診所職場事 寶豬趣聞 無賴 珍寶豬

診所職場事 【寶豬趣聞】 無賴 |珍寶豬

職場

廣告

【診所職場事】有日診所好忙~啲人多到已經唔夠位坐…

藥水樽送貨到,我哋都唔得閒點貨搬返入倉,唯有同送貨叔叔講:「就咁擺喺角落位啊,唔該晒」
我哋繼續忙,忙忙吓聽到出面有把女聲講『拎幾個用OK呀可?』
於是望望,眼前有位太太自己開咗箱藥水樽…

撰文:珍寶豬
我立即出聲阻止:「太太,你做咩呀?」
佢手拎住兩個藥水樽:「我想拎幾個呀,有冇啲大啲呀?」
我:「你唔可以攞㗎~你做咩自己拆箱呀~你要嘅問我呀嘛」
佢仍然唔肯放低手上嘅樽:「我冇嘢做嘛,見啱用呀」
你對手太得閒冇嘢做嘅可以撩鼻屎呀~你開我啲箱嚟做乜啫~
我:「你唔好搞啦,啲藥水樽係要嚟裝藥水俾病人㗎,個個掂過嘅唔衛生㗎」

佢:「咁我可唔可以攞幾個呀?有冇啲大啲呀?吓?」
我:「你掂咗嘅就攞啦,不過我哋會收返你錢㗎」
佢掉都掉唔切,藥水樽跌喺地上…
佢:「我唔要啦」
我:「你唔要都唔駛掉佢落地嘅~」
佢:「唔關我事㗎!」
啊~咁肯定係啲藥水樽自己跳崖啦。
我冇出聲,繼續去忙。
佢自己行埋嚟:「姑娘,你一陣會唔會收我錢㗎?我掂咗幾下咋」
我:「我一陣問醫生啦,如果要收嘅都好正常啊,因為啲藥水樽我哋都要錢訂返嚟㗎嘛~」
佢:「我唔知要錢㗎,我以為可以攞,你擺喺出面嘛」
我:「部水機夠係擺喺出面,部電視都係喺出面呀,你唔拎嘅?」

佢:「姑娘,你唔好咁晦氣無賴好冇?我點知你啲嘢唔攞得喎,唔攞得嘅擺返入去嘛」
我都廢事出聲。明明無賴嗰個係你…

延伸閱讀:

診所職場事 【寶豬趣聞】 睇醫生唔俾錢

 

 

【診所職場事】上回講到有位太太自稱自己死咗,仲係俾佢老公害死嘅。日光日白,我真係好想走先。不過睇戲講,你越走你越驚,佢會越落力嚇死你…
我唯有繼續若無其事:「你俾你老公害死?咁我有咩可以做呀?」
佢:「你梗係同我九佢啦!」
我用前文後理推算大法,佢個『九』會唔會係『搞』呢?

撰文:珍寶豬
我:「你要我幫你搞佢呀?我做唔到呀太太~」
佢又拍枱:「九咩呀?唔係九呀,係九呀」
同樣冇分別。
我:「唔係搞?咁係咩啊~我聽得唔係好清楚…或者嗰個九字有冇啲咩類似意思嘅字呀?」
佢又諗:「投訴?律師?」

我覺得自己好似同緊人玩大電視估字咁:「咁個九….告?你要告你老公?」
佢BLING BLING眼:「係呀!就係九佢啦!」
我:「不如咁啦,我幫你報警啦,殺人填命呢啲嘢~我真係幫唔到」
佢:「咩嘢殺人填命呀」
我:「你老公殺咗你,你要告你老公呀嘛?」
佢:「佢都冇殺到我,我要你同我九佢咋嘛」
我:「即係你未死?」
佢:「我死咗點會喺度呀?姑娘,你係咪有事呀?」
哇,我成個舒暢晒呀。我幾驚你突然發爛渣變樣嚇我呀!
我:「哦!原來你未死嘅!真係嚇到我呀,你頭先係咁話你老公害死你㗎嘛?」
佢:「佢咁臭我俾佢HIGH死啦!我個鼻而家有事一定係因為佢!你同我九佢啱㗎啦!九佢俾返賠償金呀!」

我:「嗰個唔係你老公嚟咩?你告佢?你個鼻有咩事呀?一係我同你登記睇醫生啦」
佢:「錢重要過老公呀!我個鼻呀,你望吓你望吓,有鼻水呀,成朝㗎啦」
…流鼻水都要告人拎錢啊?
我:「我同你登記先啦,俾醫生睇咗咩事先啦,可能傷風啫」
佢:「好呀!佢臭到我傷風囉!同我九佢!」

好啦好啦,一陣叫醫生寫返張收據俾你,你自己去問老公拎錢啦~

延伸閱讀:

診所職場事 【寶豬趣聞】 牙醫

【診所職場事】有日有位太太嚟到診所~
佢行埋嚟用唔咸唔淡嘅廣東話同我講:「姑娘,你可唔可以幫我九我老公呀?」
我一頭問題:「救你老公?你老公咩事呀?佢喺邊呀?」
佢:「唔係九呀,係九~~(佢拉長尾音)」

撰文:珍寶豬
…你拉長完尾音都同樣係九啊….
我:「咁呀…你一係寫俾我呀?」
佢拎起筆眼仔碌咗兩碌,哄個頭埋嚟問我:「九點寫呀?我一時唔記得」
啊啊啊啊~
我:「唔係救呀?拯救個救喎?你個九係咩九呀?」
佢:「九佢呀」
…可能我領悟力太低~我真係悟唔出個正字呀~醫生,我想返去讀多幾年書,呢度可唔可以交俾你?

我:「九佢啲咩呀?」
佢:「九佢臭呀!HIGH死我啦!」
請問這是咸濕故事的發展路向嗎?我唔想知你有幾HIGH呀大佬~
我:「臭?邊度臭呀?你老公臭你又點解好high呀?你對臭味有濃厚興趣?」
佢死魚眼望住我:「姑娘你講緊乜呀?」
我自己都忍唔住笑:「其實我都唔係好知自己講緊乜,我都係估估吓~如果你可以寫到俾我睇應該有幫助…」
佢又拎起筆,諗咗陣,動起筆:「嗱」
我望住白紙上,一個好細嘅字…『死』,嗯~我想拍拍你膊頭鼓勵你,我知你盡力了。
我:「哦?死呀~邊個死咗呀?」
佢:「我呀!」
嗯,日光日白真猛鬼,請保持鎮定,只要唔表現出驚慌樣,佢都耐我唔何~戲教嘅!

我:「嗯~你死咗呀?你知唔知自己而家喺邊呀?你會唔會去錯咗地方呀?」
佢望望四周:「診所呀你係?」
我:「係呀,咁你嚟診所係咪睇醫生呀?」
佢拍枱表現出好焦急嘅樣:「我同你講咗好耐啦!你究竟明唔明我講緊乜呀?我俾我老公HIGH死啦!」
啊!HIGH!普通話:害!害死!
這鬼真猛啊。

 

延伸閱讀:

診所職場事【寶豬趣聞】成為有錢人 下回