月儲12K 5年內要有100萬上車結婚 潛力股組合點揀|龔成信箱

月儲12K 5年內要有100萬上車結婚 潛力股組合點揀|龔成信箱

【潛力股】今日龔成信箱,不少讀者想為未來作打算,應如何實行投資計劃,亦提及熱門的股票以及投資心態等問題,當中包括中播控股 (471)、收息股、月供股票、潛力股、ASM PACIFIC(0522),以及愛康醫療(1789)的提問。

撰文:龔成 |圖片:新傳媒資料庫

1.潛力股組合

本人24歲 月入2萬 扣除家用及日常開支 淨12K可儲蓄

戶口淨5萬現金及2萬ibond

現持有股票全部負數打算長期持有等回到購入價賣出

1520 *20手

8448 *1手

1337 *1手

2858 *1手

問題如下:

打算5年內買樓自住及結婚大概100萬,應投資甚麼股票作月供?

另1478 是否潛力股? 之前由高位回落到大概一年低位 現價買入可以嗎?有風險嗎? 感謝

 

龔成老師:

明白你打算「回到買入價才賣出股票」,一般散戶都會咁樣諗,但這是錯誤的觀念,我地持有一隻股票與否,不是基於買入價,而是基於企業質素與前景。

如果你想5年累積$100萬,可以好好利用每月$12000,以現時的市況,你可以將$6000-$8000,去做月供股票,以你的年紀,可以投資平穩增值股+潛力股,例如盈富(2800)、港鐵(0066)等就是平穩增值類,而比亞迪(1211)、中生製藥(1177)就是潛力類。

至於餘下的資金,就先儲現金,若大市出現大跌,就以平價買入優質股,以這模式運作,5年要儲$100萬,合理。

丘鈦科技(1478)有風險,有潛力,這股都幾波動,所以要睇你本身的風險承受能力。這股本質不差的,但市場對佢的估值,變化都幾大,加上散戶都幾中意炒這股,所以一定波動,如你睇好,可小注。(對照龔成信箱:Q6190)

2.止蝕

你好呀龔成老師, 想請教買左隻8391新股0.73買入 請問需要止蝕嗎??

 

龔成老師:

精雅印刷集團(8391)主要於香港提供商業印刷及財經印刷服務。基本上行業無乜增長力,同時,紙媒正面對不利的環境,這股的投資價值不大。

睇翻佢的財務數據,一年只賺到約$200萬,係一間好細的企業,但現時市值成$3億,估值明顯過高。相信止蝕是最好的方法。(對照龔成信箱:Q6191)

3.長遠收息股

龔Sir,多謝你係FB嘅解答,我見你解答得好用心,本人都第一次咁問野,希望可以指教下。

自中學既時候已經有慢慢儲錢,大學既時候自己正式股票投資。我grad後做左野2年幾,收入21k,同你既儲蓄方法一樣先儲後使,家用$5800,而家一個月儲$10000,現有大概20萬做港幣定期,12萬流動現金,持有股票及債券約48萬如下:

700 @ $275.85 , 300股

6 @ $71.46,1000股

405 @ $ 5.06, 10000股

52 @ $35.42,1500股

2822 @ $17.8, 2800股

1299 @ $48.45, 600股

1398 @ $4.39 , 6000股

2800 @ $19.12 1000股

1883 @ $2.27 4000股

4231 @ $100, 200股

因為有計劃有1-2年唔會係香港工作賺錢,計劃讀書,最近入左收息股希望可以長遠收息,當中6係好高位買左,見到佢近排個勢唔係好好,蝕左17%,應該繼續持有用作收息嗎?

另外,有咩建議可以部署下for呢2年冇收入既情況下都可以繼續有唔錯既資產增值,我都好想似你咁5年累積$100萬,但怕冇工作2年仲要交學貴,怕會耽誤左∼(不過冇諗住要香港買樓!有100萬都唔想係香港買!)

亦請問我的組合會太多股嗎?好多都持有左好耐,但當中52同2822一直未番家鄉,雖然有收息但應該換馬嗎?早前大市係咁升做錯決定,心急諗住短炒冇左四千都已經好後悔,但我係一儲到錢都希望拎去做投資令資產增值….呢個諗法岩唔岩呢?

有點太長,謝謝解答,祝大家早日財務自由!!

 

龔成老師:

你所持有的,大多是優質股,就算有些賬面上有少少蝕,你都不用擔心,因為長線都是向上的,有得守。至於電能(0006),這只是這前派特別息除淨問題,股價自然調整,你真正的虧損無咁多的。

我地進行人生財富累積,應該用「先增值,後現金流」的方法,你之後會無收入,但你現時仍處年輕狀態,因此應集中在「增值」方面上,就無有無收入,只要盡力做到不減少原有的資產,這就是重點。

你要守住財富,並令財富處於「增值中」的階段,你要投資平穩增值股類號,現時你所選的股,大多算是這類。但不用再增加收息股,這的確能帶給你現金流,但增長力不足,你年紀可以增長多少少,先有機會去到$100萬的目標。

你持有約$30萬現金,當中扣除了所需洗費外,部分可以有效運用,用作投資增值。

你現時的組合不算太多股,都可以的。你不用太理中短期股價,集中長線投資就可以。

至於你會有一段時間無收入,你一定要想方法令自己有收入,不要消耗自己的資產。你可以找兼職、做小生意,好多大學生都做咁,你已有社會經驗,我相信你都做到。(對照龔成信箱:Q6192)

4.中播控股 (471)

龔成老師

想問問你怎樣看471?我在兩年前買入,但長期跌破,是否應該止蝕?買入的價位是2.45

 

龔成老師:

471有啲麻煩,因為呢集野無所素,只是純炒,之前有人炒就會被市場留意,而家無人炒就無人理,要上翻去有點難度。加上本質無乜價值,長遠會向下。

但比較好的做法,如果有較大的反彈時,收賣出一部分先,之後再睇點做。(對照龔成信箱:Q6193)

5.基金

老師。我2010年開始用月供形式買基金,現在看了你的書後,我覺得我可以自己月供股票都得。因為基金行政費太貴了!雖然基金帳面升了15%。

現在我想停供基金,及沽出基金(約12萬),用來投資優質股,這個動作正確嗎?

 

龔成老師:

如果你的基金無太大回報,以及無特別性,是可以的,從上述回報睇,只是一般,至於特別性,即是股票市場中,能否以其他指數基金或股票,取代該基金,因為有些基金的類別很獨特,投資很有價值。

以你上述情況睇,可以轉換的,最簡單就是收資金投入盈富(2800),而月供盈富亦得。基本上盈富的回報不差,而且基金管理費很低,長遠對你有利。

另外,若你賣出基金後,轉買優質股,同樣是可以的,但就要做好平衡分配的組合。(對照龔成信箱:Q6194)

6.投資組合

龔SIR你好,麻煩曬你抽空睇篇文:

小弟目前22歲,之前玩牛熊輸掉了身家,打擊好大,而且負債約10萬。打算回歸價值投資,而且也相信這條路是正確的。

我收入情況每月32k加上10k加班,支出家用加生活費12k,每月存30k。打算運用其10-20k買股票,其他等待入市機會。

打算買入和月供2382 1177 1211 880 709

我能承受的風險較高,只要肯再努力些加班可以每個再存多幾k。我的思路和對錢的觀念其實和龔sir相似,所以一直都有閱讀關於你的書籍和文章,我認為現在的低谷,只是暫時的!

目標能在5年存300萬-500萬,然後再用最低按揭投資物業,分散投資。希望龔sir能對投資組合給一些意見,以及資金運用的建議。

而且我很想參加龔老師的課程 但我在澳門生活以及工作繁忙 而去不到 請問有其他方法能上你的堂嗎?

 

龔成老師:

我在你的年紀,都試過投機炒賣,而經歷過幾次接近輸身家的經歷,而家睇翻,呢d經歷幫我成長左好多,所以,你之後可以憑投資,賺到更多錢,你努力儲蓄、投資、學習就得。

你計劃一邊月供,一邊儲現金,方法正確,所選月供股票雖然略為進取,但都是可投資,同時由於你明白當中的風險,因此可以進行,只要長期就得。如果你想平衡一點,就加上月供盈富(2800)。

5年存300萬,有可能做到,但可能要配合市場機遇,暫時你保持用上述的計劃,堅持進行就得。你現時儲現金部分,都是重要的資金,要好好選股及把握入平貨的機會。

你這刻不停滾大財富先,唔洗太刻意設定幾時買樓,因為在你滾大同時,無人知樓市之後的發展如何,如果有機會,都可以把握,這點到時再制定策略。

課堂方面,我正計劃2019年上半年,到澳門辦課程,但這刻只是初步計劃,希望辦得成。(對照龔成信箱:Q6195)

7.存錢買樓

老師,我依家33,老公39,兒子5個月大,現正租樓,打算存錢買樓,雖然都知道要存多年才達目標,不過為了兒子沒辦法。我依家月供9000 股票:

1,66,14,2800,2388,1211,836,12,1928 各1000,以上組合ok嗎?需要再加其他股票嗎?我們每月最多可供12000,謝謝你

 

龔成老師:

你這刻保持儲蓄投資,無人知之後的樓市情況,但如何你有資金,就能把握機會。

上述所選的都是優質股,但數目太多,如果你供$9000,其實供4、5隻都可以,你可以選盈富(2800),再加多幾隻月供就得,唔洗太散。有盈富已能幫你分散風險。

如果你供$12000後,仍然能儲到$1萬的現金,那就可以增大月供金額,因為我想你每月都「一邊月供,一邊儲現金」,這方法是最好的。

所以,要睇你每月能餘下多少現金,才知現時$9000月供是否適合。(對照龔成信箱:Q6196)

8.ASM PACIFIC(0522)

你好,老師!想再請問你覺得522 ASM pacific 同 1789 愛康醫療 如何?thanks a lot!!!

 

龔成者師:

ASM PACIFIC(0522)正面的,佢本身有一定的技術,優質不錯,同時近年的增長都幾快,生意同盈利都有理想的增長,相信長遠前景不錯。

至於愛康醫療(1789),這股質素都不差,但規模較細,股價會比較波動,風險會較大,雖然有潛力,但都要注意風險,又或只是小注。(對照龔成信箱:Q6197)

月儲 上車 結婚 潛力股 龔成信箱
ASM PACIFIC(0522)近年的增長都幾快,生意同盈利都有理想的增。

9.英鎊

龔 sir, 我有HKD$12萬, 買英鎊做定期抵唔抵做?

如果不,有什麼低風險投資可介紹?

 

龔成老師:

外幣始終是貨幣,貨幣長期終會貶值,就算利息好似吸引,長遠也無法助你財富增值。因此,除非你本身好怕風險,否則,你應該投資真資產,例如優質股這類,長期持有當中的優質企業,就能財富增值。

你可以將部分資金,買入盈富基金(2800),或其他優質股,長線持有就得,你不用一次過將所有資金投入,可以分注進行。如果你怕風險,可在組合中加上收息股就得。(對照龔成信箱:Q6198)

10.投資新手

我是新手

仲有咩股係幾千蚊可平平地投資下?

 

龔成老師:

其實我地唔會因為該股的入場費低,而決定入該股,最重要是企業的質素、前景。股價數字高低、入場費多少,與平貴無關。

所以,與其強行投資,不如儲多少少資金先。

港燈(2638)算是入場費不高,而又優質的,但這股只是收息股,增長力不強。

盈富(2800)是適合新手的投資,但入場費就多少少。(對照龔成信箱:Q6199)

體驗1分鐘貸款批核,隨時提款話咁易!