【經一專欄】診所職場事 【寶豬趣聞】開個價｜珍寶豬
我：「吓？」
佢：「假紙呀，唔係你呀」
我指指放喺枱面嘅病假紙：「喺度呀」
撰文：珍寶豬
佢望望：「開個價嚟」
我：「藥連診金三百蚊呀」
佢：「你即管開個價嚟」
妖！咪講咗囉～係咪撞聾呀你～～
我大聲啲：「三百蚊呀先生」
佢手指篤篤張病假紙：「三百呀？你改多兩日俾我呀」
我：「唔係呀，係藥連診金三百蚊～病假紙醫生寫咗一日俾你就係一日㗎啦」
佢：「我頭先咪叫你即管開個價俾我囉」
我：「病假紙唔係你俾錢就可以買多幾日㗎，係醫生認為你需要休息幾多日先寫俾你～」
佢：「個個人都有個價㗎啦，寫張紙要幾多呀？」
我：「如果咁樣寫俾你嘅話，唔知算唔算係虛假文書呢？我唔係好熟呢啲嘢，你知唔知呀？」
佢：「醫生親手寫嘅就唔係虛假啦，開個價嚟啦，俾多四百夠未？」
四百？你睇得你自己咁低賤嘅咩～
我：「啊？但係咁樣醫生咪會即係濫發病假紙囉？」
佢：「濫唔濫發佢自己認為嘅啫，佢覺得我有需要放幾日嘅，人事部真係check到嚟打嚟問你話係醫生寫嘅，佢哋都吹你唔漲㗎啦」
我：「嗯～明白，不過我哋醫生已經將佢認為你需要休息嘅日數，清清楚楚寫咗喺呢張病假紙度啊，如果你仲係有唔舒服嘅，可以之後再嚟覆診～」
佢：「我咪叫你俾個價嚟囉～」
我：「你要負責埋醫生個牌同下半世呀？」
醫生！退休機會嚟啦！
佢：「寫多兩日咋喎？駛唔駛下半世咁嚴重呀？」
我：「一係你自己入房同醫生傾啦，我都唔係好清楚醫生仲有幾多人要養…」
佢放低三百蚊，拎埋袋藥走了：「我記實你！」
能夠俾你時時刻刻牽掛實在係我嘅榮幸啊～
延伸閱讀：
診所職場事 【寶豬趣聞】打錯電話
【診所職場事】有日有位先生嚟到診所～
佢行埋嚟，低頭篤住電話咁放低身分證：「登記呀」
我：「好呀～」
我登登吓記，佢問我：「得未呀？」
我啱啱開始入資料咋喎，你平時快開㗎？
撰文：珍寶豬
我繼續入資料：「就得～你等多等啊，或者坐坐先？」
佢：「你經理喺邊？」
登個記都要搵經理，你做咩啫～
我：「請問有咩事呢先生？」
佢：「你唔笑呀，我同你講嘢你頭先都冇望住我講呀，你知唔知咩叫尊重禮貌呀？」
頭先篤住電話放低身分證嗌我登記嗰個係你嗎？
我：「真係唔好意思啦先生，我會留意㗎啦，我頭先掛住幫你登記，所以先冇望到你啫」
佢：「你係完全冇笑容呀，你喺度送殯㗎？」
送你殯嗎？
我：「我戴住個口罩你咁都睇到？」
佢停一停諗一諗：「口罩出面都冇笑容啦」
醫生，我哋不如換過批口罩？換啲有圖案嘅？咩嘢烈焰紅唇哈哈笑嗰啲呀？
我：「先生我登記好㗎啦，你未睇過嘅，麻煩你提供埋你嘅住址同電話號碼俾我入返資料呀～」
佢：「你搵你經理出嚟同我講」
我：「先生我哋冇診所經理嘅，我哋之上就係醫生嚟㗎啦」
佢：「好！你咁講就得啦！我入去見到醫生㗎嘛？」
你個問題好有趣，入醫生房唔係見到醫生，唔通見到十八羅漢呀？
我：「嗯，係呀，你一陣就見到醫生㗎啦，你俾咗住址同電話號碼我先呀～登記好先有得入房」
佢：「紙！筆！」
人嚟，快備文房四寶！
佢大筆一揮寫好資料俾我，好啦，送佢入房啦～
入到房，我聽到佢大叫『你搵你經理出嚟呀！出面嗰個又唔笑，講嘢唔望人！入面呢個又係咁！你唔好解釋，搵個話事嘅嚟呀！你唔好再望住部電腦講嘢呀！我喺度呀！』
話事嘅會係包租公嗎？醫生，我要唔要Call包租公嚟？
延伸閱讀：
診所職場事 【寶豬趣聞】 從中生利
【診所職場事】電話響起～
我：「你好，乜乜診所」
對方係一位女士：「喂？診所呀？可唔可以問你少少嘢呀？」
我：「請問咩事啊？」
佢：「我開完刀個傷口唔知係咪有事呀」
撰文：珍寶豬
我：「你要過嚟俾醫生睇㗎」
佢：「但係我坐緊月喎」
我：「你係咪住附近㗎？係嘅話包得實啲過嚟呀，因為電話講都唔知你個傷口係點～」
佢：「係呀我知電話講唔到呀，我叫我個陪月阿姨睇佢又唔肯喎，話傷口唔係俾佢睇喎，佢話陪月淨係負責換尿片餵吓奶」
我：「你有冇其他屋企人陪你過嚟俾醫生睇睇呀？我哋而家都冇咩病人啊」
佢：「有呀我阿媽囉」
我：「你行唔行到㗎？」
佢：「行到嘅」
我：「你唔好夾硬嚟呀，真係行唔到嘅好痛嘅記得要出聲搵人幫呀」
佢：「我個陪月就係唔肯幫呀，我有時起身都起唔到，扯住痛，我阿媽又唔係咁好力」
我：「你住邊㗎？」
佢：「就你哋診所對面咋嘛」
我：「你一係叫媽媽過嚟先呀，我借架輪椅俾你～你媽媽推你過嚟，大家都舒服啲」
佢：「好呀！」
借完輪椅，隔咗陣，佢哋兩母女嚟到。
佢登記後揭起衫俾我睇：「姑娘，你望吓係咪發炎呀？」
我：「你入到房再俾醫生睇呀～醫生會幫你㗎啦，我同你探咗熱先啊」
探熱後，我：「你知唔知自己發緊燒㗎？」
