進取投資

90後情侶月儲$1萬 計劃3年內結婚 想進取投資 呢隻股票要留意|龔成信箱 |上海集優|恆地 |銀娛|盈富基金 |南方A50

投資

廣告

【進取投資】今日龔成信箱,不少讀者想為未來作打算,如何實行投資計劃,亦提及熱門的股票以及投資心態等問題,當中包括長線投資、利息成本、月供股票、高息股、人民幣,以及高增長組合等提問。

撰文:龔成 |圖片:新傳媒資料庫、unsplash

1.進取投資

龔成老師你好,我今年26歲,月入三萬,每月用$5000月供基金(需供五年);另用$5000想作投資用途。

男友每月可用$3000-5000作投資用途。

我倆計劃3年左右結婚,兩人加埋每月大約有$8000-$10000可用作投資。

我地希望用比較進取方法將回報增加,請問可以如何分配投資組合?謝謝解答!

 

龔成老師:

雖然你地年輕,可投資方面進取少少都得,但由於3年後打算結婚,可能要有一筆錢動用,因此,投資上宜平穩增值為主。

如果每月可投資$8000-$10000,可以將其中的$5000,月供股票,由於你地本身已有供基金,因此要睇你地該基金的性質,如果都是中港類的股票基金,那月供股票部分,就不用供盈富(2800),否則,可以供盈富作為其中一部分。

月供股票$5000,你可以選一些平穩增值的類別,例如銀娛(0027)、港鐵(0066)、領展(0823)、中銀(2388)、煤氣(0003),這都是平穩增值的股票,都適合月供的。

如果你想進取少少,就可適量地加入比亞迪(1211)去做月供。上述股票,你保持不斷月供就得,自然能為你地帶來財富增值的效果。

至於每月餘下的現金,就先儲起佢先,等到股市有較大下跌時,才買入平宜貨。這部分十分重要,但就要你有較多的投資知識,只要你在這部分,有選股及把握時機的能力,在財富提升上將會是重點。(對照龔成信箱:Q6974)

2.電能(0006)

我想問兩隻股: 第一隻電能0006, 係咪算係低價,仲值得買,而佢基本面係咪無變?

另一隻315數碼通係咪仲係值得買入既股之一?唔該晒

 

龔成老師:

電能(0006)佢在長和系的定位,其實一直都只是一隻收息股,都年來都是這樣。佢不停派息,長建(1038)就會不停收息,這策略在過往都係咁。

長建定位是長和系中基建類的進攻的部分,而電能就是防守部分,作用是不斷供錢比長建。所以,電能只會是收息股,平穩發展,沒有太大的驚喜,而長建則有增值能力。因此,要睇你本身的投資目標係咩。這股有投資價值的。

至於數碼通電訊(0315),由於價格戰影響,收入略會下跌,但本身仍是有質素的,只是中短期仍會較弱,長期算正面,但你唔好預佢好高增值。投資值博率算是中等。

(對照龔成信箱:Q6954)

3.人民幣

老師你好,想問下如果我現在手持了建行(@7.5)同農行(@3.82)

是否可以繼續以長線作為收息之選,或是應先行減持待人民幣貶值和貿易戰舒緩再作考慮?

 

龔成老師:

人民幣波動會對相關股票中短期略有影響,但由於人民幣唔會大幅貶值,所以又唔洗太擔心。只是中短期的股價可能會較弱。

建行(0939)及農行(1288)都有一定的質素,你集中長期的企業價值就得,唔洗特登賣出股票。但就兩點注意,第一,銀行股不能佔總財富太多,所以如太過就可能要作出調整,第二,這兩股都只是收息股,不要對股價有太大的期望。

(對照龔成信箱:Q6955)

4.盈富基金(2800)

老師 想月供股票 長線超過五年 有幾個心水 2822 盈富 恆生銀行 中行 建行 港鐵

特別係2822 你點睇呢?
感覺回報長遠比盈富高一點

 

龔成老師:

上述的股票都有一定的質素,都可月供,只要長期進行就得。而你最好建立一個平衡的組合,例如同類股票不用佔比太多,例如銀行股,只需選1、2隻就夠,不要過度集中。

至於盈富基金(2800)同南方A50(2822),兩隻都可月供,盈富包括了中港的股票,企業較為穩定,組合較為平衡。

至於南方A50,則是追蹤中國A股,股價會較為波動,企業的穩健性略比香港的低,但潛力會略高,同時會集中在中國類別。以潛力來說,的確較大,但風險同樣會高少少,因此,你可自行決定供邊一隻。

(對照龔成信箱:Q6956)

5.高增長組合

你好 龔老師
我19歲人 想增值自己既更多既被動收入 第一高風險以個人來講我接受得到 第二亦想有個高增長既組合

請問閣下有什麼推薦?

 

龔成老師:

你首先要增加你的投資知識,你19歲,知識將會發揮最大的作用,對你之後的財富會有深遠的影響,多睇書及上堂,對你好有用。

如果想要較高增長的組合,當中一定會包左潛力股,但這類股無可避免會有較大風險,但都可以小注,例如比亞迪(1211),你可考慮月供。但如果怕風險,可投資一些較為穩健,而都有增長潛力的股票,例如恆地(0012)、銀娛(0027)。

(對照龔成信箱:Q6957)

6.月供股票

老師你好呀,請問一下,如每月只能抽到1000元作為投資,是否存起來比較好?

 

龔成老師:

其實$1000都可以做月供股票,但你一定要問清楚手續費,如果手續費佔比太多,就不值得做。

若不計手續費因素,你可以月供$1000盈富(2800),因為這是一個組合,當中已有平衡的效果,同時有一定的長遠增長能力,因此對你來說是最好的。

若果手續費太高,就只好存現金,到存到一定的數目後,再作投資。

(對照龔成信箱:Q6958)

7.上海集優(02345)

成老師 求教!!

現時持有80000股 上海集優(02345)

40000股 1.66買
40000股 1.69買
現時價格1.17

最近有新聞話黎緊要 供股,5股供1股,價格1.30
睇左成老師fb,知道買股票係等於買企業

問題一:
未知是否應該供股?唔知上海集優依個企業仲值唔值得投資落去?

問題二:
如果唔供股,應否繼續持有,還是盡早放? 應該幾多價位放?

Ps : 現時手持現金都足夠。非常感謝!!

 

龔成老師:

決定供股與否,最重點不是考慮買入價、現價、現時賺蝕數,而是該企業,是否值得你再投入一筆新資金去投資。以供股價去衡量,是否值得再投入。

上海集優(2345)主要從事設計、製造及銷售汽輪機葉片、軸承、緊固件、切削刀具及其他產品,以及提供相應技術服務,整體的質素算是中等。

生意同盈利都保持上升,這的確是利好因素,但本身的賺錢能力低,股本回報率、純利率,一直處於偏低水平,長遠的增長力亦有限單

1)這股不太值得供股,與其將新資金再投入這企業,不如投資其他更優質的股票,長遠的回報會更好。

加上佢現時的股價低過供股價,根本唔會去供股,因為現價買入會更加平。所以,只要不理佢就得。

2)這股的投資價值中等,但又不是完全無價值,如果你本身持貨不算太多,繼續持有都可以,因為佢現時的估值偏平。

(對照龔成信箱:Q6959)

8.高息股

你好!我係你的讀者,你頭三本作品都拜讀過,獲益良多!

想請問揀高息股策略,好似5月鐘錶珠寶名貴禮品銷貨價值按年升23.8%,好似東方錶行(398)最近派息頗高,行業數據同回報都比較正面,係咪都值得投資呢?請指教

 

龔成老師:

東方表行集團(0398)近年的盈利有所改善,相信香港零售市道保持向好,同埋自由行不差,都會對佢有利,佢派息有成10%,的確吸引,但這股不是無風險的。

因為佢太受零售市道影響,當好景時,佢有條件派高息,但之前幾年,市道較一般時,佢的股息只是今次所派的10分1。

我地投資收息股,一定要用長期的角度分析,不能只貪一次高息,所以要選一些業務及派息較穩定的,同時不會太著重短期數據。

這股業務波動派息波動,以收息股來說,其實不合格。

(對照龔成信箱:Q6960)

9.利息成本

龔sir,你好,我想問「利息成本」,年報邊度搵?(其實我睇緊隻大家樂)

 

龔成老師:

一般來講,佢損益表會寫「利息」、「融資」、「財務費用」等字眼,有時你要在附註裡找。當然,有d企業可能無利息支出,所以你要睇翻佢資產負債表。

大家樂(0341)就是無利息支出的,所以你睇唔到,你在損益表見唔到呢個項目,而在年報中附註25,支出分類的一項,同樣找不到。若你再分析資產負債表,會發現佢負債好少,即是無利息支出都不出奇。同埋你到財經網站睇下佢的「利息盈利率 (X)」,會見唔到數字,即是無這方面的支出。

(對照龔成信箱:Q6961)

10.長線投資

老師你好, 依家38歲, 投資新手, 現有大概10萬儲蓄可用作投資, 想每月供$3000(盈富2800), $1000 (煤氣 0003), $1000 (比亞迪1211), 請問這組合可以嗎?

還有其他更好的意見嗎?另外, 其實幾耐才算長線投資? Thx

 

龔成老師:

對於初階投資者來說,月供股票是十分適合的,你38歲,仍然有增長力,所以在財富分配上,可以集中在平穩增值股,再加小小在潛力股。

所以,你上述的分配模式是適合你的,基本上已經可以開始進行,當中所選的都是有質素的股票,長期不斷月供就得。

通常我地月供股票,都起碼供3年,如果可以的話,愈長愈好。其實這是一個累積財富的過程,可以一直進行,然後到了有相當的財富後,就可以再進行資產配置,轉到較為收息類的資產項,享受當中的被動收入,然後財務自由。

(對照龔成信箱:Q6962)

延伸閱讀:

投資初哥較少時間留意股市 月儲$6,000 最好的投資策略係⋯⋯