診所職場事 【寶豬趣聞】 差額  |珍寶豬

診所職場事 【寶豬趣聞】 差額 |珍寶豬

【診所職場事】電話響起~

我:「你好,乜乜診所」

對方係一位小姐:「我早幾日嚟睇過㗎,你記唔記得我呀?」

撰文:珍寶豬

我:「唔好意思呀小姐,我就咁聽聲認唔到你啊~請問有咩事呢?」

佢:「我有啲嘢想麻煩你㗎,真係有啲麻煩到你」

唔好咁麻煩啦,收線啦。

我:「咩事呢?」

佢:「你哋嗰日咪收我三百蚊嘅」

我:「係呀,我哋診金連藥費係三百」

佢:「我老公話我睇貴咗呀」

咁點呀?睇醫生都會睇貴咗㗎?

我:「吓?」

佢:「佢話搭個站去第二度睇平一百蚊呀」

我:「哦?係呀?咁下次去嗰度睇囉」

佢:「我會呀,呢次你可唔可以退返錢俾我呀?我唔駛你退全數,你退返個差額俾我得㗎啦,我都食晒啲藥㗎啦,我知冇得退全數嘅」

你知唔知差額都係冇得退呀?你都識講藥都食晒啦,咁你用咩嚟做『退』?

我:「小姐你已經食晒啲藥,我哋冇得咁退㗎喎」

佢:「我知你唔會退足三百俾我呀,你退返一百俾我得㗎啦,退個差額啫!」

我:「我哋唔會咁退㗎,你睇又睇咗醫生,藥又食晒,過咗幾日話第二間平啲嘅,我哋唔會因為咁而退啊,第二間收費係點唔關我哋事嘅~」

佢:「我知麻煩到你,我都係麻煩埋你呢次咋。你今次退咗俾我,我以後都唔過嚟你度睇㗎啦,我以後會去平啲嗰間㗎啦,你今次退俾我啦」

既然你都唔會再返嚟,我仲需要理你嗎?

我:「我哋唔會退啊」

佢:「點解呀?另一間平一百喎」

我:「其他診所收費係點唔關我哋事嘅~」

佢:「唉,即係財到光棍手啦,做得醫生都咁樣呃人錢嘅,因住呃埋呃埋唔夠錢醫自己呀!」

 

嘟。

你都係棍,搞屎嗰隻啫~

延伸閱讀:

診所職場事【寶豬趣聞】估估吓

診所職場事 寶豬趣聞 估估吓 珍寶豬

診所職場事【寶豬趣聞】容易感冒

診所職場事 寶豬趣聞 容易感冒 珍寶豬

【診所職場事】有日有位太太嚟到診所~

佢登記後唔願坐低等,一直企喺登記處側邊。

撰文:珍寶豬

一睇佢個樣就知佢好多心事想搵人傾,佢終於忍唔到口:「姑娘呀?平時呢度多唔多人睇呀?」

我望望佢:「都係咁上下啦」

佢:「你哋開咗好多年啦?」

我:「喺度五六年左右啦」

佢:「我聽講我哋呢附近有明星住」

我:「係咩~我唔係住呢頭冇留意」

佢:「咁你哋有冇見過明星入嚟睇醫生呀?」

你記者嚟㗎?

我:「唔好意思呀太太,有咩人嚟睇過我係唔可以講你知㗎」

佢:「你唔駛同我講係邊個㗎,我自己估,你擰頭點頭就得㗎啦,當玩遊戲咁」

我冇興趣同你玩遊戲。

我:「你去坐吓等睇醫生啦,唔好意思,我仲有嘢要做~」

佢:「講幾個嘅事嚟聽吓呀,你唔駛直接講係邊個㗎嘛」

我:「我真係冇料爆你聽呀」

佢:「我聽人講有個嚟睇過婦科㗎」

我冇出聲。

佢:「係咪乜乜乜呀?」

我唔理佢。

佢:「嗰個姐仔呢,佢係咪下面有事呀?你有冇咩講嚟聽吓呀?黑唔黑呀佢?」

我:「太太呀,你咁關心其他人嘅嘢做咩呢?你自己都係唔舒服嚟睇醫生嘅,我係咪又可以貼街招將你啲私事病情講俾其他人知呀?」

佢打個突:「做咩咁惡喎,佢哋明星點同呀,公眾人物嚟嘛」

我:「人哋做明星就要咩都揭晒俾你睇㗎咩~邊個嚟到診所睇醫生嘅,個身份都係一樣,都係病人啫。邊個病都一樣㗎~」

佢:「我又冇叫你直接講係邊個,我估咋嘛」

我:「估嚟做乜呀?」

佢擰轉面慢慢行去坐低:「估咋嘛」

估你條命呀。模稜兩可咁估估吓,估到上火星都得㗎啦~打爆你屁股呀!

延伸閱讀:

診所職場事【寶豬趣聞】成為有錢人 上回

診所職場事 寶豬趣聞 成為有錢人 珍寶豬

診所職場事【寶豬趣聞】成為有錢人 下回

診所職場事 寶豬趣聞 成為有錢人 珍寶豬

【診所職場事】有日一位先生嚟到診所。

佢行埋嚟登記處問我:「姑娘呀?係咪可以睇醫生呀?」

我:「可以呀~你未睇過嘛?你俾我身分證我登記呀~」

撰文:珍寶豬

佢:「哦~好呀,但係你介唔介意我問你少少嘢先呀?」

我:「咩事呢?」

佢:「我而家懷疑我係感冒嘅,醫生會唔會俾啲咩建議我可以預防感冒呀?」

強身健體啦,增強抵抗力啦,多啲休息啦,均衡飲食啦,正常應該都會咁講嘅~

我:「應該有嘅,你入去見醫生嗰時可以問埋醫生啊」

佢:「醫生會唔會check我點解成日感冒呀?我真係成日都感冒喎」

我:「你都可以同醫生講嘅,如果需要做身體檢查嘅,醫生都會幫你睇吓做邊類型檢查~」

佢:「會唔會由生活源頭做起呀?」

…要唔要醫生同你一齊生活睇吓有咩需要改善?醫生,有人想月包你!

我:「你可以講俾醫生知你有咩生活習慣咁嘅,不過醫生最主要都係會幫你舒緩咗而家嘅病徵先~你都可以自己留意吓生活上有咩唔好嘅習慣,自己再試吓調節~」

佢:「開冷氣裸跑,個人跑到越慶,部冷氣就越凍」

………..喺屋企裸跑嗎?你部冷氣機係人力發電的嗎?頂,我個腦有畫面添。

我呆咗,俾唔到反應。

佢:「係咪都要講俾醫生知?」

我仲未呆完:「….可以嘅」