經一專欄 診所職場事 寶豬趣聞 犯賤 珍寶豬

【經一專欄】診所職場事 【寶豬趣聞】犯賤 |珍寶豬

職場

廣告

【經一專欄・診所職場事】有日有位先生嚟到診所。

佢一行埋嚟登記處,我已經聞到佢嗰陣煙味…
即使我背後已經冇咩空位,我都盡我所能稍為退後:「先生係咪睇醫生?係嘅話放低身分證俾我,搵個位坐坐先呀~」
佢好唔識趣咁哄埋嚟,趴埋上登記枱問:「你呢度睇醫生幾錢呀?」

撰文:珍寶豬
我指指出面張紙:「張紙有寫啊,你可以睇返你需要幾多日藥,再同醫生講」
佢繼續趴喺度伸個頭入嚟問:「即係我自己揀要幾多日藥呀?」
我:「係呀,除非醫生到時係開抗生素俾你,抗生素係一個療程嚟,就由醫生決定你要食幾日嘅,你係咪睇呀?我同你登記呀~」
佢似乎察覺到有異樣:「做咩呀你?」

我:「同你登記囉?你唔係睇醫生咩?」
佢:「你好似唔係好歡迎我咁嘅?要坐到咁後嘅咩?」
我望望自己退得有幾後,對比起我身型,又唔覺好後啫,我唯有坐前返少少:「唔係~你係咪睇醫生呀?係嘅我同你登記啦,麻煩你俾身分證我呀」

佢再一次哄埋嚟,我立即縮,佢:「嗱!你避㗎喎!」
我真係谷住度氣:「先生,你咁樣突然哄埋嚟,係人都會避啦,我呢度有塊玻璃就係用嚟隔住我哋~唔係俾係咁樣攝入嚟㗎」
佢:「聽唔清你講咩呀嘛」
我:「你真係聽唔清楚嘅我可以大聲啲~你唔好咁樣攝入嚟嘛,我哋呢個位做嘢嘅,有時會有啲唔應該俾外人睇到嘅資料㗎~」

佢慢慢伸返個頭出去:「駛唔駛咁惡呀?我都係聽唔清楚啫」
我將聲量調高:「你係咪睇醫生呀?係嘅麻煩你俾身分證我呀~」
佢細細聲面黑黑俾身分證我:「咁又唔駛咁大聲…我聽到…」
係要俾人話嘅!係要迫人話你嘅~你話你係咪犯賤呀~