診所職場事

診所職場事 【寶豬趣聞】陪月阿姨|珍寶豬

職場

廣告

【診所職場事】電話響起~

我:「你好,乜乜診所」
對方係一位女士:「喂?診所呀?可唔可以問你少少嘢呀?」
我:「請問咩事啊?」
佢:「我開完刀個傷口唔知係咪有事呀」

撰文:珍寶豬
我:「你要過嚟俾醫生睇㗎」
佢:「但係我坐緊月喎」
我:「你係咪住附近㗎?係嘅話包得實啲過嚟呀,因為電話講都唔知你個傷口係點~」
佢:「係呀我知電話講唔到呀,我叫我個陪月阿姨睇佢又唔肯喎,話傷口唔係俾佢睇喎,佢話陪月淨係負責換尿片餵吓奶」
我:「你有冇其他屋企人陪你過嚟俾醫生睇睇呀?我哋而家都冇咩病人啊」
佢:「有呀我阿媽囉」
我:「你行唔行到㗎?」

佢:「行到嘅」
我:「你唔好夾硬嚟呀,真係行唔到嘅好痛嘅記得要出聲搵人幫呀」
佢:「我個陪月就係唔肯幫呀,我有時起身都起唔到,扯住痛,我阿媽又唔係咁好力」
我:「你住邊㗎?」
佢:「就你哋診所對面咋嘛」
我:「你一係叫媽媽過嚟先呀,我借架輪椅俾你~你媽媽推你過嚟,大家都舒服啲」
佢:「好呀!」

借完輪椅,隔咗陣,佢哋兩母女嚟到。
佢登記後揭起衫俾我睇:「姑娘,你望吓係咪發炎呀?」
我:「你入到房再俾醫生睇呀~醫生會幫你㗎啦,我同你探咗熱先啊」
探熱後,我:「你知唔知自己發緊燒㗎?」
佢:「我唔知呀,唔怪得係覺得有啲暈陀陀咁啦,陪月仲話係我氣虛」

睇嚟個陪月阿姨係嚟玩鬼你…

延伸閱讀:

診所職場事【寶豬趣聞】又中又西

【診所職場事】有日一位小姐嚟到診所。
佢快步行埋嚟登記處同我講:「你睇實呀」
我雙眼定位了:「嗯?咩事啊小姐?」
佢拎出一張應該係屬於我哋診所嘅覆診卡,即場撕爛咗,之後仙女散花咁向天拋屍骸。
我:「請問咩事呢小姐?」

撰文:珍寶豬
佢:「我唔會再嚟睇你哋㗎啦!」
你咁神心專登嚟到診所話我知呀?呢啲仲唔係愛?
我唔知可以俾咩反應好:「嗯…」
佢:「哈?就咁咋?」
唔係你想點呀?我捉住你褲腳叫你唔好走?
我:「其實我有咩幫到你呢小姐?」
佢:「哈?你問我?你應該問你哋自己點樣幫自己呀!唔係問我呀!」

我成日都問自己點解越減越肥,我都覺得自己好唔幫得手~
我:「係咪有咩事呀?不如你直接講啦」
佢:「我唔會再嚟睇你哋㗎啦」
我:「冇問題,呢個係你嘅選擇~」
佢:「我幾病都好我唔會再嚟睇你哋呢啲診所㗎啦!你哋完全冇人性㗎!」
我深呼吸:「點解會係冇人性呢?」
佢:「我啱啱先返到嚟香港,我去咗法國呀!」
哦。咁點呀?
我:「嗯,你繼續講~我聽緊」
佢:「我唔舒服嗰時我有上網搵過你哋診所email!」
我哋診所有email嘅咩?我唔知嘅?
我:「我哋冇email㗎喎?」
佢:「係呀!我知你哋冇呀!我搵過晒啦!我喺法國唔舒服到就嚟死呀!你哋有冇幫過我?」

我:「你應該喺當地搵醫生幫你…」
佢:「我唔係跟團去㗎!」
跟團就有醫生的嗎?
佢繼續講:「我連流鼻水英文都唔識呀!發燒係咪hot呀?」
…你可以用自己一套方法演繹嘅~
我:「有…google翻譯㗎嘛~或者可以搵個識嘅幫你溝通啊」
佢衝上前拍枱:「我唔舒服到就嚟死呀!」
你而家咪又生勾勾好好中氣~
我:「冇事啦,而家冇事就好啦,你返到嚟仲有冇唔舒服呀?」
佢退後兩步,揮揮食指,邊講邊退出診所:「我唔會再嚟睇你哋㗎啦!」
嗯~放開啲睇開啲~東家唔睇睇西家~仲有…你撕爛嗰張係車行經紀卡片…

延伸閱讀:

診所職場事 【寶豬趣聞】 無賴

【診所職場事】有日一位小姐嚟到診所~
佢行埋嚟登記處:「配返上次啲特效藥一個月呀」
哇,一個月藥?
我:「你有冇覆診卡?一係登記電話號碼啊~」
佢:「XXXX-XXXX」

撰文:珍寶豬
我搵到排版望望:「小姐,你上次嗰啲生蛇藥嚟㗎喎?」
佢:「係呀」
我:「仲未好返?定係你隔咗兩個星期又生過呀?不如俾醫生睇睇呀?」
佢諗咗諗:「我配定咋嘛」
我:「呢啲唔駛配定啦~佢唔係好似傷風感冒咁㗎,可能好耐都冇第二次㗎,配定有可能得個擺字」
佢:「係咪唔俾配呀?我又唔係冇錢俾?」
我:「因為呢啲唔係普通看門口嘅藥,如果你真係要配嘅我都要幫你問問醫生先~」

佢翻咗個白眼,嘴角向上揚咗一下:「我冇聽錯呀?你話唔到事㗎?」
我:「藥方面我都需要問清楚醫生嘅~我哋出藥前都要俾醫生check咗先㗎」
佢:「真係低能,請你返嚟仲要幫你check」
咁不如下次我做醫生幫你檢查呀?你唔好兜巴星走我喎?醫生請我返嚟係幫佢分擔睇症㗎~
我:「係咪配特效藥呀?你真係想要三十日藥一個月呀嘛?」
佢:「係呀,去問啦!係要阻我時間!」
我拎住排版入醫生房問醫生,結果…
我行返出去同小姐講:「唔好意思呀小姐,醫生話呢啲特效藥唔可以配㗎~你到時有需要嘅先嚟睇醫生啦」
佢拎出幾張一百蚊紙:「我唔係唔俾錢喎」

我:「唔係你俾唔俾錢嘅問題,係有啲藥唔可以就咁配俾你~你真係覺得有唔妥嘅嚟睇個醫生對你咪仲有保障~」
佢對眼又翻一翻:「同個冇腦嘅人講嘢真係好谷氣」
佢收返嗰幾張一百蚊紙,在空氣中心呼喚醫生:「醫生呀!你繼續由得出面呢條八婆咁阻你發達啦!配藥都唔俾嘅!你好快執㗎啦!」
醫生,我哋又少咗個大客啦,點解你都仲未執嘅?

延伸閱讀:

診所職場事【寶豬趣聞】被HIGH死的太太 上集