80後求穩健租合 $100萬儲蓄可分兩類投資 | 龔成信箱

80後求穩健租合 $100萬儲蓄可分兩類投資 | 龔成信箱

【穩健租合】今日龔成信箱,不少讀者想為未來作打算,如何實行投資計劃,亦提及熱門的股票以及投資心態等問題,當中包括買樓、止蝕、月供股票、股票抵押、收息股,以及潛力股等提問。

撰文:龔成 |圖片:新傳媒資料庫、unsplash

1.穩健租合

龔人老師你好:
本人34歲, 月入45k 左右
有25萬月供儲起的股票 (3, 1038, 5, 823)

另外我仲有100萬現金
諗緊點用好, 應該用晒佢黎做定期存款
定係用黎入晒 reits 好 ?

本人承受風險能力不強,
只求穩健

PS 我每月可用20k 做月供, 同樣是 3,1038,5,823 這4隻

 

龔成老師:

先講你持有$100萬的運用,你34歲,其實仍有財富增長的能力,不過你本身承受風險較低,因此這部分可集中在一些穩定,而又有一定股息的股票。

你可以將其中的$50萬,投資平穩類股及收息股,例如金沙(1928)、中電(0002)、房託,當中可以佔7成為房託,建立一個組合,相信這是適合你的。餘下的就持有現金先,部分做住定期先都得。

至於每月的月供股票,由於這部分以月供模式進行,買入價得以平均,因此風險不高。你原本的供股,基本上都有質素的,可以每月繼續供這4隻。如果可以的話,建議你加多$5000供多一隻盈富(2800)。

(對照龔成信箱:Q7338)

2.收息股

又打擾。點睇滙豐?曾XX成日叫人買滙豐話高息,我對滙豐都好有港人情意結但又覺得幾波動

 

龔成老師:

滙豐(0005)的確是一隻不錯的收息股,但以整體質素來說,只屬中等。這企業的賺錢能力比過往年代差,質素有減弱情況,投資價值都有,但就未必值得太大注。

國際銀行的風險增加,大銀行成日比人罰錢,規管多左,成本又上升,銀行又無以前咁好賺。所以,這股的增長力一般,投資收下息可以。

另外,千萬不要被所謂的情意結,影響投資決定。

(對照龔成信箱:Q7317)

80後 穩健租合 儲蓄 投資
【穩健租合】圖片:新傳媒資料庫

3.熊市

同埋請問而家接近熊一嗎?

 

龔成老師:

是否進入熊市,要睇翻經濟的層面,因為股市與經濟是一體的,如果貿易戰等因素,令經濟有持續性的影響,就會進入熊市。但如果對經濟無乜影響,又或相關問題化解,都會令股市向上。

(對照龔成信箱:Q7318)

4.潛力股

龔先生你好,我手上能用的積蓄暫時只能買入一至兩隻價位不算太高的股票,請問以下的股票你認為那些增長力會較強/穩定:

萬州國際288、港燈2638、新意網1686、工商1398、莎莎178

謝謝。

 

龔成老師:

其實要睇翻你的人生階段,以及投資目標。

如果你想潛力多啲,就選新意網(1686)、莎莎(0178)。如果要平穩增值,就萬州(0288)。如果要收息,就工行(1398)、港燈(2638)。

新意網的業務相信會保持理想增長,但估值較高,因此有風險,萬州則有貿易等問題,莎莎則有自由行影響,每樣野都會有危有機的,如果你想要增長類股,可仔細分析這幾隻,睇下邊隻較適合你,以及值博率較高。

(對照龔成信箱:Q7319)

5.力世紀(0860)

你好,龔城, 有幾隻股票我想買入或者月供,想問下你意見,是否值得投資。 00860(力世紀),01361(361度), 315 (數碼通電訊), 00806(惠理集團)同埋01448 (福壽園),麻煩曬你!

 

龔成老師:

力世紀(0860)年年虧損,見唔到有投資價值。

361度(0361)質素中等,都可投資小小。

數碼通電訊(0315)有質素,但近年受價格戰影響,同時手機銷售比過往弱,都可投資,但未必值得投資太多。

惠理集團(0806)雖然都有質素,但又未去到好高。

福壽園(1448)有質素,有潛力,不過現價不平,只能小注。

如果要月供股票,一般會考慮更高質素的,如果不懂選股,可以簡單地供盈富(2800)。

(對照龔成信箱:Q7320)

6.股票抵押

SIR,想請教一下你當初係點買到第一層樓?我計黎計去都覺得我將來人工唔會過到壓力測試。係咪要靠股票抵押?
我想了解一下你係靠咩問到銀行借錢,THANKS SIR

 

龔成老師:

第一層樓對不少人來說都是困難的,但只要有左第一層,之後要換樓,又或要有第二層,就簡單得多。

我多年前用$240萬買入的,當時做8成按,因為當時樓價不高,所以我賺唔夠$20000都可以上到車,當時無抵押過任何股票的(雖然當時股票市值都有幾百萬),我只是去一般的銀行做按揭。

這不是我的心頭好物業,但作為中轉站,可以的。因為我地唔會用「人工追資產」,會用「資產追資產」。買入後,我並不是自住的,而是收租,當然,具體的方法有機會才會在股票班分享。

 

(對照龔成信箱:Q7326)

7.中煤能源(1898)

老師,我媽很早前幫我買入了4個股,為我未來作一點投資,但我見4股表現都好像不太好,都在蝕,我應該如何處理?你點睇這4隻股?

1898 中煤能源 3萬 入貨價12.32
939 建設銀行 2萬 入貨價6.98
3328 交通銀行 1萬 入貨價7.49
1398 工商銀行 2萬 入貨價6.57

暫時4隻股中只有工商升了少少,我應繼續長渣嗎?

 

龔成老師:

中煤能源(1898)質素中等,不是沒有投資價值,但最大的問題,就是你當時的買入價處估值過高的水平,如果要上翻去,好難。因為現時已經是這股的合理價。

如果你博的話,可以等國際資源價格大升時,這股都會上升,到時先賣出(但唔好預上得翻去買入價)。

至於其餘的內銀股,都有質素的,只是買入價略貴,可以持有收息。

但同一個組合太集中在銀行股,並不是好事。可能在反彈時,要睇下需唔覆要處理部分。

(對照龔成信箱:Q7322)

8.止蝕

我新手無知地all in 1810小米令到全變蟹貨,您覺得我要等到直至小米業績出來才有望翻新嗎?

由於起碼等四個多月先有業績,定係止蝕左少少先好啲,已經出現多次嚴重背離。。。。 我下次的組合打算0002,2382,1299,1810 咁樣會唔會好d?

中電,光學,保險,小米我得$60000本金,想一年翻兩倍。。長左少少,唔好意思 thank you !!!

 

龔成老師:

相信你是太急想賺錢,這是投資的大忌,你要改變心態,我地投資不是快速炒幾轉賺錢,而是一個長期的財富分配,合理的增值過程。

你全數投資一隻股,有很高的風險,之後不要做。

你打算一年翻兩倍,這是連全球最賺錢投資者巴菲特都做不到的事,你要小心這種心急賺錢的心態。

小米(1810)有潛力的,因為佢的產品的確受歡迎,同時處於增長狀態中。但估值是最大的問題,佢這刻仍是燒銀紙,同時無人知幾時先有較理想的現金流,大家都只是憑「將來價值」去推斷,因此股價一定好波動,市場估值經常處於不一的狀態。

你最好減持部分,以平衡風險,餘下的貨就一直持有。至於賣出後的現金,不要心急投資,慢慢學好投資知識,小心選股,做到企業估值,真的等到合理價先好入。如不懂,都可以分注買入,你上述所講的股票,但都不要用盡現金。

(對照龔成信箱:Q7323)

9.買樓

hi龔成,本人而家24歲,已經進行緊月供港鐵$4000、領展$4000、中電$3000、電能實業$3000、長江基建$3000、中銀香港$3000

然後每月有$28000現金儲起趁個市趺撈貨,目標30歲前買樓。想問下呢個計劃可唔可行?thanks!

 

龔成老師:

你的理財情況不錯呀,上述月供的都是有質素的股票,可以長期進行月供,分配資金適當,你不要理中短期市況,只要長期不斷進行月供就得。

至於每月儲到的現金,就持有現金先,等機會才入市。在等機會的時機,你都要多學習投資,並努力在市場上選有潛力的股票,把握機會入市。

因為你儲到的錢都不算少,只要相差幾個%的回報,都會對長遠財富造成好大影響,因此,一定要盡力學習,並多研究企業,提升投資回報率。

(對照龔成信箱:Q7324)

10.月供組合

龔sir 你好,小弟現在每月儲蓄 $10-12k

現計劃用 5-6k 月供股票 … 66, 2888, 1038, 388, 1299, 2800, 2778 … 或其他股票 … 你會建議如何分配呢?thx

 

龔成老師:

如果每月能儲$10000-$12000,用當中的$6000去做月供股票,適合的。上述你所選的都是有質素的股票,都可以長期進行月供,但如果一次過供全部,會變得好散,每隻投資的金額好少。

你可以集中供幾隻,例如盈富(2800)、港鐵(0066)、港交所(0388),每隻供$2000,這樣策略會較好。

(對照龔成信箱:Q7325)

The user will never see this