90後揸19萬現金 用10萬買穩陣股 還是月供股票好|龔成信箱

90後揸19萬現金 用10萬買穩陣股 還是月供股票好|龔成信箱

【月供股票】今日龔成信箱,不少讀者想為未來作打算,應如何實行投資計劃,亦提及熱門的股票以及投資心態等問題,當中包括熊市、增值股、月供股票、財務自由、潛力股 ,以及收息股。

撰文:龔成 |圖片:新傳媒資料庫

1.穩陣股

龔成老師你好,我大學畢業就黎夠一年,工作穩定,而家月入3萬,每個月都草2萬,預計自己一年就草到20萬,多左出黎個4萬就交稅同去旅行。

而家工作左10個月,草左大概19萬,想欏其中10萬黎長線投資買下股票(想淨返啲現金有需要時可以用)

但其實我對股價投資零認識,睇過你啲 post,見你多數推介人地新手買月供股票,咁我呢個情況係咪都係可以將10萬入手啲穩健啲嘅股票,然後每月儲2萬再拎部分黎買月供股票?應該拎幾多好

同埋我見你之前有個video分析左證券行同銀行,其實我應該主要都係手機/網上交易,咁係咪係證券行開股票戶口好啲?但我本身銀行戶口係hsbc,咁係hsbc開會唔會易啲打理?

我仲想買本你嘅書 學多啲股票投資 見你出左好多本 bb班既我又適合買邊本呢?

唔好意思啊問埋咁多白痴問題,因為唔知應該點樣入手好,多謝你既耐心解答啊

 

龔成老師:

你現時持有$20萬,可以將其中$10萬用作投資,餘下的就作備用,投資部分可選平穩增值類股,例如盈富(2800),因為你未有選股的能力,所以簡單去供盈富,是最好的,因為這是一個50隻股票的組合。

你分注去入就得,即是不要一次過將$10萬,不要用盡,而是分開好多次咁去買,這可以令你的買入價更平均。

同時,你可以並行去做月供股票,你現時每月儲到$2萬,將其中$1萬去做月供都得。月供的好處是將買入價分散,能有效減少風險,你供盈富、中銀(2388)、港鐵(0066)、領展(0823)、銀娛(0027)、比亞迪(1211)都可以,只要不理中短期股價,長期進行就得。

銀行同證券行都無所謂的,如你本身有匯豐,匯豐會較為方便,因為容易扣數入數,但手續費可能貴過證券行,這方面你要自己衡量。

《股票勝經》、《80後百萬富翁》是最入門的。另外,我的股票班,都是針對初中階投資者,新手都適合的。唔理用甚麼途俓,都建議你增加投資知識,因為當你慢慢累積到一定的資金,幾個%的回報,已經可以相差好大。(對照龔成信箱:Q6442)

2.波幅

我正考慮月供股票,諗緊長遠看好既有啲平時波幅大(比亞迪/騰訊),有啲相對少(盈富)

因為月供的話是否買波幅大既平均值更理想,因為唔駛成日睇住

 

龔成老師:

就月供股票而言,股價法波幅的股票,最後的平均值的確會更理想。但這只是一個小因素。

最重要的,都是企業的長遠質素,而及前景,這決定這股的長期股價,這點是最重要的。(對照龔成信箱:Q6436)

3.香港電視(1137)

龔sir你好!怎睇1137香港電視?上年蝕$2億,一部分應該係投資自動倉庫系統入帳影嚮。

訂單收入比前年增218%, 有超過10億營業額!個勢好似幾強。請問現價是否合理?唸住大手入長渣!

 

龔成老師:

香港電視(1137)佢而家專注做網購,但仍然處於燒銀紙的狀態,每日燒幾十萬,結果無人知。現時市值約$20億、$30億,如果佢日後變到好勁,這價當然不貴,但如果燒幾年銀紙仍然蝕錢,咁股價將會有明顯回落。

所以,這刻根本就好難定義平貴,只是憑幾年後的情況,見到佢的價值,你長線等收成可以,但持有太多的風險難免較高,這方面你要自己衡量。(對照龔成信箱:Q6437)

90後 穩陣股 月供股票 龔成信箱
香港電視(1137)現專注做網購,但仍然處於燒銀紙的狀態,持有太多的風險難免較高。

4.滙豐(0005)

你好,本人今年25歲,每月大概入息3萬,有大約30萬現金,沒有投資經驗

如果想買滙豐和騰訊,有什麼意見?

 

龔成老師:

滙豐(0005)同騰訊(0700)都有質素的,都可以投資,但你不應只投資這兩股。滙豐現時的質素略降,但都優質,不過增長力不強,只合收息,因此將其中一部分資金投資可以。

騰訊雖然有潛力,但現時股價都不平宜,雖然可投資,但同樣不能太過集中。

以現時25歲,其實仍有一定的增長能力,因為我地會以「先增值,後現金流」作為模式,累積財富。你可以建立一個組合,當中以平穩增值股為主,例如盈富(2800)、港鐵(0066)、中銀(2388)等這類,令外加上潛力股,例如騰訊、比亞迪(1211)等。

另外,買入時最好分注,保留一定的現金,以作大跌市時買平貨之用。(對照龔成信箱:Q6438)

5.熊市

龔成老師,你之前建議我供2800.關於2800我有幾個疑問想問下:

1.2800以我既理解係跟HSI升/跌.2800之所以值得供係因為過往20年睇.HSI都係一直增長.所以老師先會提議我供?

2.係咪因為我較年青.所以受風險既能力較大.所以就算經過熊1.2.3我都有能力坐倉.熊1一直供到牛1?

3.如上題.假若我熊市開始供起.供到下個經濟週期(供到牛市)應唔應該減少少磅.獲利一點再供?

4.如果牛市減低供款額.到熊市才加大供款額.會唔會好過每個月都不問價用固定金額供好?

5.唔會有其他穩健既股票跑得贏大市?2800只係跟足個市行,會唔會有其他更好既選擇?

 

龔成老師:

1)盈富(2800)就是跟恆指,恆指過往增長不錯,同時,當中的50隻成份股,都是有質素,而且前景不錯的股票,大多值得投資,因此值得月供,長線持有。

2)你可以持有好多年,一直持有,經歷多個股市週期,中間的波動,不用太理會,更因當中的波動,令你買入更多的貨。

3)如果你有一定的投資能力,當然可以在中間把握牛熊週期,作長線的買賣,但這要有一定的技巧,因此,簡單地長期月供,是最好的方法。

4)會。但前提是你已掌握了市況的長期週期,能成功把握到當中的平貴。所以,如果你未有把握投資時機、平貴、企業估值的概念,簡單地供固定金額,是最好的。

5)當然有股票跑贏大市,但前提是你已有選股的能力,你有評估企業質素、分析前景的能力。如果未能掌握,簡單地月供盈富是最好的。(對照龔成信箱:Q6439)

6.月供股票

你好,我是投資新手,看到你建議月供股票給初級投資者

請問月供股票是每月自己買入固定數量的股票,還是銀行可以set左自動每月扣入固定銀碼的股票?謝謝

 

龔成老師:

月供股票是固定的「金額」,例如每月$5000,銀行就會每月某日,同你扣$5000,然後買入該股,例如今個月這股的股價$10,就會同你入500股,下個月股價$20,就會同你入250股。

總之,就是每個月扣你$5000,按翻當時市價同你入貨。

你去銀行登記,金額同埋邊隻股票,銀行就會自動月月同你入。(對照龔成信箱:Q6440)

7.增值股

龔成老師您好,想請教一下月供股票的選擇。

現時保守估計每月可月供$5500,持有1手置富(778)

& 1手北控水務 (371),會長期持有。

比亞迪(1211)$500

金沙(1928) $1000

煤氣(0003)$1000

長建(1038)$1000

港鐵(0066)$1000

領展(0823)$1000

因為本人23歲,看了很多老師的留言,現時應該考慮平穩增值股+潛力股,所以想問下以上組合有問題嗎?

有沒有更好的選擇,例給換中銀(2388)和盈富(2800)等嗎? 感謝

 

龔成老師:

你之前持有的股票,都是有質素的,繼續持有無問題。

你現時23歲,平穩增值股+潛力股是適當的組合,上述所選的股票都是有質素的股票,可以月供,無問題的。由於你好年輕,其實多一點潛力都可以,比亞迪(1211)加到$1000都無問題的,只要你長期進行月供就得。

上述的6隻已經可以,如果你能增加每月供款的話,就加上盈富(2800),你的組合會更平衡。(對照龔成信箱:Q6441)

8.收息股

你好,我今年25歲,我有兩個小朋友,一個21個月大,一個6個月大,目標4年後可以做full time mum。

我做政府工,未扣強積金每

月收入$12480,可儲$4-5000蚊一個月,先生31歲,每月收入$25000,做工程師,每月可儲$10000,現有儲蓄$100000

我想4年後每月可有$3-4000被動收入,請問我應該月供買收息股定點?應該買邊隻股呢?謝謝。

 

龔成老師:

我地一般進行人生財富累積,會以「先增值,後現金流」作模式,即是年輕時集中在增值部分,到增值左之後,先將資金轉為現金流類別,防守性較強的股票類別。

如果你想在幾年後有一定的現金流,其實這刻可以先集中在「增值」的動作。

每月儲$10000,可將其中的$7000用作月供股票,餘下的就先儲現金,等大跌市時才動用,你可以供一些平穩增值股,例如盈富(2800)、中銀(2388)、港鐵(0066)、領展(0823)、煤氣(0003)等,平穩地幫你財富增值。你不同理中短期股價的升跌,保持月供就得。

至於現時的$10萬,可以動用其中的$3萬-$5萬,買入盈富基金,幫你的股票組合打左底先。

到了4年後,你應該已累積了一定的股票,到時再將這些股票,轉換成收息股類別。例如港燈(2638)、香港電訊(6823)、工行(1398)、置富(0778)等,當然,到時要再分析。

上述的策略,能令你的財富最大化,同時到時能產生最多的現金流。(對照龔成信箱:Q6443)

9.捷榮國際控股(2119)

老師,你好

想請問下你對2119捷榮有咩睇法

捷榮有穩定收入來源

但飲品方面似乎增長潛力唔係太大

另外當日招股時表示會向冷凍食品方面發展

但感覺都需要相當長時間

所以想問下老師認為值唔值得長渣呢?

現價又買唔買得過呢?

 

龔成老師:

捷榮國際控股(2119)算是不過不失,近年生意略有增長,但就不明顯,盈利有少少反覆,2017年度去之前有下跌情況。

雖然佢有品牌,但增長力唔算強,新股上市初期比較波動,所以風險較高,但佢過往的增長力不算強,生意無大增長,盈利亦是,以佢過往$4000萬-$6000萬盈利一年計,現時市值不算平。

發展都算正面的,但這刻不建議大注,長線都可以的。(對照龔成信箱:Q6444)

10.合和實業(0054)

老師,你好,想請問:0054合和實業,現價大概$27,可以買來長渣嗎?

因覺得佢派息有6厘幾,而且是老牌實業,跌到呢個位入,可以嗎?公司業務前景如何.$26.9已入了5000股.請指教,謝謝!

 

龔成老師:

合和實業(0054)有質素的,前景不過不失,但你唔好預佢有高增長,睇翻佢的業務,以及近年的財務數據,都反映佢只能平穩增長。現時股價可分注投資,但不要預期有高增長,你以收息股的角度投資這股可以。

這股的派息不錯,如計及之前派特別股息$2,有成十幾厘股息,但不要預期年年都有特別息,但整體說,這股收息不錯的。你可長線持有。(對照龔成信箱:Q6445)

延伸閱讀:

投資初哥揸4萬現金想買濠賭股 銀娛金沙澳博三揀一

25歲月儲11K買比亞迪吉利盈富 5年內能儲夠100期萬做買樓首期嗎