潛力股

【經一專欄】26歲想靠投資滾大財富 月供$9,000 集中買潛力股|龔成信箱

投資

廣告

【經一專欄】今日龔成信箱,不少讀者想為未來作打算,如何實行投資計劃,亦提及熱門的股票以及投資心態等問題,當中包括房託 、市盈率、月供股票、藥業股、潛力股,以及手續費等提問。

撰文:龔成 |圖片:新傳媒資料庫、unsplash

1.潛力股

老師,我最近積極儲錢及打工,月供金額可達至$9000

2800 $1500
3 $1500
12 $2000
66 $1500
823 $1500
1211 $1000

睇完老師八十後百萬富翁,談到建議購買優質股+月供方法,非常認同老師及Buffett的說法,長期擁有優質股,以上係我分析完年報後的組合。

我26歲,目的係買平穩增長及潛力股,呢個Portfolio組合可以嗎?

我不想放太多月供落2800盈富基金,所以只買入少少作分散風險作用;另外更相信恆基集團內的3,12, 我只需不斷月供,加上紅股十送一。

兩隻股每年均有增長的表現,所以將來可儲到更多股票(因為10送1), 股息兼收,越滾越大。唔知老師點睇?

 

龔成老師:

上述都是有質素的股票,都可以進行長期月供。只要你不理中短期股價,長期不斷供就可以了。

至於比例方面,你26歲,財富仍有相當的增長空間,其實可以加多少少在潛力股。如果你這個組合已經開始,就不用改變,等你收入增加時,就加多少少在潛力股上,如加金額在比亞迪(1211),月供$2000。

至於煤氣(0003)同恆基(0012),都是有質素,有發展力的股票,佢地10送1,不會令企業價值增加,因為每次送股後股價會自然調整,所以這只是左手數與右手數的分別。這股值得投資是由於企業質素好,有前景。

(對照龔成信箱:Q8096)

2.大行報告

HI 龔成,我有兩個問題:
1. 大行報告可唔可信?
2. 如果某行業有兩個龍頭公司壟斷市場,兩間都買屬唔屬於好方法? 謝謝

 

龔成老師:

1)部分是可信的,因為有啲真的會認真分析,所以有參考價值。但我自己,通常只會留意當中的「資訊」,而不太理會「意見」。

另外,睇一批分析取綜合資料較好,而單一的,就不能盡信。因為曾見過有大行,左手唱淡,右手買貨,因此要小心。

2)都是一個方法。但要確定這行業是有賺錢能力,同時前景不錯的。

(對照龔成信箱:Q8086)

3.市盈率

請教下以下幾條問題:

1.關於港鐵,我睇左佢2018年中期業績既損益表,發現純利同比下降左5%左右,佢d主要業務(客運,車站商務及物業租賃等)都有輕微上升。

我本身有月供佢,但睇到衣家尼個情況想唔供佢住。

2.我本身有供開平保但發現佢負債比率好高,過去5年平均有0.9以上,咁係味反映佢風險過高,唔適合長線投資?

3.關於煤氣,我發現佢今年中期業績顯示佢純利同比增約7%,假設佢全年增長都差唔多,其實表現唔算比過往突出,咁依家個市盈率係味太高?因為佢過往5年平均都係24左右。

4. 基於以上考慮,我打算暫時暫時斷供港鐵同煤氣,轉供北控水務同金沙,因為佢地現時估值似乎較吸引,唔知咁樣恰唔恰當?麻煩哂

 

龔成老師:

1)我地分析一間企業,唔會只睇一年或半年的業績,我地會以長期的分析作分析的。同埋睇年報要有一定的技巧,呢點會在課堂上再講述。

2)負債比率當然有一定的指標,但不同的企業,都有機會作出調整的,有時現金流較好的企業,可接受程度會略高。

3)煤氣(0003)的增長力算是中等,同埋我地會睇長年期的。同埋當你分析股價時,就會見到佢長期每年都升10%,這反映企業的實質價值上升。

4)其實唔轉都得,我地分析一間企業的優質度同值博率,仲有好多因素。

(對照龔成信箱:Q8087)

4.減持

龔成老師,很偶然有次在Facebook 見到你分析股票,覺得你的分析很有見地,和我見過一般股評人很大分別!

跟著每天都要睇你的post, 另外想請教一下你!

我現在的倉有:

2318 $95入
175 $28
874 $39
2186 $9
1813 $13
1177 $13

請問我持倉的貨質素如何?
需要減持嗎?麻煩你!

 

龔成老師:

多謝支持!我只是分享一套能真正賺錢的方法,並不是分析一套「好好吹」的方法。

其實繼續持有一隻股票與否,最重要是企業的質素、前景,買入價只是一個心理因素。

上述不少都是有質素的股票,只是你買入價大多處貴的水平入,這反映你很易受大市氣氛時影響,在大市好多好消息(但貴)的時候入貨。

雖然上述個股無太大問題,但你太集中在醫藥股類別,這會令你的組合有較大的集中風險存在。如果你現時股票佔財富的比例過多,要考慮是否要減持翻d醫藥股,減低你的風險。

(對照龔成信箱:Q8088)

5.優質股

龔成老師。長城汽車是否一隻優質企業股呢?
另外吉利汽車又是否?

 

龔成老師:

長城汽車(2333)本質不錯的,但盈有就較為波動,長遠其實不差的。但股本回報率波動大,賺錢能力存有不確定性。

至於吉利(0175),有質素的,是國內自主品牌中數一數二的,加上近年有海外收購,無論對強化國內產品的質素,以及長遠發展海外市場,都是正面的。

(對照龔成信箱:Q8089)

6.美團點評(3690)

成老師。美團 雖然上市不久 無參考價值
但呢間公司係味真係甘好

 

龔成老師:

一般我都不建議投資上市年期不足2年的股票,因為上市前的數一個整靚過,這會令代表性較低。

美團點評(3690)最大的賣點是高增長,生意每年的增長相當快速,因為佢的確受歡迎,佢係是中國生活服務電子商務平台,幫助消費者獲取商家信息、做出知情決策、完成線上線下交易,並享受即時配送服務。

這個市場好大,增長快,所以質素其實存在,但估值高,數據參考價值低,都令我卻步。

(對照龔成信箱:Q8091)

7.遠東發展(0035)

老師,我是股票班學生,想問你覺得遠東發展好嗎?

覺得管理層策劃幾好,利用經濟週期收購5同國家有潛力地段,避免同大型發展商在香港競爭,而且有停車場作現金流同有潛力作換地,最近再同澳洲賭業龍頭一齊發展賭業。

但係佢從2014年開始不停降低物業重估利率,對比長實和恒基利率偏低,雖然每年佔比收益不算很多,但累計至2018年應該令eps加左5少,還每年公報自己對酒店重估價值,想老師比d意見。

還有想老師比d意見分析地產股時有咩地方要特別注意。

 

龔成老師:

遠東發展(0035)本質不錯的,各業務的生意不錯,同時都有賺錢能力。

但如果你記得我上堂講過,佢不斷調低估值時所用的折現率,咁樣會令到物業估值增加左。我地明白這點,就會對佢盤數有所調整,咁樣就得。

因此,分析市賬率及賬面值,作用就比較少,反而分析佢真正賺錢的盈利,會比較好,這要扣除每年的物業重估數字先得。

另一個指標就是睇派息,佢現時的股息率不差的,有5%、6%,而企業要有真正的現金流,才可以持續派息,這部分沒有水份的,因此反映佢有真正的賺錢能力。

這股有投資價值,但佢規模不大,投資金額不宜太多。

(對照龔成信箱:Q8092)

8.藥業股

龔成老師, 你好! 之前見你在FB講解藥業股值偏高, 我持有1177股價亦已回落了不少

請問現時高PE又加上股市不明朗情況下, 是否應該賣出? 還是需要等出業績後才作決定?

 

龔成老師:

中生製藥(1177)有一定的質素,同時潛力不差。只是近年都有估值過高的問題,因此,這股有投資價值,但就不值得太大注,只能小注。

如果你高位有位,只要持貨不是太多的話,可以持有,不用擔心,這股有得守的,但你要預佢中短期都會較波動,同時未必會好快上得翻較高估值的區。

(對照龔成信箱:Q8093)

9.房託

龔老師,請問是否所有產業信托基金都係穩健?

有高息的87001是否穩陣? 如長期不斷買,點睇?

2778同778比較穩陣?但股息冇87001咁高,請問如何揀?

 

龔成老師:

房託是穩健的資產,原理同你買樓收租一樣,只是這是一個物業的組合。

上述3個房託,都有質素的,都可以投資作長遠收息,但你要自己睇翻看好邊一組物業的長遠發展。而物業收到的租金,扣除成本後,就會用作派息。

匯賢(87001)可以長線收息的,但當中有d野要注意。

佢現時主面有兩項資產:包括於2011年收購的北京東方廣場之零售、寫字樓及服務式公寓業務;以及兩家酒店(北京東方君悅大酒店及瀋陽麗都索菲特酒店)。

加外有新增投資,於2015年才收購的重慶大都會東方廣場。

人民幣及中國樓市略有過熱的情況,都是其中的風險,而當市場擔心中國房地產市場下跌時,這股都會下跌,令股息率上升,所以股息吸引,其中一個原因是其中的風險。

因為佢原理是有樓收租,若往後的租金下跌,就會令到你收到的股息減少,而人民幣波動,亦有可能令你收息減少。

從整體及本質上,這房託是不錯的,適合長線投資。雖然有上述所講的潛在風險,但高股息率,可說能抵償當中風險。

但要留意,根據北京市人民政府於2006年6月26日發出的國有土地使用證(京市東港澳臺國用(2006出)第10128號),該發展項目總土地面積為7萬7千平方米的土地使用權已授予北京東方廣場公司作綜合用途,到期日為2049年4月21日。

所以,佢的價值會減少,股息高,如同包括左部分本金。所以,股價長期有機會慢慢下調,但你不會因此而蝕左,因為股息中某部分隱藏左本金。

(對照龔成信箱:Q8094)

10.風險

幾百萬資產放同一銀行會否是另一風險?

另外,全部資產放在同一銀行會否是另一風險?銀行倒閉只賠50萬,有錢人通常持實物股票?

 

龔成老師:

銀行倒閉的確只賠$50萬,但香港的監管不差的,所以銀行倒閉的風險很少。但如果你擔心,就分開3間銀行存放,這樣可以減少集中風險。

股票的原理都是類似,銀行或證券行倒閉,只賠$15萬,但這風險同樣好低,所以不用擔心。如擔心,可分開戶口,又或持有實物股,都是方法。但就算有錢人,好多都只是存有一般戶口,而未必持實物股。

(對照龔成信箱:Q8095)