同事互相自爆人工有著數 然後老細加我2,000蚊｜Purple弟弟｜職場制勝

同事問我人工幾多？

有一日同一個職位嘅小明問我：「你人工幾多？」

「你講先！」
「我12,000。」
「我15,000。」

事情過後無耐，小明同我講，佢成功叫到老細加人工俾佢，雖然得14,000但都叫加咗！

當然佢表明無用我人工去逼老細，只係知道自己可以要價更高。

從果陣開始，我就諗，其實人工保密根本唔係維護緊打工仔，而係高層同老細。

自爆人工百利而無一害

首先你叫我諗自爆人工係打工仔層面有咩壞處，對唔住我真係諗唔到。反而好處就一大堆：

1.知道同職位人工水平，覺得自己相比下人工偏低可以去爭取，唔加俾你亦即老細覺得你唔值，咁起碼都可以早走早著，搵一個欣賞你嘅上司，加就圓滿結局，皆大歡喜。

2.如果你係同職級中，人工較高嘅一個，可能你經驗比其他人多，亦可能上司覺得你做到嘢，亦係一件開心事！

不過最重要係清楚你自己想要幾多，同自己覺得自己值幾多，唔好自滿。

可能你會話，合約講明唔可以爆人工！

但合約係邊個訂？勞方定資方？

如果你有以下疑慮，我可以話比你聽其實無必要：

1.同事周圍講

同事同圍講係佢無品，當然唔排除有人覺得你憑咩高人工過佢而唔妥你，但只係佢地低能！

你人工高過佢，佢唔妥係應該搵老細傾加人工而唔係遷怒於你。

如果佢夠膽死話邊個邊個憑咩咁高人工過我，你死口唔認有自爆，除非佢有錄音拍片，否則你都係不敗之地，仲可以反咬佢侵犯你私隱，相信正常人都唔會咁傻豬。

2.人人都覺得自己Underpaid

呢個Point係最現實但又最白痴嘅諗法，香港樓價夠癲，一樣有人買有人賣！人人都覺自己Underpaid又如何？

決定你人工多與少嘅依然係你老細，所以最終只會係老細心目中真係有價值嘅人上訴自己Underpaid先有成果。

所以人工透明，對一般打工仔嚟講係維護緊我地，起碼唔會俾人矇在鼓裡！

同一份工，幾個同事經驗、年資、行動力相約，但你唔出聲，同事就日日呻辛苦唔加人工就走。

結果老細見你好似安於現狀又唔搞事，咪加人工俾你個麻煩同事，你會覺得合理？

人工透明講到尾只會影響高層同老細，高層被爆人工，只要佢工作唔認真，所有嘢都推比下面做，佢到時就一身蟻。

老細最驚就係團結

對老細嚟講，人工透明咪個個都會調整人工，呃唔到啲溫馴小綿羊！

所以老細最驚就係團結，所以你見香港都冇乜工會，就係想你地成盤散沙，任佢擺布！

所以我係到呼籲，打工仔們不妨有技巧咁一齊唔覺意「爆響口」，一時口快，Sorry Sorry！