增值股

90後月供盈富想加供一隻 呢隻增值股可考慮 |龔成信箱

投資

廣告

【增值股】今日龔成信箱,不少讀者想為未來作打算,如何實行投資計劃,亦提及熱門的股票以及投資心態等問題,當中包括股市風暴、估值、月供股票、實貨型基金、居屋,以及投資方向等提問。

撰文:龔成 |圖片:新傳媒資料庫、unsplash

1.月供股票

我呢加28歲
月供股票 供2800

應該仲選邊一些股去供好呢
月供股票 應該點樣運作
供到一個時段 就停?

 

龔成老師:

以你的年齡,可以投資平穩增值股,加潛力股,例如盈富(2800)就是其中一隻平穩增值股的類別,至於潛方股,則可以考慮比亞迪(1211)。你可以以月供模式,不斷去供這些股票就得。

月供股票,通常是一個長年期的供股過程,基本上可以不斷地月供,最起碼都供3年。如果企業持續增長,咁長期去供都得,因為佢會幫你的財富保持增值。

如果是潛力股的話,可以供到去企業已成長到某狀態,增長力減慢時,就考慮停止,慢慢等收成。

(對照龔成信箱:Q7334)

2.碧桂園(2007)

龔成老師你好,請問2007,1093,6030,939同700 怎樣?現在每樣都入左少少,應如何部署?

 

龔成老師:

上述都是質素不差的股票,但有些則有風險。

碧桂園(2007)雖然業務有質素,但負債水平去到有點可怕的情況,只要不太大注都可以的。

石藥集團(1093)有質素,有潛力,但現價不平,暫時不要增持。

至於其餘就問題不大。

但要留意翻,上述不少都屬於潛力類別,如果你整個組合只有這5隻股,最好增加翻其他穩健類的股票,策略會較好,例如加入盈富(2800)。

(對照龔成信箱:Q7327)

3.居屋

龔老師… 想請教一下,居屋而家52 折,抵唔抵入市呢?

我有睇過龔老師之前啲post ,有講居屋自住價值較高,私樓比較有市場價值,而且會升值…其實我人生最後應該都會想買入私樓… 但買左今次居屋先,會唔會浪費左個錢放入居屋,應該繼續儲錢,之後買入優質股,再等機會入私樓?

但我又唔知要等到幾時樓價先會有大幅度回調…. 咁我見kai tak 同長沙灣個地理位置都幾好….. 而且政府又減左價… 但會唔會因為52 折,樓價升既時候,我無得受惠呢?我又覺得我咁儲法… 又排都未買到私樓

P.s. 小弟27 歲,股票加saving about 60 萬左右….

謝謝老師時間及回覆

 

龔成老師:

居屋的投資價值的確不大,但作為自住,可以的。雖然你最終的目的都是買入私樓,而目的是自住,咁樣可以當居屋是其中的中轉站,如果居屋的價不貴,甚至有52折,其實可以考慮的。

你買入居屋,這刻住的成本會較低,同樣可以節省到一定的支出,令可投資金額較多。

當然,我明白你上述的提問,以股票等增值模式追私樓,但這可能仍要一段時間,當中有變數,那如果這刻的居屋不貴,都可以考慮。

(對照龔成信箱:Q7328)

4.電能(0006)

龔Sir,您好!想問問6號電能實業前景,同埋不再派特別息後,是否仍值得持有?謝謝

 

龔成老師:

電能(0006)仍有投資價值的,但的確未必會再有,又或會減少特別股息。因為佢在長和系現時的定位,只是一個提供現金流給長建(1038)的作用。

電能往後只會平穩,收下股息咁,所以你要當佢只有正常的股息,是否值得投資。

(對照龔成信箱:Q7329)

5.實貨型基金

請問南方a50 和 盈富基金都是持實貨股票的?

 

龔成老師:

對呀,這兩隻都是實貨型的基金,例如盈富(2800),佢真的會持有恆指的50隻股票,並且會按比例的,所以你見佢過往的誤差率好低。

(對照龔成信箱:Q7330)

6.估值

龔sir,其實就算不會估值,在大市比較恐慌時買入,很多時都是平宜價。

咁不如等到個市跌到約19000點時先再分段買入,咪可以買在比較低位,平宜位,你認同嗎?謝謝!

 

龔成老師:

對呀。如果你上過我的股票班,當中會教買賣時機,可以分兩邊去考慮,首先是大市的冷熱,另外是企業估值,你講的就是只用大市冷熱,這都已經是一個方法。

但如果可以,當然是兩邊同時考慮,整個投資會變得更準。

另外,我地唔能夠話19000就是平,因為平貴不是只睇點數的,仲有好多因素要睇。

(對照龔成信箱:Q7331)

7.華夏健康產業(1143)

請問老師,1143如何?
買兩手約1000元可以嗎?

不過我已有11隻股票
還有隻2607。現在策略應該是增持股票,不是加另一注
是嗎?

 

龔成老師:

我地買股票,從來只會買「有質素」的股票。

華夏健康產業(1143)每手的金額唔洗$500,表面上好似好吸引,但我地絕對唔會因為買入費低就入貨,這絕對不是投資的理由!

這企業的生意不斷倒退,同埋年年虧損,根本就唔值得投資。

另外,如果你本身已有11隻股票,要好好檢視下,睇下會唔會太散太亂,若有啲無質素的股票,就要處理翻。

上海醫藥(2607)有質素的,可投資。

記住,我地要做到資產的資產,確保組合內都是有質素的股票。

(對照龔成信箱:Q7332)

8.股市風暴

成哥,有個問題一直諗唔通

揀到優質股,我地一直持有,但係當遇到好大嘅股市風暴時,幾乎所有股票都隨大市回落,其實去到果啲時候,應否先賣出所有,待跌完再重新供過?

 

龔成老師:

如果我地能確認準備有風暴,而大市有將會大跌的話,賣左先,等跌再入翻,當然是最好的。

但根據過往的經驗,好多人都以這種預期的模式運作,但最後都估錯左,以為風暴會來臨,賣晒所有股票,但卻不跌反升,最後得不償失。

你要明白,真正的風暴,是人們想都想不到的,而預期會出現的風暴,卻往往不發生。

(對照龔成信箱:Q7333)

 

9.投資方向

龔成老師,本人初投入社會 想為未來打算
想請教儲蓄和投資方向

本人為公務員 26歲 薪金約35000元 另會每年增薪約1500元
扣除家用13000元 還學費和基本開支 每月可儲15000至16000元

投資方面 買了148 42元買入了2000股 但現在價位跌了很多
另有一壽險 為富通財富100

請問股票方面 2000股 148 應如何處理?業績不錯 派息亦不算少 但股價就是升不上去

另外每月儲蓄方面 可以分那幾方面投資 定期還是月供股票較好呢? 還是應儲備多些現金?

 

龔成老師:

建滔集團(0148)質素中等,佢不是無盈利的,近年的生意與盈利都向上,但生意的增長力卻不強,市場預期佢會進一步放緩,所以雖然過往業績不差,但之後會轉弱,因此股價一直受壓。

這企業不是無質素的,加上現時的估值不高,因此可以守住先。

至於壽險,在理財中是需要的,因為理財是一個攻守兼備的過程,保險有當中的價值,但這是一些防守性工具,不用太多,只要足夠就得。

如果你現時每月可儲到$13000,可以將其中的$7000,去月供股票,以你的年齡,可以供平穩增值股,例如盈富(2800),再加小小潛力股,如比亞迪(1211)。餘下的$6000,就先持有現金,同時在這段時間好好學投資,學懂選股、企業估值、投資時機的技巧,之後就能好好運用這筆錢,將來的財富相信會有理想的增長。

(對照龔成信箱:Q7336)

10.中行(3988)

 

老師,我持有以下股票:

0717英皇 30000股($1.8買入)
3988中國銀行 20000股 ($5.6買入)

差不多最高時買入,一買就持續跌,已持有幾年,應該有何策略?

 

龔成老師:

英皇證券(0717)質素一般,佢業務較波動,風險較大,要上翻去的確不易,如果你持有太多,可以考慮在反彈時賣出一部分先,以減少風險。

至於中行(3988),這股有質素的,不用太擔心,只是你的買入價處略貴位置,而現時處合理價。你暫時持有先,收下息先,但要一下子上翻去,並不易,要耐心等待。

(對照龔成信箱:Q7337)

 

延伸閱讀:

80後求穩健租合 $100萬儲蓄可分兩類投資