診所職場事 【寶豬趣聞】意外保險 下|珍寶豬

診所職場事 【寶豬趣聞】意外保險 下|珍寶豬

【診所職場事】上回講到先生諗住靠份意外保險扭傷腳唔駛憂,打算靠咁樣去唔做嘢一年半載…

幾日後,佢又再返嚟。

佢嬲到一嘢拍份表落枱:「又係你呀!你唔好彩呀!又俾我見到你!」

撰文:珍寶豬

我:「請問咩事呢先生?」

佢:「你點填份表呀?又話識填?你填咗乜嘢呀?」

我:「醫生係依事實填啊」

佢:「咩嘢冇進行任何治療呀?」

我:「醫生的確係冇提供任何治療俾你啊,你唔要藥嘛」

佢:「呢個都唔係重點!你有咩可能寫我淨係扭傷呀?」

你係扭親呀嘛,唔通寫你甩骨呀?

我:「你扭傷寫扭傷有咩問題呢?」

佢:「你醒啲啦!寫嘢梗係誇大嚟寫㗎啦,基本嘢嚟㗎!而家份表寫到咁,你同我再填過呀!」

我:「先生,醫生係根據你嗰日嘅情況嚟寫,唔會再改㗎啦~」

佢:「我唔駛加呀,你加重料落去啦」

我:「唔會呀,咁樣係虛假文書啊,犯法㗎~」

佢:「我唔怕咩犯法呀,喺香港係冇得守規矩㗎,你唔走精面就做死自己,我唔怕犯法㗎」

我:「醫生係唔做犯法嘢嘅,佢會被釘牌啊~」

佢:「釘牌有咩好驚啫」

我:「釘牌就冇得做醫生,醫生會唔會為咗你而冇咗個專業資格啊?佢個專業資格值幾錢,一係你自己入去問醫生啦」

佢:「唔係三百五咩?」

三你個死人頭。

我:「三百五係誠實價,如果你要醫生幫你填假嘢上去,我諗係冇可能㗎啦,付出太多啦~」

佢:「咁我唔要份表啦,份表俾你啦俾你啦,你俾返三百五我」

我:「填咗嘅嘢都唔會退」

佢呆咗望住我:「咁㗎咩?」

堅定的我點頭:「係」

佢絕望的離開診所:「早知我都努力做醫生啦,咁搵人老襯都合法」

延伸閱讀:

診所職場事 【寶豬趣聞】 無賴

診所職場事 寶豬趣聞 無賴 珍寶豬

診所職場事 【寶豬趣聞】 兄弟醫生

診所職場事 寶豬趣聞 兄弟醫生 珍寶豬

【診所職場事】有日一位先生嚟到診所。

佢拎住份文件嚟登記處問我:「係咪填得呀?」

我望望係意外保:「可以呀,填表費會係三百五十蚊,如果有藥開嘅會再另收費~麻煩你身分證明文件呀」

撰文:珍寶豬

佢:「你肯定填得掂呀?填得掂俾幾舊水你賺我冇所謂呀」

我:「填我哋就一定填到嘅,只係先生你受傷嘅情況同保險條款上係咪符合,你就要問返你嘅保險經紀」

佢:「佢話填咗就得啦」

我:「哦~咁麻煩你俾身分證明文件我呀」

登記完,睇埋醫生,我出藥時:「份表醫生已經同你填好咗,係扭傷嘅,咁醫生開咗四日藥俾你,連埋填表嘅費用加埋係五百。」

佢:「頭先又話三百五?」

我:「藥呀嘛,醫生開咗四日藥俾你㗎」

佢一手撥走枱面上嘅藥:「我唔要藥呀!填份表得啦!」

我:「咁我幫你同醫生講啦,你要等等呀」

佢:「你嗌佢唔好屈得就屈呀」

你唔好屈得就屈呀~

我拎返份表入醫生房,轉頭我再出返嚟同佢講:「醫生同你取消咗啲藥㗎啦,但係提返你,如果之後你諗諗吓都係想嚟攞返藥嘅話,係要再睇過醫生,我哋係會收返診金連藥費。」

佢:「得啦,我唔會返嚟㗎啦,我淨係要份表咋嘛,你同我填好晒就得啦,你知點填唔駛我教啦」

我:「醫生已經填好晒㗎啦,呢度三百五十啊」

佢俾錢:「得啦,有呢份嘢我唔駛做一年半載都得啦!」

先生開心拎住份表離開診所。

下回續。

延伸閱讀:

診所職場事【寶豬趣聞】被HIGH死的太太 上集

診所職場事 寶豬趣聞 被HIGH死的太太 珍寶豬

診所職場事【寶豬趣聞】被HIGH死的太太 下集

診所職場事 寶豬趣聞 被HIGH死的太太 下集 珍寶豬

【診所職場事 】有日有位小姐嚟到診所~

佢行埋嚟問我:「我想去咗廁所先登記」

我拎出鎖匙:「哦~好呀,你出門口轉右就係啦」

佢:「嗯」

撰文:珍寶豬

過咗半個鐘左右,小姐拎住鎖匙問:「點解你哋廁所仲係用廁紙呀?」

用銀紙好唔好?

我:「吓?」

佢:「成卷廁紙咁任人用好唔環保喎」

我:「咁…個廁所呢座大廈公用嘅,唔到我哋話事」

佢:「我同你反映意見啫,你唔駛咁快卸膊喎」

咁你反映意見都應該向有權話事嘅人講嘛,我呢啲話唔到事嘅左耳入右耳出啊~

我:「哦~」

佢:「點解你哋唔用水呀?」

我:「水?」

佢:「好似日本嗰啲呀,日本周圍都係㗎!佢哋咪環保囉」

我參透唔到環保嘅意思了,唔用紙轉用水同電,咁就係環保了?其實你知唔知最環保係點?就係冇人生存。

我:「嗰啲廁所都要用電同水啊,而且香港都唔普及~」

佢:「你哋裝先囉,用少好多紙呀」

我:「嗯,或者你一陣落到樓下問吓佢哋有冇意見反映書俾你填呀~我都唔係好清楚佢哋有冇」

佢:「我係同你講喎」

我:「我理唔到呢啲啊~出面嘅唔到我哋理嘅」

佢:「環保唔會唔關你事呀?」

我冇聲出,呢刻我淨係好想踢你上火星,等地球少咗啲污染物…

佢:「唉,算,我都知你呢啲人冇咩用㗎啦。你當我冇講過啦,冇嘢啦,登記啦,一陣寫埋假紙收據俾我呀」

病假紙都係紙喎?

延伸閱讀:

診所職場事【寶豬趣聞】身分證下集

診所職場事 寶豬趣聞 身分證下集 珍寶豬

診所職場事【寶豬趣聞】身分證上集

診所職場事 寶豬趣聞 身分證上集 珍寶豬

The user will never see this