【經一專欄】首次買股票 月供$6,000 3隻收息股 值得考慮｜龔成信箱
撰文：龔成｜圖片：新傳媒資料庫、unsplash
1.建行（0939）
老師你好，你點睇建行呢隻股票
我第一次買股票 我諗住$6000一個月供股票
$3000 港燈
$2000 盈富
$1000 煤氣 好嗎？
同埋幾年要轉plan?
同埋建議供幾年就停止供 ？
龔成老師：
建行（0939）是有質素的股票，但增長力不強，你預佢只是一隻收息股。
你上述月供的股票，都是有質素的，可以供，只要你不理中短期股價，長期進行就得。你金額分配的比例，是較低風險的策略，如果想較平衡，每月每隻$2000都得。
一般來說，我地會長期月供，即是一直進行，長年期進行（起碼供5年）。當然，我地亦會按人生階段去進行分配，以「先增值，後現金流」去進行，即是年輕時可以供進取少少的股票，年長就供一些收息類股。
（對照龔成信箱：Q8375）
2.盈富（2800）
我是家庭主婦，沒有收入，只是在家月中拎少少來供，暫時時可拎到一千，係咪太少？我問過銀行，每月手續費$38
我同老公講想做月供股票，但佢話一樣係股票，點解可以會唔蝕錢？個市唔掂都唔會蝕晒？我唔知點同佢解釋
龔成老師：
你可以集中供盈富（2800），可以用供下停下的方法。唔好立刻月供，先儲到一些錢先開始，然後就月供$2000，咁可以節省你的交易成本。
之後可以停一段時間，儲下錢，又再供一段時間。又或者用隔月供$2000的方法，但唔知銀行比唔比，你可向銀行問左先。
其實股票就是企業，個市會上上落落，但我地唔洗理，因為「短期股價」同「企業價值」是兩件事。我地只要集中在企業價值就得。
例如買盈富，就是買入50間企業，中電（0002）、煤氣（0003）、匯豐（0005）等，都是當中的股票，你試想想，香港人會不用電嗎？好難想象中電會無錢賺，你記住，買股票就如同合伙做生意，你買入中電，你好易理解到這企業處壟斷狀態，政府更有利潤保障協議（定明一定要比中電賺8%），佢可以憑這去加價。雖然股價會上落，但從長線業務，佢的確優質的。
（對照龔成信箱：Q8365）
3.兗州煤業股份（1171）
另外，請問1171有否投資價值
現可分注入嗎？
龔成老師：
兗州煤業股份（1171）的質素屬中等，佢雖然有一定的資產及規模，但生意多年來都無增長。同埋由於佢受資源價格的影響，情況有點被動，見佢過往的盈利上落都幾大，而投資者好難預期之後的資源價格發展，因此，當中的不確定性會比較大。
現時估值合理，這的確是可以考慮投資，但這類股不宜太注。
（對照龔成信箱：Q8366）
4.中國鐵塔（0788）
龔sir你好，我係股票班學生，仲上緊你的堂。
尋日做功課遇到D問題，想問下國內既基建股eg 788算唔算行業結構完整呢？
龔成老師：
通常我地做行業分析，都會從入行門檻去做其中一個分析點，以及原有企業在行業中的優勢。中國鐵塔（0788）是中國通信鐵塔基礎設施服務提供商，塔類業務是其中的主要業務，你就要分析行業的競爭情況如果，佢主要以3大電訊商為客戶，這些客戶會否用其他的供應商而唔用佢。
你可以去港交所的網站，下載中國鐵塔的招股書，你可在「行業資料」P.101，找到答案，希望你睇睇。我地遲d講年報，會更具體講當中的報表及資料分析。
（對照龔成信箱：Q8367）
5.月供股票
可唔可以解釋下月供股票係咩黎同點操作嫁？謝！
龔成老師：
月供股票的原理好簡單，就是每月投入相同的資金，去指定的股票，例如你想買入中電（0002），這股一手要500股，即是要幾萬元，未必個個能一次過買到。
因此，每月買少少就是一個方法，例如每月供中電，$2000，假設今個月的股價$80，銀行就幫你入25股，下個月的股價$100，銀行就幫你入20股，如此類推，不斷同你儲貨。
由於買入價平均，因此有減少風險的效果。而月供股票一定要長時間進行得。
（對照龔成信箱：Q8368）
6.收息股
你好，請問可否用盈富取代收息股收息直至終老？盈富年均4厘息，派息會跟通脹增加。收息股息高，但派息不會跟通脹增加。
盈富息率長遠會追過那些高息收息股，既然用盈富取代收息股，即不理會盈富股價波幅，永久不沽，所以盈富股價波幅大其實不用理會。
既然已找到一隻完美股票盈富，那何必要再花時間研究股票呢？
龔成老師：
盈富（2800）有平穩增長的能力，的確是適合大部分人的，而這股的股息率，一般為3.5%，至於收息股，一般能去到5%、6%，所以，收息股仍是有優勢（股息上），同埋，不少收息股，如房託，過往的股息都能保持增長，因此都是不錯之選。
所以，要睇下你的投資目標係咪，如果想增值又有股息，就盈富，純股息就收息股。
盈富包括了50隻股票，當中總會有些比大市好，有些比大市差，只要我地選到比大市好的股票，就有價值了。
（對照龔成信箱：Q8369）
7.中美貿易戰
請教成哥：1928金沙續牌會否受中美貿易戰影響？金沙老闆是共和黨大金主，貿易戰持續對金沙續牌會否有隱憂？
長期買入、月供風險是否很大？請指教。
龔成老師：
除非中美超級大反面，否則不會。
金沙（1928）本身有一定的優勢，而佢的獨特性，都是吸引澳門政府想發牌比佢的。在我的股票班中，有詳細講整個發牌背景及澳門政府在考慮甚麼，種種因素都反映，在正常的大環境下，金沙能成功取得牌照的。
（對照龔成信箱：Q8370）
8.比亞迪（1211）
成哥∼
你覺得tesla 前景/潛力 好d 定 比亞迪前景好d？
龔成老師：
其實兩隻都好有潛力，但我會喜歡比亞迪（1211）多D。
首先，比亞迪已有好多不同的業務，而這些業務都已經賺緊錢，有正現金流，這可以為新能源汽車的部分，提供持續的資金。相反，tesla要不斷利用市場集資等方法，去為業務提供資金，在穩健度方面，一定是比亞迪較好的，不過，比亞迪近年為發展而加大了負債，這方面會扣分的。
另外，比亞迪身處中國，而中國發展電動車，一定比外國好，因為電動車要配套，而政府的角色好重要，這必然對中國的電動車企業較有利。
（對照龔成信箱：Q8371）
9.股災
老師，如果遇到股災應點算? 你會賣晒啲股票嗎？
其實老師如果持有太多股票，如果個市大跌，你會點處理丫？
龔成老師：
你一定一定要明白，我地買股票是買入企業，如同做了企業的合伙人，股災會令「股價」下跌，但對企業價值未必有影響的。
所以，一定要睇翻到時下跌的原因，有無對企業有核心性的影響，選是只是大環境、心理上、表面上的影響。如果企業的質素無變，但股價大跌，這當然是掃貨啦！
（對照龔成信箱：Q8372）
10.美股
龔老師，美股我們能夠購入嗎？如果可以，有好的建議嗎？
龔成老師：
美股都有質素的你可以入，現時美股仍唔算貴。
最簡單的方法，就是在香港買入追蹤美股指數的ETF，例如領航標普五百（3140），就是追蹤著標普500指數之表現，當中包括了500在美國上市，最大型及有一定質素的公司，投資這個已可以。
（對照龔成信箱：Q8373）
