯㗎!我哋保險嗰度要講有傷先可以拎到錢,咁我想睇吓醫生可唔可以改佢係有傷咁,可唔可以改成斷咗?」

我:「冇得咁改㗎喎」

佢:「哈哈哈,我都知醫生係好有原則㗎啦,不過可唔可以幫吓手呀?」

阿經期,幫咗手咪變到好冇原則囉?

我:「呢啲我哋幫你唔到呀,醫生淨係會跟返佢當日嚟睇醫生嘅情況填嘅」

佢:「我都知我都明,我都知醫生係好好同專業」

我:「咁係咪冇其他事啦?」

佢:「你可唔可以俾我入去見醫生,我再同醫生講解呀?可能醫生會俾我打動到呢?」

打到你動L就唔奇嘅。

我:「我哋醫生唔會俾虛假診斷嘅」

佢:「我明呀我明呀,我都係嚟盡我做經期嘅本份,我都係問吓㗎咋,我返去睇吓可唔可以自己寫到啦」

你真係一個非常盡責嘅經期啊,捨己為人成咁,真係唔係人人做到。

延伸閱讀:

診所職場事【寶豬趣聞】 拎報告 下回

診所職場事 寶豬趣聞 拎報告 下回 珍寶豬

診所職場事【寶豬趣聞】 拎報告 上回