80後打造穩陣投資組合 買港鐵領展粵海煤氣 是否理想|月供股票| 龔成信箱

80後打造穩陣投資組合 買港鐵領展粵海煤氣 是否理想|月供股票| 龔成信箱

【月供股票】今日龔成信箱,不少讀者想為未來作打算,應如何實行投資計劃,亦提及熱門的股票以及投資心態等問題,當中包括港鐵、領展、粵海、煤氣、地產股、盈富、月供股票、同股不同權、中人壽,以及投資風險的提問。

撰文:龔成 |圖片:新傳媒資料庫

1.月供股票

老師你好! 我今年33歲,有現金100萬,打算用50萬投資股票做到平穩增值的效果。我的問題如下:

1)打算每月供股15000,66港鐵$3000,823領展$3000,270粵海$3000,3煤氣$2250,939建行$2250,2800盈富$1500,理想嗎?

2)假若投資金額不變,你認為應該減少每月供款做到長期供款較理想,抑或早啲買到呢啲股票一直持有至股價被高估後出售?

3)早年買入2883同6889虧損至今,應全數賣出投資到上述月供股票嗎?你對呢兩隻股票前景有何看法?

4)1448福壽園同435陽光房地產基金查看過BOC,HSBC同南商都不能以月供形式買入,不知道應在何處每月買入?謝謝!

龔成老師:

1)你所選的都是優質股,可以進行月供,只要長線投資就可。但如果想優化組合,可以將其中$5000供盈富(2800),餘下的$10000供其餘5隻,會有更大的平衡效果。

2)減少每月供款,令你可以做到長期去供較好,因為買入價能有效分散。而你每月多出的現金,就用來把握股市大跌時的掃平貨時機(但前提是你有一定的投資知識與實力)。

3)中海油田服務(2883)太受油價上落影響,自主能力好弱,整體質素只屬中等,但不是完全無質素。不過,這類股最好都是找機會賣出,如見較大的反彈,可考慮賣出。

DYNAM JAPAN(6889)有業務下跌的情況,但都可以守,因為日本賭場有可能對佢有影響(但未知是好與壞),因此要睇你博唔博。

4)如果真的無月供,就只有自行分注,即是每次只入小小,不會入得好密,自己隔疏d。陽光(0435)現時估值都算合理,但福壽園(1448)就略貴,一定要分注入。(對照龔成信箱:Q6085)

港鐵 領展 粵海 煤氣 月供股票 龔成信箱
月供股票使用平均成本法入市,可分散投資風險。

2.地產股

老師你好,小弟一直都有睇開你既fb page 同專欄,昨天更買左收息股同潛力股兩本書,希望當中對我嘅選股同分析能力有所啟發。

今次想問既係月供股票選股問題。

小弟做左兩年幾野,每月大概可儲到一萬蚊,會拎6000月供股票,想供3隻股票,每隻2000蚊。暫不考慮盈富基金,因為現職供緊兩千幾落ORSO(類似公積金),暫時ALL IN 恒指基金,變相供盈富基金。

第一隻想供既會係房託基金/地產股。

個人覺得領展現價水平有點高,很怕高位先開始月供會回報不佳,但勝在每年派息不斷增加。

另外一隻會考慮恒地。恒地既P/E ratio 只有6倍幾,股息率跟領展差不多,感覺比領展抵買。

如果領展(823)或恒地(12)二選一,老師你會有咩建議?

第二隻想供既會係本地銀行/金融股。

本身想供匯控,但匯控最近公布既業績認真麻麻,唯一吸引既地方係5厘幾既股息率(但更擔心係佢既賺錢能力無法維持現時股息率)。

想問老師你係依個板塊有咩建議?

第三隻會係長江基建。我睇好佢既穩健得黎公司會係海外購入新業務,長遠為公司帶黎更多收入。想問如果一邊每月月供,另一邊待股價低時另外以現金加注風險會唔會過高?

萬分感謝!

 

龔成老師:

1)領展(0823)比地恆地(0012),的確有少少貴,但月供股票只要長時期,就不用擔心這個問題,因為買入價能有效平均。

其實我地睇好恆地的農地潛力,如你較喜歡這隻,就供這隻。但要留意,市盈率由於盈利包了物業重估數字,所以不能單單見到6倍就認為平。

2)匯豐(0005)近10年的質素有所下跌,質素只屬中等偏好。如果要選月供股,因為是長期供款模式,應該選最好,長期最有前景的公司,比較之下,中銀香港(2388)會更好。

3)長建(1038)適合月供的,但中短期的股價仍只會一般,你要以長遠眼光投資這股。

一邊月供,一邊等低位買入,可以的,只要你唔好過份集中在某一隻股票就得。(對照龔成信箱:Q6078)

港鐵 領展 粵海 煤氣 月供股票 龔成信箱
領展(0823)比地恆地(0012),的確有少少貴,但月供股票只要長時期,就不用擔心這個問題。

3.盈富(2800)

想問下我供左2800 3k 3號 2k 已一段時間 自己月入20k 每個月儲10k 再月供5k 以上組合可以接受嗎?目標 5年內100萬 。

 

龔成老師:

重點是你能「一邊月供,一邊儲到現金」,增加月供金額無問題,但每個月,你都要儲到一些現金先得,雖然這刻你認為無乜用,但有現金能助你在股市大跌時入貨。

如果你增加月供金額,可能加在盈富(2800),至於加上煤氣(0003),我反而會建議你加在其他股票裡。不是說煤氣不好,而是想等你的組合更平衡,不要過份集中在煤氣上。(對照龔成信箱:Q6080)

 

4.同股不同權

阿sir,什麼是同股不同權?

 

龔成老師:

即是你持有的1股,投票權不及太股東的1股

例如投資權比例:1對10,如果你是小股東,與其他小股東合共持有10億股,大股東都是持有10億股,你地只會有合共1億票,而大股東則有10億票。

這就是同股不同權,小股東的利益比以前小,所以,這其實係一個不公平的制度。但由於有d公司好惡,佢地話「如果你不用這制度,我就不上市」。

最終,港交所為配合市場,都要推出這制度。(對照龔成信箱:Q6081)

5.中人壽(2628)

手持:2628 @ 22.65

以及1038 @ 62.1

是否繼續長期持有?

 

龔成老師:

中人壽(2628)同長建(1038)都是優質股,絕對可以長線持有。

但兩隻質素的增長都有所減慢,往後較難高增長,相信平穩增長可以的,這兩股都有長線持有的價值。(對照龔成信箱:Q6082)

6.平安好醫生(1833)

想問1833有潛力升嗎?

 

龔成老師:

平安好醫生(1833)雖然企業有潛力,但估值卻是最大的問題。

佢現時仍然處於燒銀紙的狀態,之後可以賺幾多錢,根本無人知,而佢現時的市值高達幾百億,這都是基於大家估佢值多少錢,而這個估計,變化可以好大。

因此,這股雖然有潛,但我自己不會投資這類難以計算的股票。(對照龔成信箱:Q6083)

7.平穩增值

老師,我剛大學畢業出來做左一年,月薪萬7, 依家積蓄有15萬左右,我想穩健地投資,年回報率目標係大約5%到10%左右,請問我大約可以點部署。

 

龔成老師:

我地累積財富,會用「先增值,後現金流」模式進行,你年輕,可以進取一點。

不過,由於你未有投資經驗,這刻只能集中在平穩增值股類別,到你有一定的投資知識及經驗時,再投資潛力股會較好。

你可以將$15萬中,其中的$5萬-$8萬投資股票,集中在平穩增值股類,例如盈富(2800)、港鐵(0066)、中銀(2388)、領展(0823)、金沙(1928)等這類的股票,分注買入就可以。

上述股票都合符你的投資目標,但你要記住,投資時長線,佢地中短期都會波動,這是正常的,你要耐心投資,慢慢等收成。

由於你年輕,之後仍會有好大的財富增長力,因此這刻可以強化自己的投資知識,令你「可投資範圍」增加,之後回報會更可觀。(對照龔成信箱:Q6084)

8.農行(1288)

成哥 隻1288 我入左少少 之後我都想用月供形式去買 想問農業銀行值長數十年持有嗎?

 

龔成老師:

農行(1288)有投資價值,可月供,但佢的增長力不強,雖然近幾年股價有不差的增長,但以長期計,這股的增長力只屬一般。

你應該以收息股的角度去理解這股,即是買入後,不要對股價有太大的期望,但在股息上就不錯。你要睇睇這類股,是否合符你的投資目標。(對照龔成信箱:Q6077)

 

9.投資風險

您好!龔成老師

 

本人30歲!現持有以下投資組合

700(3手)平均價$423

410(10手)平均價$4.084

1816(5手)平均價$2.134

2823(16手)平均價$15.064

手上現金仲有18萬可投資

1.請問如果再增持700會唔會太多?

2.同埋上述投資組合會否有問題?

3.因為有2個小朋友,怕上述投資風險會唔會好大?

 

龔成老師:

1)如果再增持騰訊(0700),的確會佔比太多,你不用心急加注,耐心持有就得,除非這股跌到去一個非常吸引的狀態,否則對於夠貨的你來說,不用增持。

2)你持有的,大致都是質素不差的股票,都可以持有。不過,中國類的股票較多,如果日後增加其他股票,應該買其他類別,例如業務在香港的股票。

3)上述風險唔算大,持有就可以,而$18萬資金不要心急用,等跌市先出手,如認為資金過多,則分注入優質股。(對照龔成信箱:Q6086)

10.投資新手

龔sir你好,其實我係一個全職媽咪,暫時未可以出去做野,但又想儲少少私己,又想學下股票呢方面既野,其實我係一個股票初手。

1.我係唔係應該玩下月供股票先呢?

2.想聽多啲股票意見,係唔係睇財經台睇書就有用呢?

3.坦白講我真係想每個月搵下少少錢,應該點投資先有用?

 

龔成老師:

1)對於新手來說,月供股票是最好的方法,原理如同儲股票。但你要有選股的能力,如你不懂選股,就月供盈富(2800)。

2)如果你想增加知識,不要睇財經台,因為當中有好多野誤導人,你睇多d書,到圖書館或書店。

3)明白你想憑投資賺多d錢,但財不入急門,太心急賺錢只會適得其反,投資要長期才能見到效果,同時你要有一定的投資知識,才有正回報。(對照龔成信箱:Q6087)