返工填表寫Report 完全係為寫而寫 上司直接嚟睇我做嘢仲實際|職場制勝

返工填表寫Report 完全係為寫而寫 上司直接嚟睇我做嘢仲實際|職場制勝

填表職場制勝】今日我朋友同我訴苦,話佢考車唔合格!咁我問佢衰啲咩?佢話考官剔咗佢個軚盤使用不當「嚴重」,但明明成個過程都好順利,友人不停重覆:「佢根本特登唔俾我合格,我知佢哋一日唔可以合格太多人,唔係又要寫Report呢樣嗰樣……」雖然我唔知真實情況係點,但每次有政府部門疏忽,都會有唔少人猜測佢哋擺明唔想填表「寫Report」,多一事不如小一事。最慘嘅係依家唔止政府,相信唔少人返工都要花時間填表,仲辛苦過原本要做嘅工作

撰文:Purple弟弟 | 圖片:電視截圖、unsplash

低層返工都要寫Report

以前講起Proposal、Report呢啲字,就覺得都應該有返咁上下職級先會做呢啲!

但依家連呢啲嘢都已經去到唔少低層打工仔返工都做緊,而佢哋嘅「Report」可能係每日自己做咗啲咩,又或者每星期檢討上星期有咩做得好,有咩要改善。

聽落好似好小事,難就難在你一個成年人,但返工就成個小學生咁,日日係到看「表」作故事,始終都會有些少反感。

職場制勝 辦公室 員工 返工 公司 工作 政府 填表 寫報告 寫Report
以前講起Proposal、Report呢啲字,就覺得都應該有返咁上下職級先會做。圖片:電視截圖

複雜到唔知點寫

以我自己為例,返工就知,依家有唔少「Report」,其實公司都有固定格式,我都係跟返佢個表填內容落去!

但我真係好想知邊個部門整呢份表出嚟,成日作埋啲懶系專業,即係望落全部都係你識嘅中文字,拚埋你就完全唔明嗰種!

「活動預算」,明白明白,呢個識填!

職場制勝 辦公室 員工 返工 公司 工作 政府 填表 寫報告 寫Report
依家有唔少「Report」,其實公司都有固定格式,我都係跟返佢個表填內容落去!圖片:電視截圖

「舉辦活動原因」,唔通寫公司一定要搞咩,不過都明佢講咩,可以作個答案,但之後就開始嚟料啦。

「如何形象化公司理念」無諗過喎,你哋批准我搞夠唔夠形象化?

「預計支出:人工、場務、拍攝……(下略超過20項)」

你開咁多欄比我做乜,我只係想個活動請2個helper,使唔使填咁大份嘢?

職場制勝 辦公室 員工 返工 公司 工作 政府 填表 寫報告 寫Report
份Report望落全部都係你識嘅中文字,拚埋你就完全唔明嗰種!圖片:電視截圖

無用先最慘

填一堆表,一堆「Report」都算,最慘係根本無用途,完全係為寫而寫!

只要你跑到數做得好,邊鬼個理你啲「Report」。

相反,有時你想要人工、設備,要寫「Report」等公司批都合理!

但使唔使整到個表或者Report咁鬼複雜,老實講,你咪唔好買、唔好請人,反正返工做唔曬啲嘢都係公司損失,可唔可以簡單少少?

職場制勝 辦公室 員工 返工 公司 工作 政府 填表 寫報告 寫Report
填一堆表,一堆「Report」都算,最慘係根本無用途,完全係為寫而寫!圖片:unsplash

有時填填下,心諗又要我總結自己今個星期做咗啲咩!我真係唔明,上司你日日同我共事,不如你得閒,自己行埋嚟睇下我返工做緊咩。

總好過睇我每星期作嘅Report,反正期期內容大致上都係講自己十項全能、忙到甩轆!

十項全能可能吹大咗,不過忙到甩轆係真嘅,要成日處理非主要工作嘅繁瑣事,例如填表!

職場制勝 辦公室 員工 返工 公司 工作 政府 填表 寫報告 寫Report
上司你日日同我共事,不如你得閒,自己行埋嚟睇下我返工做緊咩。圖片:電視截圖

 

 

相關文章