診所職場事【寶豬趣聞】相由心生|珍寶豬

診所職場事【寶豬趣聞】相由心生|珍寶豬

【診所職場事】有日一位小姐嚟到診所。
佢睇完醫生之後拎住張病假紙望望,發現同自己想放假嘅日子有出入..
於是佢即刻忍唔住大爆炸:「我頭先咪同醫生講我要四日假囉!」

撰文:珍寶豬

我:「醫生頭先都有同你講你有需要嘅就返嚟覆診~佢一次寫唔到四日病假俾你啊」
佢:「乜嘢寫唔到呀?唔識寫個四字定唔識串個四字英文呀」
小姐你份人真有幽默感啊。
我:「醫生唔係唔識~係認為你個病唔需要放咁多日病假」
大家畫公仔畫出腸很有癮嗎?

佢問我:「阿姐,你知唔知咩叫相由心生呀?」
原本唔太清楚,而家望住你就覺得略知一二…
我笑笑:「病假紙醫生而家係寫咗兩日俾你嘅,你到時真係仲好唔舒服嘅就再嚟睇醫生啦~醫生今日都淨係開咗兩日藥俾你」
佢指枱:「我問你呀!知唔知咩叫相由心生呀?」
我嘆一口氣:「請問你問嘅同你睇醫生又有咩關係呢~」

佢:「你答我囉,冇關係都可以答㗎!你頭先講咁多廢話有邊句係同睇醫生有關係呀?」
可能你有幻聽啦~
我:「關於睇醫生病假紙方面,我仲有冇其他嘢可以答到你?如果冇嘅,你兩日後有咩唔舒服記得返嚟覆診~」
講完之後我就低頭做我嘅嘢~
小姐唔知係咪愛上我,佢不停拍枱:「我要你答我呀!咩叫相由心生呀!」

有位坐喺度嘅阿姨一直睇住佢發爛渣出聲了:「人哋都講咗係咁就係咁啦,你拍枱都冇用㗎」
小姐:「關你咩事呀?我問緊佢嘢又關你咩事呀?」
阿姨:「你問佢咩相由心生做咩呀?你想人哋直接答你你好醜樣呀?你自己去照鏡囉!你醜樣唔駛全部人都知你醜樣㗎!」
我緩緩抬起頭,爭啲想舉起隻手指公…

The user will never see this