診所職場事【寶豬趣聞】毛毛人物化｜珍寶豬｜家英哥｜毛髮稀疏
我：「醫生係男醫生嚟嘅，你ok嘅我同你登記啊」
撰文：珍寶豬
佢手指向下指：「佢會唔會要睇我嗰度㗎」
我：「小姐你想睇啲咩啊？」
佢：「我嗰度好似Eason咁」
邊位Eason呀？
我：「Eason？」
佢：「稀疏呀」
我：「你係講毛髮稀疏呀？」
佢：「梗係啦，咪好似Eason咁囉，我男朋友咁話我㗎，佢叫我嚟睇吓係咪有事嘅」
我第一次聽人用人物嚟形容自己嗰度啲毛毛…
我：「哦…咁呀…醫生要唔要檢查我就唔知嘅，你可以入去同醫生講咗你情況先，等醫生了解咗咩事先」
佢：「點講好呀？」
你咪話下面啲毛好似eason囉，你頭先都係咁同我講㗎～
我：「照直講得㗎啦，你覺得有咩問題就直接講」
佢：「你覺得會唔會因為磨擦太多所以咁呢？」
你同我講有咩用呢？
我：「你同醫生講啦～」
佢：「我知要同醫生講，我想問吓你啫，大家女人怕咩呀，你有我都有，大家拎出嚟睇吓都冇所謂啦」
我冇興趣拎出嚟俾你睇…
我：「你係咪睇醫生啊咁？係嘅俾身分證我登記先啊」
佢：「如果冇咩嘢嘅，我都唔係咁prefer睇，你有冇咩意見俾我呀？」
我唔趕得客：「你自己決定啦～我冇得幫你決定㗎」
佢：「會唔會真係磨太多呀？會唔會搞到變X家英㗎？」
你好啦喎！你唔好再用人物嚟形容啦～
我：「你擔心嘅不如就入去見見醫生啦，我真係冇意見」
佢：「如果要睇嘅，我都係prefer搵女醫生，我睇吓附近有冇女醫生先啦」
…你點解唔一早上網睇？
延伸閱讀：
診所職場事 【寶豬趣聞】 牙醫
【診所職場事】上回講到小姐終於發現自己張身分證漏低咗喺診所～佢懷疑我KEEP住佢張身分證係有不軌企圖…我對灰灰白白淨係得個頭嘅相冇興趣啊。
我：「小姐，你冷靜啲，你張身分證我已經幫你收起咗喺櫃桶，你可以隨時過嚟拎返啊」
佢：「你留起咗我張身分證，你冇俾返我，仲要我過嚟拎？我過咗對面海啦，你拎返過嚟呀！」
撰文：珍寶豬
我：「喺登記後我有親自俾返張身分證你㗎，係你走嗰時擺低咗佢喺櫈上面」
佢：「我就唔會過嚟㗎啦，我呢幾日都唔得閒囉，我都明你呢啲打工仔懶過積㗎啦，你一係就同我掉去郵筒囉」
我：「寄返俾你？你會唔會過嚟拎安全啲呀？」
佢：「就咁掉落去得啦，佢哋自然會送」
送去垃圾桶嗎？
我：「咁呀…一係你俾地址我啦，我同你寄掛號啦」
佢：「唔駛呀，你就咁成張掉落去得㗎啦！」
我：「吓？地址呢？」
佢：「我咪話咗佢哋自然會送囉，你有冇聽我講嘢㗎？」
我：「我有聽…係唔明點解唔駛寫地址就會送到去你手上啫」
佢：「我香港公民嚟㗎」
我知，如果唔係你點會有身分證。
我：「所以？」
佢：「政府有我地址有資料㗎嘛！見到我唔見咗嘢仲唔擒擒青俾返我呀？記得掉去郵筒呀！我唔得閒同你講呀！我已經俾你玩殘㗎啦」
嘟。
收線後，我拉出櫃桶望住小姐張身分證發呆。
同事問我：「做咩呀？佢幾時嚟拎呀？」
我：「佢叫我就咁掉落郵筒喎」
同事：「咪制呀！有咩事張身分證唔見咗，佢入你數㗎啦」
於是，我閂返埋個櫃桶。
小姐喺一星期後嚟到診所發爛渣，話打咗好多次電話去郵局都冇人覆到佢張身分證去咗邊…
我拉出櫃桶…surprise！佢爭啲想一巴打爆我個咀。
延伸閱讀：
診所職場事【寶豬趣聞】成為有錢人 下回
【診所職場事】電話響起～
一位小姐都未等我講開場白，佢已經爆我：「我張身分證係咪喺你度呀？你留住我張身分證有咩企圖呀？你有冇搞錯呀？留住我張身分證做咩呀你？吓？」
撰文：珍寶豬
等我講返上晝嘅事先…
一位小姐嚟登記，我：「得㗎啦，你坐低等等啊，身分證俾返你先呀」
佢一手拎住電話，一手拎住身分證，行埋去坐低等睇醫生。
睇完醫生拎完藥離開診所，我望望出面嘅櫈，發現佢張身分證貼貼服服咁喺櫈面上。
於是我打俾佢：「喂？係咪乜小姐呀？」
佢：「唔駛呀」
嘟。佢技巧純熟地收咗我線。
我再打過去：「喂？你張身分證…」
我都未講完，又嘟咗我了。
咁我唯有等佢自己發現…
就係咁，佢就爆我：「留住我張身分證做咩呀你？吓？」
我：「乜小姐係咪？你張身分證漏咗喺度之後我有即刻打俾你㗎～」
佢：「幾時呀？咩時辰呀？WHEN呀？」
又唔駛咁激動嘅，就算你用三個問法，都只不過係問緊同一樣嘢啫，我都唔會答你三句。
我：「今日上晝十一點半，打咗兩次俾你」
佢：「我冇聽過你電話喎！而家幾點呀？三點八呀！你留住我張身分證咁耐去做咩呀？有咩不軌企圖呀？」
我份人冇咩創意動力㗎咋，人哋唔提吓我，我都唔願郁嘅。你突然提到不軌企圖就勾起晒我啲動力，我好想即刻去隔離影印舖叫佢放大你張身分證個樣，放大到4000%貼喺診所門口…『如發現此人，請與本診所職員聯絡』。
