診所職場事 【寶豬趣聞】沽名釣譽   |珍寶豬

診所職場事 【寶豬趣聞】沽名釣譽 |珍寶豬

【診所職場事】有日有位小姐嚟到診所。

佢行埋嚟問我:「姑娘,你哋有冇興趣參加我哋嘅社區計劃?」

我望望自己周圍,冇呀,我哋仲係診所嚟喎,因咩事你會入嚟呀?

撰文:珍寶豬

我嘗試了解俾佢知道社區有幾溫暖:「請問有咩幫到你呀小姐?」

佢:「參加社區計劃呀」

我:「我知呀,你有冇單張嗰啲俾我睇睇呀?你係代表咩機構呀?」

佢:「我自己一個呀,就咁口述得唔得呀?」

啊!One man brand!勁喎~

我:「哦?好呀…你講嚟聽吓?」

佢:「個計劃呢…就好社區嘅,首先就會試行咗先,行得好就會擴大啲做,係咁囉」

你有冇講過嘢?

我:「咁內容係咩呀?我哋診所參加嚟係做啲咩呀?」

佢:「哦,係呀,社區係大家㗎嘛,你哋可以資助我睇醫生或者免費俾我睇囉」

送客。

我:「咁呀~我哋唔會參加㗎啦,因為我哋本身都做緊長者優惠㗎啦」

佢表情失望:「點解唔參加我呢個呀?係咪因為我係個平凡人呀?冇得俾你哋上報呀?我識啲記者㗎,你哋要沽名釣譽吓我都得㗎」

你係咪誤解咗『沽名釣譽』係一個正面嘅字眼呀?醫生唔駛沽㗎啦,啲沽名釣譽嘢留俾我啦,我鍾意呀~

我:「我哋診所呀醫生呢都唔可以賣廣告㗎,所以唔駛啦~」

佢:「你唔收我錢就唔係廣告啦」

我:「我都唔係好肯定個確實內容係咩,不過低調就一定冇死錯人啦」

佢:「啊,我明啦,你意思係冇得出位,你就唔做呀?」

你鍾意咁理解都冇所謂嘅,反正你走就好啦~

我微笑冇出聲。

佢望望我,再拎張醫生卡片就離開診所了。

延伸閱讀:

診所職場事 【寶豬趣聞】 無賴

診所職場事 寶豬趣聞 無賴 珍寶豬

診所職場事 【寶豬趣聞】 兄弟醫生

診所職場事 寶豬趣聞 兄弟醫生 珍寶豬

【診所職場事】電話響起,我:「喂?你好~乜乜診所」

佢:「管理處電話呀?」

我:「我哋唔係管理處呀,我哋診所嚟㗎」

佢:「咁我屋企管理處電話幾號呀?一係你飛我過去啦,我係打去管理處㗎」

撰文:珍寶豬

條條大路通羅馬咁喎你,平時去旅行梗係由北極行到去南極啦你~

我:「唔好意思小姐,我哋係診所嚟㗎,我唔知你住嗰度啲嘢㗎~」

佢:「我哋大屋苑嚟㗎喎!」

大?睇過有幾大?

我:「哦?係呀?你自己打啦,我哋診所嚟幫唔到你㗎」

我準備收線,聽到佢大嗌『喂喂喂喂?』,我又拎返起電話:「請問仲有咩幫到你呀小姐?」

佢:「我要投訴埋你呀」

我:「哦,好呀,你搵咗管理處先啦」

佢:「你個電話肯定係同管理處一樣呀!如果唔係我點會打到嚟呀?」

除咗係愛係緣份,我冇另一個解釋了。

我:「但係我哋唔係管理處,係診所,你可以睇清楚啲個電話先再打~」

佢:「我點知你係唔係管理處嘅人扮診所呀?」

哎呀~俾你發現咗添,冇辦法啦,我唯有殺你滅口啦~

我:「小姐你不如收線後再打過啦~可能你打錯電話啦」

佢:「得嗰八個數字我點會打錯呀?你當我白痴㗎?白痴先會打錯嘅啫!」

我:「咁又唔一定係白痴先會打錯電話嘅,你再試吓打呀,你而家收線,之後再慢慢撳多次個電話」

佢:「我肯定一陣又會係你聽」

嘟。收線後~

我再接唔到小姐嘅電話了。睇嚟佢頭先真係白痴…

延伸閱讀:

診所職場事【寶豬趣聞】被HIGH死的太太 上集

診所職場事 寶豬趣聞 被HIGH死的太太 珍寶豬

診所職場事【寶豬趣聞】被HIGH死的太太 下集

診所職場事 寶豬趣聞 被HIGH死的太太 下集 珍寶豬

【診所職場事】有日有位少女嚟到診所~

佢推完一次門入嚟,唔知做咩又出返去,再入過嚟。

佢手拎住自拍神棍咁嘅嘢行埋嚟登記處:「姑娘,我唔舒服呀」

撰文:珍寶豬

佢雖然係同我講嘢,但係佢對眼係望住自拍神棍上嘅電話鏡頭…

我望望佢:「麻煩你俾身分證明文件我登記啊~」

佢突然擰轉身,將我加入埋佢嘅背景,再望住電話講:「原來睇醫生要身分證呀?各位睇醫生記得帶身分證啦」

咦?直播緊呀?咦?我上鏡喎?咦?關我咩事呀?

我嘗試叫停小姐嘅拍攝:「唔好意思呀小姐,診所內麻煩你唔好錄影呀,咁樣會影響到其他人㗎」

佢面露不悅之色,再轉返身用坐喺度嘅病人成為背景:「嚟睇醫生有咩怕俾人知喎,香港冇肖像權㗎,唔好以為我後生就咩都唔識呀,各位你哋話係咪?」

我:「麻煩你停咗佢啦~你要睇醫生嘅就登記啊」

佢望望我,再望住電話講:「呢度個阿姐好煩,咁我哋晏啲再見啦,我睇醫生啦,byebye」

佢收起電話,口黑面黑咁行埋嚟:「登記呀」

我:「好呀,身分證呀」

佢口噏噏翻住白眼講:「係係係,知啦阿姐」

我:「妹妹,姨姨唔係想阻你搵食呀,姨姨為你好咋,你咁樣嘅唔通入到醫生房都要繼續影住俾人睇呀?登記嗰時唔通又影住張身分證俾人睇?唔係咩都要俾人睇㗎~你自己都要有私隱㗎,人哋嚟睇醫生都有㗎,知唔知呀?」

佢繼續翻白眼:「阿姐,你收嗲啦,做你嘅嘢啦」

我真係唔識同而家啲後生溝通了。

 

延伸閱讀:

診所職場事【寶豬趣聞】身分證下集