【經一專欄】診所職場事 【寶豬趣聞】儲分 |珍寶豬

【經一專欄】診所職場事 【寶豬趣聞】儲分 |珍寶豬

經一專欄診所職場事 】有日一位先生睇完醫生~
出藥後,我:「呢度三百蚊呀」
佢拎出信用卡:「好」
我:「唔好意思先生,我哋唔收信用卡~淨係收現金」
佢:「點解唔收呀?而家周圍都收㗎啦」

撰文:珍寶豬

咁你點解唔去周圍嗰啲睇?
我:「我哋冇申請信用卡機啊」
佢:「但係我要儲分喎」
我:「我哋冇得儲分㗎」
佢企咗喺度,擘大個得個窿:「咁點呀?」
我望住佢一面懵懂,都唔知好嬲定好笑:「先生,我哋淨係收現金㗎咋,呢度三百呀」
佢又回帶:「但係我要儲分㗎喎」
我好想知佢儲咩分咁緊要:「你張信用卡儲咩分㗎?」

佢:「里數呀!機票呀!我儲唔夠嘅你賠返張機票俾我?」
你都好大貪啫,三百蚊換張機票~
我笑笑:「三百蚊都冇幾多分㗎啦?夠換一張機票咩?」
佢擺出一個完全鄙視嘅表情:「你真係咩都唔識㗎喎?你呢啲真係井底之蛙嚟!睇你個款連飛機都搭過!」
搭過又有咩咁威啫?而家啲機票好值錢㗎咩?
我笑笑:「嗯~先生,呢度三百蚊啊,我哋只收現金」
佢發爛渣拍枱:「我咪講咗我用信用卡儲分囉!你係咪白痴㗎?」
如果我係白痴,你都係啊,痴痴呆呆坐埋一枱,今晚打邊爐你嘅好冇?
我:「我哋而家就淨係收現金嘅啫~如果你要收卡,可能要N年後啦~你公司等唔等到張病假紙呀?等到嘅話,到我哋有信用卡機嗰陣再搵你?」
佢眼超超喺銀包拎出三百蚊:「死八婆」
係呀,我認我係。

The user will never see this