28歲月供$4000買盈富比亞迪 想再加注高息股 可以點揀|龔成信箱

28歲月供$4000買盈富比亞迪 想再加注高息股 可以點揀|龔成信箱

【比亞迪】今日龔成信箱,不少讀者想為未來作打算,應如何實行投資計劃,亦提及熱門的股票以及投資心態等問題,當中包括盈富、收息股、月供股票、高息股 、中長期投資,以及溝貨的提問。

撰文:龔成 |圖片:新傳媒資料庫

1.高息股 

龔成SIR你好, 我依家份工月入萬7, 今年黎緊28歲, 現金10萬, 股票值10萬

當中有1萬股939, 平均價$5.8, 已經無再供. 轉左去2800, 現有500股, 平均價$30.2, 每月供2000. 從6月開始我會月供$3000去2800, 再新加$1000 供1211

另外係HS有恒生儲蓄plan 每月2100, 仲有3年供. 仲有每年一次性保險費, 約萬7. 扣哂所有支出包括月供, 從6月開始平均每月只能草$3000現金, 係咪太少?

你建議我再從現金10萬果度再拎啲錢出來買入優質及高息股嗎? 請建議一些股, 我覺得自己28歲草錢太慢了..有無其他投資方式介紹 (不是短期投機)? 謝謝。

 

龔成老師:

其實你保持月供股票,已經是一個不錯的儲錢方法,因為比起儲現金,你正在累積真財富,只要你一直進行就得。

每月儲$3000現金都可以的,因為現金不是真財富,只是一種「等投資」的工具。所以不用太多的。

至於$10萬現金,可以動用$3萬-$5萬去投資股票,你現時28歲,仍然有增值的空間,可以投資平穩增值類的股票(暫時不用投資收息股,因為對你來說增長力不足)。

至於增加收入,你可以試下做小生意,從自己的興趣及強項開始,網上生意都可,這是一個增加收入的方法。同時,你年輕,其實仍大量增加投資知識,這可以幫到你將來的財富大不同。(對照龔成信箱:Q6176)

2.溝貨

龔老師,今年26歲了 以前覺得輸左冇咩野 但而家人大左有好多野都有壓力左 所以都想投資投得有計劃有頭腦點 都玩了幾年股票 昨天才拿出心肝買了你出的那本50隻增值股書 希望你都可以回答我這無知的青年啦,有幾個問題:

1. 03336 巨滕國際 我2.23入左 現股價1.56
這股票股價回落了很多 如果我現時再買份 溝貨是否明智?

2. 01536煜榮集團 當時大1股東1.72接貨 曾經一日升7成 但第二日又再回落 我起1.45買入 現股價0.85 你覺得我能否等到這股票升回1.45呢

3. 0857 中石油 兩年前5.8買入 現大概6蚊 兩三年前由8蚊9蚊睇佢跌到5.8才買入 怎料又是一1跌就跌了很久還升不回 我渣左咁耐 應否現在襯少少水位食左先 等回多點再入 本人有渣車 油價升都唔知開心定唔開心好 而家油升左 我渣車成本貴左 但我自己股票又冇得點賺

 

龔成老師:

1)巨騰國際(3336)質素一般,因為市場競爭大,加上佢規模唔算大,獨特優勢不強。睇翻佢過往的生意,每年都持續下跌,這是大環境不利的結果,同時盈利下跌速度更快。

這類股長期的投資價值只是一般,但現價又不算貴,你可以守多一陣,但相信長期仍要賣出。

不要因為想拉低買入價而去溝貨,這是不現智的行為,只會令你組合持有更多質素不佳的股票。你暫時持有原來的股先,不要增持,同時等機會賣出。

2)煜榮集團(1536)業務不穩,賺錢能力不高,盈利波動,投資價值不高,要上翻去不容易。這股長遠都要賣出,你可等有反彈後賣出。

3)中石油(0857)是質素不差的股,但又未去好高質素,因為始終只是商品企業。這股可以持有。

你打算賣左等回再入,這是散戶一般都有的心態,但卻是錯誤的,因為散戶以為自己能準確預期股價升跌,但最後根本不會成功,所以,簡單地持有,反而是最好的策略。

以你這個年紀,仍然有一定的財富增長力,仍然是黃金時期,但見你的有不少錯誤的投資觀念,建議你多吸收知識,有時間睇下年報,認真研究企業,對你將來的財富會有大不同。(對照龔成信箱:Q6175)

 

3.雷蛇(1337)

我4.44同4.36入左1288 佢依加一直向下走 我想問 我會月供以收息 如果幾十年後 都係向下走既 其實 平均我係咪都會有資金增長 在當時既情況。

成哥 仲有1337 雷蛇我2.51 入左 想長渣 你點睇未來發展同走勢

 

龔成老師:

農行(1288)有一定的質素,你唔派太擔心,雖然你見佢近年回落左,但這同10年後的股價發展完全無關係。當然,如果佢10年後的股價,比這10年下跌了,你在賬面上有虧損的,不過,只要企業優質,長線都是向上的,只有質素不佳的企業,才會10年股價向下。

不過,農行雖然有質素,但只是收息股,股價平穩,有少少升幅,但不要太有期望,因為投資這股應著眼在股息。

雷蛇(1337)係有風險,有潛力的股票,行業新興,但無人知結果係點。企業現時處於燒銀紙的狀態,現時估值根本靠估,可以好勁,可以好差。這類股,只可小注,但都要明白風險。(對照龔成信箱:Q6169)

盈富 比亞迪 加注 高息股 龔成信箱
雷蛇是有潛力的股票,行業新興,但暫時難預計結果。

4.LHN (1730)

成哥你好,最近了解緊LHN (1730),宜家市值4億,佢剛係柬埔寨購入物業接近1億用作收租。

我都幾睇好哩個國家既發展,金界 (3918) 已經有不錯的升幅。想請教成哥對1730有何意見?

另外,已購買你的新書,獲益良多!
十分感謝!

 

龔成老師:

LHN(1730)總部設於新加坡,從事物業空間優化、設施管理及物流服務業務,業務遍佈新加坡、印尼、泰國、緬甸、
香港及中國內地。

但睇翻佢過往幾年的財務數據,盈利都在下跌,加上上市不久,業績會慢慢「見真章」,有可能進下步下跌。

這刻睇,佢業務價值不算高,之前股價不斷下跌,跌至資產價值層面的水平。現時估值的確不高,但投資價值同樣不算大,你小注無問題的。

另外,你不能以金界(3918)同佢比,大家的業務都唔同。

多謝支持,記得保持增值自己。(對照龔成信箱:Q6170)

5.大地教育(8417)

老師, 請問dadi 教育(8417)股前景如何?I bought at $0.81, should i keep and wait? thanks!

 

龔成老師:

大地教育(8417)主要於香港從事海外升學顧問及提供申請報讀協助服務,其網絡包括英國、澳洲、加拿大、美國及紐西蘭等。涵蓋不同階段教育。

雖然行業正增長,但睇翻佢的財務數據,又唔見到佢有優勢,近年生意增長不大,盈利正不斷減少,根本就食唔到行業增長。

現時市值$6億,以佢過往的財務數據計,仍不平。創業版的股票比較麻煩。

而家咁樣情況,相信止蝕較好,你可以先減持一部分先,然後等佢有較大的反彈後,才賣出餘下部分。(對照龔成信箱:Q6171)

 

 

6.財務自由

你好,最近我在看你的著作,獲益良多。但我最近有一個算是人生的煩惱:我大學現讀 金融科技,畢業一是從事傳統財務機構如銀行,二是去科技園發展新的金融科技市場。

老實講,我希望做到財務自由,配合坊間天書 / 課堂達到目標,但我也對本身就讀的科目有興趣。不知如何選擇。請問,如果單靠坊間的書本、課堂學習,不從事銀行業,是否不可能做到一個專業賺錢的投資者?謝謝

 

龔成老師:

就算你唔做銀行,只要你肯多睇書、上投資班,一樣可以成為賺錢的投資者。我以前做銀行,同事的投資實力都不算高,只是部分有某些知識,但你只要肯學習,一樣可以有這些知識。

所以,你可以選自己較有興趣發展的地方,先在這裡吸收行業及工作經,同時間,一邊儲錢一邊學投資,這些金融科技是一些新興的行業,可能有助你將來創業。又或你能接觸到很多新的科技,對將來發掘潛力股較有利,只要你先打好投資知識的基礎就得。(對照龔成信箱:Q6173)

7.收息股

成哥,公用股,領展,港鐵可以月供40,50年一真供到老,等老左收息?

龔成老師:

這兩股可以一長供,但是否供40、50年,都要到時睇情況。月供股票的原理是長期進行,但都會每隔數年檢視一下。

首先,我地進行人生財富累積,會以「先增值,後現金流」作策略,當年輕時,會投資較增值的項目,然後年紀大時,就會保守一點。所以,當你年紀漸大,投資股票類別可能會改變,因為無人知佢到時的增長力,派息政策。

另外,我地只會投資優質股,這兩隻當然是優質股,但無人知10年後的質素如何,因此,我地都會久不久檢視的(不是短期,而是長期)。(對照龔成信箱:Q6174)

8.國泰君安國際(1788)

成哥 當年2015年買左國泰君安1788 佢有派息 但現時跌左一半 你覺得這股票我可守嗎

另外267 當年14蚊買可計續守嗎?

這股都不太有升跌

還有最近恆指大概3萬1點之際起保險果度放左啲基金 大概8萬元 手上現金手持16萬左右 想問1038 長江基建 跌到近呢幾年既低位58蚊 派息4% 如果覺得而家跌市買呢隻值博嗎

其實我都覺得手機概念都炒左幾轉 又多蟹貨 但285比亞迪電子10蚊左右呢個價好吸引 相對1211比亞迪股份現價47蚊 你覺得現時適合投資邊隻多啲?

 

龔成老師:

國泰君安國際(1788)是證券類股票,這類股好易因為當時市況興旺而出現估值過高的情況,2015年就是一例。坦白講,要上翻去不易,除非股市大旺,同時熱炒這類股,否則,這股的股價都唔會有太大的升幅。

中信股份(0267)是綜合企業,企業有規模,過往的生意盈利都不差,但就無乜增長力,因此我地在估值上不能過高。要上翻去,不是無可能,但要一定的耐心,因為這股只是平穩增長的類別,暫時守住先都可。

長建(1038)是有質素的股票,但近年歐洲業務較弱,佢中短期仍會較為不利,但佢仍然每年投資過百億到海外收購資產,可見增長力仍在,但就要慢慢等收成。

市況不穩,會對股價造成波動,但不會影響到企業的質素。所以,以分注模式,又或月供,去投資這股是最好的方法,只要長線就得。

至於比亞迪(1211)同比亞迪電子(0285),有潛力,但股價波動,只要控制好注碼,分注買入無問題,但就一定要長線投資,要耐心等企業慢慢成長。(對照龔成信箱:Q6177)

9.中長期投資

老師,看了你的文章,其實怎麼去決定買入一隻股票作中長期或者是永遠持有呢?

另外,我要照顧孩子不方便參加你的課堂,有否考慮網上學習呢?謝謝你

 

龔成老師:

我地買入股票,一定是買入優質股。這些優質股都適合長線投資的,因此,中短期都是不正確的。

當買入時,會假設我地永遠持有這間企業,原理就是將現金,轉換成企業的一部分。即是一開始,我地會以永遠持有作前提,當企業去到某些位時,都有可能賣出。

例如股價當時被嚴重高估、企業質素改變,又或潛力企業已成熟,並進入了收成期。

暫時股票班都是實體課程,但都會研究下的。(對照龔成信箱:Q6178)

10.股票賣出策略

老師, 買入股票時分注或月供可以平衡風險, 但如果賣出又有冇乜策略呢?

李嘉誠話過如果股東上市時買入長江股票, 又o係每次派息時再買入股票, 多年來會累積增值5000倍, 就算拎左股息唔買股票, 亦可以增值1500倍

係咪意味真係去到必須要到現金既情況下先好放手上既股票?謝謝

 

龔成老師:

賣出的時候,都可以分注的。一般來說,我地只會買優質股,而優質股可以長線持有,但如果股價過熱,都有可能賣出。

這時候,就要分析,到底有幾熱?股價與估值的偏離程度如何?該股有幾優質?

有時見到股價好熱,但可以再上升的,因此,一次過賣出未必是好方法,那就可以分注賣出。而我會建議不太懂分析的投資者,可以用「升一倍,賣一半」的方法進行。

其實,好多優質股,例如李生果隻,長期計都升左好多。現金不是財富,資產才是,當你賣出資產後就會變回貶值的現金,因此,持有愈耐愈有利,無乜必要都唔好賣。

因為你賣出後,你要想想點樣再增值?而優質股不易找的。

所以,我一向建議人,優質股,長線投資。(對照龔成信箱:Q6179)

 

The user will never see this