靠投資風險較高股票3年儲$100萬 呢個習慣 隨時成致命傷|龔成信箱

靠投資風險較高股票3年儲$100萬 呢個習慣 隨時成致命傷|龔成信箱

【股票】今日龔成信箱,不少讀者想為未來作打算,如何實行投資計劃,亦提及熱門的股票以及投資心態等問題,當中包括優質股、潛力股 、月供股票、電動車行業 、醫藥股,以及ETF等提問。

撰文:龔成 |圖片:新傳媒資料庫、unsplash

1.投資風險

你好。小妹31歲,每個月大概月入二萬五至三萬。

本應認為自己能夠承受較高風險,所以都投資在風險有點高的股票。

買左隻8606,平均價0.4025 有80000股,知道佢係新股其實唔應該投資,加上現價就已經蝕左4000幾覺得好肉痛,知道自己應該要平衡返心理質素,但都想問下之後建議我應該點做好?

其實我見佢業績雖然上半年有虧損,但我睇返佢個報告係因為一次性上市用了500多萬,又沒有負債,收入雖然不算很高,但都是平穩增長,唔知道我有冇解讀錯誤?

本人持

00001 , 一手 $83.2買入(打算長線)

02628, 二手$19.16, 買入(打算長線)

08606,八手$0.4025 買入 , (上面已問)

00788,十手$1.26 (抽新股) ,(5G其實我認為是有潛質的,不過短期內因為未普及,股價應不會太大波動,如果我希望進取一點是否應該先沽,然後買其他股票增值?)

01810,十手$16.42 買入,之前睇過你facebook video,認為佢還未有潛質值得購入,所以我見他低過招股價才入手少少)

另外其實我都好鍾意港鐵,中電同領展,但覺得現在價錢過高,和只屬平穩增長,希望可以在呢三年內盡量增持現金先,三年內儲到100萬,往後日子等手上多?現金先在分段購入平衡番風險,唔知道咁樣諗岩唔岩。

另外小妹仲持有大概15萬現金,唔知你認為我應該點樣做先可以,呢個組合是否太高風險?如果我仲可以每個月儲八千至一萬蚊。

最後想問如果我唔係月供股票,而係唔同價錢買入而且又買唔同嘅股數,請問我點樣計自己平均買入價呢?

真係唔該晒你嘅意見!!唔好意思麻煩左你咁多!!!!

 

龔成老師:

倢冠控股(8006)這類新股,我一向有保留,再加上創業版的股票,我就更保留。佢係香港資訊科技服務供應商,客戶包括政府及法定機構、本地及跨國企業,涵蓋銀行、金融及保險、運輸及物流、零售、分銷及貿易以及TMT(技術、媒體及電信)等行業。

從業務上,應該穩定同有錢賺的,而佢近期的虧損的確由一次性虧損產生。所以,這股又未到零投資價值。不過,佢過往只有幾百萬的盈利,然後就是計一計市值,已經唔計股價最高位,單計現時已比高位跌左7成,佢現時市值都有成$2億,點睇都貴。

這股最好還是賣出,最多是等反彈時賣。

另外就是投資組合方面,基本上,所持有的股票不算太差,但抽新股的習慣要改,企業上市,往往會以貴價賣比投資者的,這是自然的事,所以我一向建議投資者,買入上市年期2年以上的股票。

另外,你應多學習選股同企業估值,這部分是你的致命傷,如果你要3年內有$100萬,這部分的根基一定要打好。

你現時的$15萬,暫時不要心急去用,等大市回落先再入貨。

而每月儲到的$1萬,你可以分注入貨,就算唔月供,只要每儲到咁上下,分注得好,買入優質股就得。

如果你要計平均買入價,只要計你買入的總股數,以及總投資金額,兩者相除就得。

(對照龔成信箱:Q7801)

2.ETF

老師請教你,本人37歲,任職銀行現時月入6萬多,現持有現金30萬。保險每年支出約10萬(包括父母及自己),與父母同住,沒有持有物業沒有負債。

每月扣除支出可儲約4萬5千,股票投資方面只可以買盈富(2800)(因本人工作方面會接觸到公司資料,買賣單一公司股票需要審批,因此不太可行),想問除月供盈富股票外可作甚麼投資?

每月4萬5千元可怎樣分配投資分配?

謝謝!

 

龔成老師:

你都可以透過投資不同的ETF,去作出一個適當的分配,例如南方A50(2822),即是間接投資大陸股,領航標普五百(3140)就是追蹤標普500指數之表現。未來恒生高股息率(3110),就是投資在香港股票中,較高息的一類,這是一個收息股的組合基金。

我相信你以月供模式投資這些,都能建立一個穩健的財富組合。

其實,就算你只投資在盈富(2800),基本上都能有分散風險的能力,同時能令財富保持增長。

你可以將每月的$25000,去做月供ETF,餘下的就儲現金,這部分會把握大市下跌時,才出手投資上述ETF的。(對照龔成信箱:Q7799)

3.工行(1398)

老師,如果有30萬939,除月供外,應該分多少次,相隔多久分段入?

 

龔成老師:

首先提翻,工行(1398)是有質表的股票,但都不應過份集中。

如果用$30萬買入工行的話,可以分6次,每次$$5萬,你預每隔3個月入一次,分注過程要一兩年,這可以令你在不同的高位低都有貨,減少一次過在高位買入的風險。(對照龔成信箱:Q7800)

投資風險 股票 習慣 致命傷 龔成信箱
【股票】圖片: unsplash

4.盈富(2800)

老師,想請教你月供股票,之前你提議我供(2800), 現我打算供$15,000,如果供$10,000,( 2800)盈富基金,另$5,000供(2380)中國電力,你意見如何?因為我見2380有8.47息率,謝謝你

 

龔成老師:

月供股票是很好的累積財富方法,你每月供$15000可以,其中$10000供盈富(2800)無問題。

至於中國電力(2380),雖然有一定的質素,但唔值得供太多,你供$2000、$3000已適合。這股的股息率雖然好高,但見佢盈利有下跌的情況,質素略有減弱。

而股息建基於企業盈利,當佢之後的盈利再弱,股息將會下跌,你之後收到的股息,唔會好似之前咁多,所以,這股現時只是合理,不是特別吸引。未必值得你供咁多。

(對照龔成信箱:Q7802)

5.舜宇光學科技(2382)

龔Sir, 現在2382 的價格是否可以趁低吸納,謝謝你!

 

龔成老師:

舜宇光學科技(2382)有一定的質素,這股雖然有投資價值,但就算現價比高位跌左唔少,這刻仍然有少少貴。

因為「高不等如貴」,「低不等如平」,計算企業價值要作另一角度的,這股這刻仍然不平。投資是可以,但不是探貨,只是分注買入。同埋仍中短期仍會較弱,要耐心先有收成。

(對照龔成信箱:Q7803)

6.醫藥股

龔sir你好,近期大市有所回落,我打算增加在股票市場的投資,由於在組合中並無醫藥股,想加入一隻中長線(3年以上)持有。

考慮1177或2186,那一隻中長線比較具增長潛力?以現價,1177的PE比2186高一倍有多,是否2186比較值得投資?

 

龔成老師:

中國生物製藥(1177)與綠葉製藥(2186)都是有質素的股票,以潛力及企業的賺錢能力計,中生製藥會較好,所以,你見佢市盈率較高,也是合理的。

因為以企業的業務及長遠價值計,中生製藥的增長會較快,只是你這刻的買入價略貴,令回報率減。

以值博率計,這刻投資綠葉會較好,但如果等到中生製藥回落才投資的話,長遠回報會較高。

(對照龔成信箱:Q7804)

 

7.電動車行業

多謝老師解答∼∼其實我個人亦比較睇好電動車行業 你會建議我將來投資組合中把其中一個換tesla嗎

 

龔成老師:

Tesla是不錯的潛力股,你加到組合內可以的。電動車長遠的發展正面,在全球的市佔率中,佢同比亞迪(1211)是頭兩位,當之後市場不斷發展,這兩間行先的企業,一定有優勢。

但要留意,這些新興行業變化較大,所以股價較波動,加上佢未有正式的正現金流,只靠市場各途俓去集資,風險會較大。所以你要控制投資注碼。

(對照龔成信箱:Q7805)

 

8.港鐵(0066)

老師,我月供港鐵好定中銀好,但港鐵又好多負面野

 

龔成老師:

港鐵(0066)會較好。

就算佢有不利事件,雖然會扣分,但最核心的本質不變。

港鐵上年賺$160億,就算扣除物業重估,都有過百億,當中包括了鐵路經營部分,以及物業的發展、物業的租金收入。基本上,每年都過百億的。

你再細心分析佢業務模式及收入來源,鐵路部分,無論佢有咩事故,高層點變,你會唔會唔搭港鐵?問心,絕大部分人都會搭。

另外就是物業發展部分,完全見唔到有影響。

再睇物業收租部分,會唔會因為不利事件,而收少左租?唔會。

所以,唔會對港鐵有核心影響。不過,就有機會對成本等略有影響,因為將來可能要提高安全及監管方面的工作,成本會略增加,另外,如果影響通車日期,收入亦會影響。

所以,這些負面事只會對港鐵有好少影響。

當你見到咁大件事,都無影響到港鐵的核心盈利時,你就知道佢有幾優質,因為若換做其他企業,肯定會對盈利大受打擊,從而令股價大跌。

(對照龔成信箱:Q7806)

 

9.月供比例

你好,龔Sir,想問下你,月供比例有冇問題,一個月6000月供股票

盈富基金-$3000

港鐵. – $1500

比亞迪,$1500

需唔需要更改比例

 

龔成老師:

當中的股票都是優質股,都可以做月供,而比例亦是適合的,相信長遠有一定的增長能力。

你可以照供,最緊要是保持月供,不要理中短期的股價波動,長期進行就得。

(對照龔成信箱:Q7807)

 

10.優質股

您好,抱歉想問一個可能較愚蠢的問題,您經常提及過如果持有優質股票,假設企業性質持續長遠都屬正面,其實可以永遠持有,因為現金不等於財富,資產才是。

但如果我一日不出售那些股票,其實我一日都沒有現金而只擁有那些在電腦裡不斷上上落落的數字。。。。。這方面有些困惑,求指教一下,謝謝!

 

龔成老師:

你不是擁有電腦上的數字,你是擁有「企業的股權」,你持有企業的一部分。

你想象一下,假設自己開了一間公司,然後不斷有人同你報價話想買起你的公司,無論佢報幾多,都唔會影響你公司的運作、唔會影響公司的價值,只會對你有心理上的影響。就算你最後唔賣,你仍然擁有這間公司,而這公司就是你的財富,你唔需要賣出才算擁有財富的。

如果你有分析過有錢人的財富模式,你見佢地都是創造後永遠擁有,買入股票後永遠擁有,不會要求「賣出才是賺的」。

(對照龔成信箱:Q7808)

免責聲明:本專頁刊載的所有投資分析技巧,只可作參考用途。市場瞬息萬變,讀者在作出投資決定前理應審慎,並主動掌握市場最新狀況。若不幸招致任何損失,概與本刊及相關作者無關。而本集團旗下網站或社交平台的網誌內容及觀點,僅屬筆者個人意見,與新傳媒立場無關。本集團旗下網站對因上述人士張貼之資訊內容所帶來之損失或損害概不負責。