【經一專欄】26歲月儲$11K 月供4隻優質股 +潛力股|龔成信箱

【經一專欄】26歲月儲$11K 月供4隻優質股 +潛力股|龔成信箱

【經一專欄・潛力股】今日龔成信箱,不少讀者想為未來作打算,如何實行投資計劃,亦提及熱門的股票以及投資心態等問題,當中包括以股代息、市盈率、月供股票、平穩增值類、樓巿,以及港股等提問。

撰文:龔成 |圖片:新傳媒資料庫、unsplash、istock

1.潛力股

龔Sir你好。現時我可以儲$11,000一個月,月供$6,000,儲$5,000現金 o5ok?

打算月供4隻股票,每隻$1,500,分別心水有:3(煤氣)、66(港鐵)、823(領展)、2388(中銀香港),2800(盈富),邊4隻好?會唔會太保守?

無咩倍增潛力股,我依家26歲。我的投資目標平穩增長加收息。

 

龔成老師:

以現時的大市平貴情況,處合理水平,你以「一邊月供,一邊儲現金」的模式進行,是最好的。你以每月約一半去月供,適合。

你可以供港鐵(0066)、領展(0823)、中銀(2388),盈富(2800),咁樣最為平衡。其實煤氣(0003)都好優質,但咁樣你會太偏向公用。

而你26歲,其實可投資較有增長力的股票,你可以加多隻潛力股,每月供$1000。長期進行已可。

雖然你想平穩收息,但我地進行人生財富累積,會運用「先增值,後現金流」作方法,年輕人應投資較多增值類資產,而較年長的,則應投資較多保守類項目,因為年輕人的財富系統未成形,同時負擔較少,可承受的風險度較高,所以會著重增值為先。

例如初期投資較有潛力的股票,令財富較快增值,當增值到一定金額後,可開始將財富分配至平穩增值型股票,然後到年紀漸長或已累積了相當財富後,才漸漸轉成收息型股票。

(對照龔成信箱:Q8117)

 

2.港股

老師你好,我想問月供美股,同月供港股大家的優點缺點有咩分別?

係咪月供美股啲股票的實力強啲?

 

龔成老師:

主要是市場不同。

美股是一個成熟的市場,企業可能有較高質素,但由於已十分龐大,增長力不算強,但就能平穩增長。

至於港股,當中的企業是中國及香港的企業,增長力會較美國強。長遠來說,會有較高的回報,當然,波幅可能較大。

經一專欄 月供 優質股 潛力股 龔成信箱
港股,當中的企業是中國及香港的企業,增長力會較美國強。

(對照龔成信箱:Q8108)

 

 

3.樓巿

你好,龔老師,一直有睇開你既專頁,最近先醒覺係時間關注自己既資產,唔好再比佢一直貶值。幸運地過去幾年收入增加及不停儲蓄,見到銀行戶口數字由6位變7位,再由1字變成4字,好有成功感。

由於老公退休在即,不能不正視被動性收入既重要性。故此最近我名下既自住樓做左轉按,所以手頭上多左$330萬現金,不過按揭額就加大到$500萬了,月供$18500。

加上本身有儲蓄,現共有$650萬現金,股票約$60萬,仲有小小外幣如英鎊及澳元。

計劃買多一層樓投資收租,由於而家樓價好高,未有心水,加上用老公既名買樓做按揭只可借到150萬左右,只能負擔$650萬樓下既私樓,回報期望大約3%左右。

仔仔有份教育基金明年可以取回,約有$15萬左右,未有方向點處理,繼續放係保險公司有約3.5%利息。

想請教一下,買樓投資我信心比較大,萬一樓巿跌,都可將來留比仔女自住(仍然覺得磚頭比較有保障)。如果用同一筆錢全數買股收息,我未有信心。

不過,由於老公5年後到達退休年齡,想為佢製造現金流,故此考慮買層樓比佢收租。我本人仲有16年先退休,家庭收入共$7萬5千,每月支出大約$4萬,其餘會儲起。

又想買股收息,一直考慮月供股票,但遲遲未動身。本身持有005(1200股)、941(1000股)、700(500股)、1299(800股)、116(500股)、66(3000股)、2628(2000股)、同4231(1手)。大部份都係蝕緊錢,唔捨得蝕放。

問題:

1)如果買樓,我會用盡$550萬現金,留起$100萬做後備,收租回報預計3%,應約有$15000-20000租金收入。跟住加月供股票,計劃月供2800、2388,希望長期收股息。

2)唔買樓住,將其中$100萬做高息定期,預期2%回報。 $250萬放係按揭戶口賺高息約2.15%。留低$300萬現金等跌巿入平貨,無論樓巿或股票有機會就入貨。

3)手頭上既股票唔識點處理,941及2628 等左好耐都上唔返入手價,應否止蝕換貨?

最終希望可以製造$3萬現金流,唔知呢個方向正確嗎?請指教!

 

龔成老師:

明白你想集中投資物業,可能你認為樓較穩陣,但只要你明白「股票就是企業」,你找穩健的企業就可,因此收息股都可以好穩健。

同埋,你地太集中在物業類資產,其實會面對單一資產風險,反而分散在不同的資產類別,建立一個平衡的組合。對你的財富反而仲穩健。

1)如果買樓,建議金額不要太大,餘下多些現金做漸備,以及可投資其他類別的資產項。

2)我比較建議不要心急買樓,雖然買樓都是方向,但這刻最好先投資收息股,建立一個收息股的組合,你多學習股票、收息股,明白更多後,就會更有信心。當然,在有知識先,你先做定期是可以的。

因為這刻物業回報率較低,而股票的回報比物業高,因此,這刻先投資股票,等股票增值,同時物業市場回落時,就可以賣出股票,轉投入資金到物業,這策略是較好的。

3)你可能在貴的價位買入,但這兩股都是有質素的,你暫時持有先,這些股有得守的,但就要有耐性。

你以現金流$3萬作方向是正確的,但應建立一個更好的組合。距離你先生退休仲有5年,你應該把握這段時間好好學習不同的投資工具,同埋有效分配好財富。

我地投資,並不是炒賣,是一個長期分配的過程,同時著重資產的長期增值,以及現金流。

(對照龔成信箱:Q8109)

 

4.亨得利(3389)

3389現時可入嗎?

 

龔成老師:

亨得利(3389)為手表批發商及零售商,分銷國際品牌手表,透過其在中國的批發及零售業務持有分銷多個國際品牌手表的權利。

例如批發銷售的手表(Audemars Piguet)、(Carl F﹒Bucherer)、(TAG Heuer)等。

雖然佢都有一定的生意,但由於產品太受經濟週期、零售市道影響。睇翻佢過往的業續,有時會幾賺錢,有時會出現虧損,盈利波動較大,風險不少。現時市值$16億,以佢過往盈利計算,這刻算是合理價。可以投資,但由於有不確定性,因此不建議太大注。

(對照龔成信箱:Q8110)

 

5.合理價

你好, 想問下如果有30萬可投資, 有邊隻介紹?? 想要穩健啲。麻煩你~

 

龔成老師:

要睇你的年齡情況,年輕人可以較進取,年長人則可集中投資收息股。對大部分人來說,平穩增值是較好的,當中以盈富(2800)最適合投資,因為這有平穩增值的效果,同時這是一個組合,比起單一股票更好,風險更為平衡。

現時處於合理價的水平,可以分注投資(例如每隔2、3個月先入一次,分開用這筆資金),慢慢將$30萬,其中的一半,投資在盈富。餘下的一半資金,不要心急動用。

(對照龔成信箱:Q8111)

 

6.比亞迪(1211)

老師你好,本人24歲,無任何投資經驗,打算開始進行月供股票,請問盈富,煤氣,恆地各$2,000合理嗎?至少需要供多長時間和守多長時間?

另外,經常聽比亞迪前景不錯,但政府對電動車補貼每年減少,而且更換電池價錢不菲,長期投資會是正確選擇嗎?最近銷售呆滯,令股價下跌,請問是否趁低吸納的好時機?謝謝

 

龔成老師:

對初階投資者來講,利用月供股票去累積財富是最好的。上述所講的都是有質素的股票,這3股各供$2000可以的,你不用理中短期股價,長期進行投資就得。

月供一般要長期才有效,最少供3年及持有5年,如果更長就更好。就算長供及永遠持有都無問題。

至於比亞迪(1211),的確有競爭加大的情況,但最壞的情況已過,你見股價都由低位回升了不少。分析這類潛力股,一定要集中在長線,中短期波動好正常。

由於這股波動較大,風險始終較高,但長遠又有潛力,所以這股有長期投資的價值,但就最好用分注,或月供的模式買入,這是較穩健的。

(對照龔成信箱:Q8112)

 

7.平穩增值類

龔sir, 本人29歲, 月入約38K. 有一物業係手, 尚欠銀行365萬. 現金約20萬. 我應該點分配為好?

應該投資股票嗎? (現在無倉係手), 如果係, 應該投資邊類?

 

龔成老師:

29歲,財富仍然有相當的增長力,所以可投資物業、車位、優質股等類別。但你本身有物業,所以唔洗再投資固定資產類(物業、車位)。

所以作為財富分配,你應該投資股票,咁樣會令你的財富組合更加平衡。

以你的年齡,可以投資平穩增值類,再加少少潛力股。你可以考慮盈富(2800)、金沙(1928)、港鐵(0066)、中銀(2388)、長建(1038)、恆基(0012)等。分注買入,同埋不要用盡所有資金,咁樣就得。同埋要長線投資。

(對照龔成信箱:Q8113)

 

8.市盈率

龔sir, 要評估大市週期在那個位置,恆指的市盈率估值似乎不太有參考作用,在2015年最高位,恆指市盈率都在合理價。

今年最高位,市盈率也接近合理價,並未有高估的情況便下跌了,可能分析員因市況好而調盈利,所以恆指的平貴未必能作為評估市況氣氛,你認同嗎?

評估大市氣氛似乎並沒有必定的條件或準則!

另外,你點睇波浪理論?謝謝!

 

龔成老師:

如果你上過我的股票班,都知我會教不同的估值方法,市盈率是其中一個指標,但當運用時,我地會作出調整的,因為這只是一個表面數字。如果是大市的市盈率,就更是,因此只是一個初步參考。

所以,這是一個有用指標,但要作出調整。

至於評估大市氣氛,這當然有指標的,無論過熱或過冷,都有指標出現,當指標愈多,同時每指標愈強烈,我地就能愈確認,這都會在課堂中再講述。

至於波浪理論,這或許在100年前有效。但在近幾十年,都唔覺有人可以憑波浪理論賺到大錢,反而全世界賺錢最多的人或基金經理,都唔係用波浪理論,而係用價值投資法。

所以,我就只會用賺錢的方法了。

(對照龔成信箱:Q8114)

 

9.以股代息

龔老師,有少少問題想請教一下,由於最近月供的股票有派息,但持股量太少(不足一手),扣完銀行手續費變相沒有收到任何股息..請問我該申請以股代息嗎?還是不用理會?謝謝

其實還想知道甚麼時候申請以股代息比較好?

 

龔成老師:

申請以股代息,銀行都可能要收你手續費,你同樣是得唔到,但你最好問下銀行。

你現時的股息較少,收息的作用不大,所以唔理佢就得,要到你慢慢累積一定的股數,收息才會明顯。

如果你是長線投資,而這股又是優質股,基本上就可以以股代息。

(對照龔成信箱:Q8115)

 

10.騰訊(0700)

你好,我騰訊在$159入的,到現在都有些錢賺,但看到中國現在不穩定的政策,不知會否對佢有很大的影響?

因為在看老師你的書時,這些優質股應該長期持有會較好。

 

龔成老師:

我地持有一隻股票與否,重點是企業的質素,以及長遠的前景。

騰訊(0700)本身有質素的,前景亦不差,只是估值經常都處較貴的水平。雖然中國政策有些影響,但對佢的最核心部分不算影響,只影響了部分的賺錢能力。

其實騰訊最值錢的是大數據,只要這個優勢仍在,佢仍有投資價值,而政策則會影響佢價值變現的能力。

這股可長線持有,但唔好預佢好似過往咁高增長,佢慢慢會進入平穩增長時期。

(對照龔成信箱:Q8116)

 

 

 

The user will never see this