診所職場事 寶豬趣聞 肚痾之痛 珍寶豬

診所職場事 【寶豬趣聞】 肚痾之痛|珍寶豬

職場

廣告

【診所職場事】有日一位先生嚟到診所。

佢登記後問我:「你呢度有冇廁所呀?」
我:「冇呀,你要去商場洗手間啊,唔駛鎖匙都去得嘅」
佢:「遠唔遠呀?」

撰文:珍寶豬

我:「唔係好遠㗎咋,行一陣到㗎啦,你出門口睇指示牌就見到點行去」
佢深呼吸:「我唔知有冇機會行到過去」
你唔係諗住喺度瀨嘛?肚屙係好慘…不過我做拖地嗰個都好慘啊~我求吓你救救我,唔好攬炒好嗎?
我:「你個肚唔舒服到咁呀?忍唔忍到行過去呀?唔係好遠㗎咋,真㗎~」

佢:「我而家夾住咗呀,行得過去我唔知仲夾唔夾得住呀」
我:「咁我有咩幫到你啊?你都唔可以喺度屙㗎,我哋呢度都冇廁所」

佢:「你送我過去得唔得呀?」
我點送你過去好呢?公主式抱你過去,我怕會抱唔得耐? 我:「我帶你去都一樣要行㗎喎?」
佢拍枱:「諗啲唔駛我行嘅方法」
我望住佢塊青青的臉,深深感受到佢嘅痛苦,我被感動了:「一係我用輪椅推你過去啦」
佢點頭。
我推出輪椅,佢坐上了,我哋出發啦!我以最快嘅推速帶佢前往目的地,唔知係咪我推得太快,有啲風,風中夾雜住一陣又一陣嘅味…
我喺路途上忍唔住問佢:「先生,你係咪放屁呀?我喺你後面食正風位喎」
佢冇出聲。
目的地就在眼前,我:「到啦,你快啲去廁所啦」

佢掩住屁股離開後,我推住輪椅返診所…望見坐位上有股濕氣…

肚屙真係好辛苦,我明㗎~

延伸閱讀:

診所職場事 【寶豬趣聞】 牙醫

【診所職場事】有日一位媽媽帶住個小朋友嚟到診所。

佢哋行到嚟登記處前,媽媽同小朋友講:「同阿姨講有咩唔舒服啦」

小朋友望住我,淨係望住我。

撰文:珍寶豬

我:「係咪睇醫生呀?麻煩你俾身分證明文件我呀」

媽媽又同小朋友講:「同阿姨講有咩唔舒服啦,俾阿姨睇啦!」

小朋友繼續得個望字。

我同媽媽講:「一陣俾醫生睇得㗎啦~你俾咗佢嘅證件我登記先呀」

媽媽完全冇理我,又同小朋友講:「嗌你講呀,同阿姨講呀」

小朋友終於講咗一個字:「痛」

我望住小朋友問:「邊度痛呀?痛就睇醫生呀,一陣再話俾醫生知呀」

媽媽:「擘大你個死人口俾阿姨睇啦」

哇,咩嘢死人口呀?你把死人口呀?

小朋友聽話擘大口,指指口入面。

我問媽媽:「牙痛呀?牙痛嘅話搵牙醫好啲喎,牙痛要同佢檢查啲牙㗎~」

媽媽終於理我:「我夠知啦,你當我唔識咩!佢係牙痛呀!」

咁你既然知,又做咩過嚟西醫診所度?

我:「我哋西醫嚟㗎喎~唔係牙醫呀」

媽媽:「牙醫貴呀嘛!」

我夠知啦!

我:「但係牙醫同西醫係兩個範疇嘅嘢,西醫做唔到牙醫做嘅嘢㗎~如果佢係蛀牙嘅,西醫冇得補牙㗎」

媽媽:「我知呀」

我:「咁…你想照登記入去見醫生?俾醫生睇吓會唔會係其他問題?」

媽媽:「佢肯定係蛀牙㗎啦,我同佢睇過啦,個牙醫話補一隻要成三百蚊呀!我梗係唔俾啦!」

…你嚟玩我呀?

我:「蛀牙一定係牙醫做㗎啦,我哋做唔到㗎~」

媽媽:「你打兩枝麻醉針落去唔得咩?醉死隻牙佢咪唔痛囉?」

我:「藥力只係一時~長遠嚟計都一定係解決咗個問題先嘅,你帶佢去睇牙醫啦~蛀牙唔快快手搞好佢嘅,入埋牙根,影響埋其他牙仲麻煩啊」

媽媽捉住小朋友走:「去第二間啦,呢間都痴線嘅!」

早知照同你登記,俾醫生收你三百蚊診金算啦~

延伸閱讀:

診所職場事 【寶豬趣聞】 睇醫生唔俾錢

【診所職場事】有日一位妹妹嚟到診所。
我見佢左望右望,於是主動出擊:「係咪要睇醫生呀妹妹?」
佢行埋嚟登記處問我:「我想問嘢㗎」
我爭啲想講『何不回去找媽媽問?』

撰文:珍寶豬
我:「你想問啲咩呀?」
佢摸摸自己心口:「我呢度有啲肉突起咗」
我:「哦~你呢啲係發育啊,正常㗎~」
佢:「我知呀,學校有教」
我唔趕客我唔趕客:「咁你覺得有唔舒服呀?」
佢:「我想知可唔可以控制到有幾大」
我望望自己心口,如果可以控制的話,我一早控制咗,吹大佢吹大佢吹大佢!
我:「發育時期佢會自由發展㗎啦,你唔好揀飲擇食~營養足夠自然發育得好」

佢:「我上網睇片,啲姐姐啲肉好大粒」
好大粒好大粒好大粒?你介唔介意話我知你睇咩片?
我:「…大細嘅嘢除咗自己飲食方面夠營養,都冇咩地方需要注意㗎啦應該」
佢又摸摸自己心口:「我而家先得咁細粒,要食幾多嘢先變到大粒?」
你可唔可以唔好再用粒嚟形容?
我:「順其自然啦妹妹~」
佢:「我可唔可以問啲姐姐食咩多㗎?」
我:「…你識佢哋嘅話咪問吓囉,問吓冇壞嘅~」
佢:「我唔識佢哋㗎,我淨係上網睇到咋」
我:「係咪facebook啲人呀?」
佢拎出電話click兩click,遞部電話俾我睇:「呢個係其中一個呀,好大粒肉呀!我都想好似佢咁有咁大粒肉。浪吓浪吓好靚。」

…這是日本愛情動作片…

 

 

延伸閱讀:

診所職場事【寶豬趣聞】估估吓