9月開學 教書都要跑數 3個老師的辛酸故事

9月開學 教書都要跑數 3個老師的辛酸故事

9月開學,學生哥要收拾心情返學,教育一班莘莘學子嘅老師,亦都要準備好開工!以下是3位老師在學校這個「職場」上的所見所聞,親身經歷,笑中有淚,值得一睇!

整理:浩德| 圖片:unsplash

第一位:我教書架咋點解要跑數?

成日都聽見老師制度上嘅辛酸,但小妹初為人師後,發現除咗制度上,仲有啲唔知好嬲定好笑嘅枝節,好想同大家分享吓。

記憶宮殿的考驗

喺工作以外嘅時間同地方,一見到家長就預咗要應酬返一段或長或短嘅時間,家長們都覺得呢樣係我哋份工包埋嘅,所以隨時隨地都有準備OT嘅需要。

但我勢估唔到呢一啲相遇會發生喺香港以外嘅地方T_T

當時我仍未婚,同男友到北海道度聖誕,因為貪方便關係就跟團去。

點知個團入面有半團人都係我一個學生嘅家人、親戚、朋友。

我係教Art的,亦教好多班,如果唔係個學生叫我我都唔認得佢…

結果喺五日四夜嘅行程,一坐埋食飯就被問呢位學生平時喺學校嘅表現--

同一個問題、唔同嘅人… 我同男友都要表現得相當避忌,令呢趟旅程變咗五日共120小時嘅間歇性OT。

但重點係,教咁多班,其實我真係對呢位學生無乜印象啊天啊T_T

9月開學, 老師, 跑數, 辛酸故事, 教書, 學生, 返學
我係教Art的,亦教好多班,如果唔係個學生叫我我都唔認得佢…

順個便,做埋我個仔工人吖

以前見到一個中學生畀書包父母拎,一定會成為一間學校上上下下引以為恥嘅大新聞,但依家呢個世界好似已經習慣咗呢一啲畫面。

有次返學時撞到一個初中年級學生同佢幫佢咩住書包嘅媽媽,之後一齊行,當然少不了要傾吓小朋友喺學校嘅情況。

過咗條馬路佢媽媽就話要走喇,但喺呢一刻佢做咗個動作--將個學生嘅書包遞咗畀我,等我接。

我當堂呆咗唔識反應,佢見我無動於衷,就話:「佢個書包好重,麻煩miss你喇。」

結果我冒住被人投訴嘅危機拒絕咗,好彩事後都無畀人找悔氣…

要跑數的老師

我唔係講緊要罰幾多人留堂或者缺點嗰種跑數。近年好多學校嘅校舍都開始舊,但學校營運budget又唔夠,所以就要籌款。

講起籌款就諗起以前讀書嗰陣,小妹都試過畀班主任軟硬兼施咁逼自己捐多啲錢,仲試過因為成班夾埋個金額比隔離幾班都低。

班主任抽上堂時間鬧咗我哋成鐘,鬧到佢自己都喊埋出嚟咁,結果唔夠時間教書,就要補堂。

以前籌款頂多出張通告畀各位家長填數、簽名、畀錢就成事,但唔知點解近年班學校元老越諗越多花臣…

例如係開放日賣啲成本5蚊但售價100蚊嘅環保袋、絕對唔等洗嘅飾品(轉頭又要上堂教學生分清楚Need同Want=_=)。

又或者搞咩周年晚宴,叫啲舊生參加,收人哋每人可以喺酒店食自助餐嘅價錢去食酒樓飯咁… 說到底都係搏你念舊,就算唔合理都會畀咁。

小妹好不幸,成為咗學校嘅籌款專員,除咗要集合上述奇奇怪怪嘅籌款概念再實行出嚟之外,仲要做埋sales,因為高層已經set咗個target叫我加油(潛台詞應該係:做唔到嘅話下年就唔同你續約)。

所以我就要係喺開放日上,企喺嗰啲「精品」枱前,不斷游說前來嘅學生、舊生、家長、嘉賓買… 諗返都覺得丟架,明明我係老師嚟架!

第二位:90後教師邊有長假期 咪又要改簿備課帶活動

朋友聽到我做中學教師,都會流露出一副羨慕樣,話好羨慕我呢啲多假又高人工嘅筍工。

做中學教師係幾好嘅,但真正筍嘅係八九十年代入行嗰一班,即係依家各中學入面嘅老屎忽。

依家新入行做中學老師,最多都只係一份穩定嘅工,而再唔係筍工喇。

9月開學, 老師, 跑數, 辛酸故事, 教書, 學生, 返學
依家新入行做中學老師,最多都只係一份穩定嘅工,而再唔係筍工喇。

做住TA先

八九十年代教育業急速發展,令到當時湧現咗大量嘅常位教席,當時畢業嘅準教師都唔憂無工做,因為需求高過供應。

但係依家教育界都飽和咗,好多獲得常位合約嘅都會做到退休年齡先走,令到個市場換血嘅速度極慢,基本上常位教席接近飽和。

呢啲一個個手持學士學位兼教育文憑、甚至碩士學歷嘅準教師都要被逼簽待遇差極遠嘅合約制教師,甚至「做住TA先」,真係少啲意志都捱唔住。

以前教師跟住學生咁一年放足90日暑假同一系列假期,只有特別勤力嘅教師先會放假都自願開工備課。

但依家已經無得自唔自願,因為實在太多嘢做,你放假唔做就跟本應付唔到,啲假大部份都係變相要在家工作。

點解我哋咁多嘢做?因為學生都越嚟越多試要考,特別係嗰個TSA,為咗校譽,高層會畀好大壓力教師,但對於老屎忽,佢根本唔驚畀人炒又點會同你賣命吖,咁咪要啲新教師食哂。

另外家長要求高咗、學生壓力大咗、學生情緒問題又多咗,有啲良心嘅,又要諗吓點樣唔好令學生再更加辛苦之餘又追到進度,咁就結果要自己工餘時間準備定多啲方法令佢哋上堂專心啲又入腦啲。

有時又一個唔小心觀察到啲學生之間有拗撬,又忍唔住要花時間關心了解吓,但你哋都知道,老師要喺學生口中問出個由來係需要花啲時間,亦唔係一份短時間嘅工作。

同埋有啲社工成日唔記得咗自己係唔可以爆學生同佢哋講嘅嘢,見你做阿小明嘅班主任,就第一時間走嚟同我講我嗰班呀小明點點點,自己就當已經follow up咗個case,但其實咪又即係拋咗個波畀我,仲要我有咩變化第一時間話返畀佢知。

9月開學, 老師, 跑數, 辛酸故事, 教書, 學生, 返學
9月開學,學生哥要收拾心情返學,教育一班莘莘學子嘅老師,亦都要準備好開工!

工作卸落新教師度

上文講過老屎忽嘅工作態度九成九都係輕輕鬆鬆等退休,呢班人成日本住自己做得耐,又一句「食鹽多過你食米」,就將自己嘅工作卸落新教師度。

有時真係唔怪得啲學生會喺呢啲老師背後打佢哋小人,又叫人有唔識就問,問多兩樣又嫌人煩叫佢去問第二個教師。

呢啲情況通常就發生喺由細到大讀書都好叻嘅老屎忽身上,佢哋根本唔明點解人哋唔識,自己求其講過就算數。

而老屎忽同學生之間嘅矛盾通常係特別多。

有一次,有個老屎忽喺走廊大大聲鬧一個同我相熟嘅學生,本身我想掂行掂過算數無謂插手啦。點知,佢拖埋我落水。

「阿X sir,你嚟評吓理嘞,我請佢食曲奇,佢擰轉身就掉咗佢,咁無禮貌!啱唔啱啊?」

個學生又唔出聲,成件事得佢講,我點評啫…… 結果佢罰咗個學生留堂。

後尾個學生自己嚟同我講,其實係因為佢見到Miss K畀塊餅佢之前,隻手捽完腳指無洗手,但佢行埋嚟遞塊餅畀自己又唔敢唔接,所以先諗住靜雞雞掉咗佢,點知畀佢見到……

呢啲咁嘅情況,你叫我點安慰個學生呢?我都唔知可以點樣教佢下次處理得好啲,無論我講乜,一旦傳咗出去,我都兩邊不是人。唉……

所以你話,教師係筍工咩,唔係,極其量只係一份穩定嘅工……

第三位:做到成個顛婆咁 但我又好Enjoy

做幼稚園老師唔好以為係好輕鬆,我唔敢講幼稚園老師係咪最辛苦嘅老師,不過我敢講做得幼稚園老師真係要有三頭六臂,同好高嘅抗壓能力。

由小朋友入校門果刻,到佢哋放學,佢哋嘅一舉一動都關我事。

有啲人成日都以為做幼稚園老師淨係教ABC,係ABC之外仲要帶住小朋友唱下歌、跳下舞、食茶點、去廁所,但係小朋友嘅活力就係一下都唔可以停低,同一時間成個班房可以有好多事發生:瀨尿、打交、跑來跑去、咬人、跌親,要逐樣逐樣處理,真係少啲心血都唔得。

有時上堂都要玩啲大型玩具、波波等,最怕就係小朋友唔小心整親,因為一整親,啲家長就會不停問長問短、又話要投訴之類。

我唔係無睇實,小朋友整親我都好心痛,但一班30幾人,一個老師要睇曬咁多個,都會有難處。好在有時都會遇到好體諒我哋嘅家長,講句叫個小朋友下次記住小心啲就安心畀佢繼續玩。

都係嗰句,一班30幾人,佢哋一人一句其實好大聲,要佢咃聽到我講野,就要同佢哋鬥大聲。

但佢哋就算聽到都唔一定會跟住指示做,所以喺適當嘅時候都要對啲小朋友惡啲,唔可以畀佢哋蝦返轉頭。

日日放工聲都沙埋、嗌破喉嚨,返屋企飲杯蜜糖水,明天又係一條好漢。

其他人返Office都有1個鐘食飯時間,做幼稚園老師有10分鐘食飯時間已經好好,食2啖又要去望下啲小朋友,拿拿淋食完仲有好多野要做。

做幼稚園老師好似坐監咁,返咗工就無得撳電話,每次放工望到電話有幾十個missed call幾百個訊息,好似與世隔絕咗一個世紀咁,真係好無奈。

9月開學, 老師, 跑數, 辛酸故事, 教書, 學生, 返學
日日放工聲都沙埋、嗌破喉嚨,返屋企飲杯蜜糖水,明天又係一條好漢。

有啲學校好啲,畀老師喺食飯個陣撳下,未至於全日都無得用,不過都只可以快睇快覆。

食完飯仲要氹佢哋瞓覺,有啲小朋友好快瞓著,我梗係想佢哋快啲瞓著,我就有多啲時間做野,不過都明白總有啲比較難瞓著。

做老師嘅都要出盡法寶盡力氹到佢哋每個都瞓到晏覺,就算真係瞓唔著,都望佢哋乖乖地瞓低唔好騷擾其他同學仔。

諗秋季旅行又係一個「煩」字,小朋友有得圍埋一齊玩,去邊佢哋有咩所謂,但係啲家長就多多意見喇!

揀近啲嘅地方又話去過、無新意;揀遠啲嘅地方要收返車錢食物錢又話貴、邊洗咁多錢,真係好難服侍。

其實揀完地方我哋仲要去考察架,無咁多時間為咗個目的地揀來揀去。

到最後仲有一場硬仗,就係畢業典禮。畢業禮當日用「打仗」嚟形容完全無講錯,坐喺出面欣賞表演嘅家長係唔會知道後台有幾亂。

一大堆化妝品攤晒出嚟,幾十件一模一樣嘅珠片衫,要用摩打手幫每個小朋友化妝、著好表演嘅衫,仲要確保無人走失,成個癲婆咁叫佢哋排好一條線。

不過最後見到佢哋開開心心表演完,正正係嗰種滿足感驅使我繼續努力做好幼稚園老師呢份工。

The user will never see this