【經一專欄】診所職場事 【寶豬趣聞】西藥 |珍寶豬

【經一專欄】診所職場事 【寶豬趣聞】西藥 |珍寶豬

經一專欄診所職場事】電話響起~
我:「你好,乜乜診所」
佢:「喂?我係早幾日嚟睇過嘅,你哋啲藥好有問題喎」
我:「小姐,請問你覆診卡號碼係幾多?」
佢:「我要話你知㗎?」

撰文:珍寶豬

我:「你唔講我知,我又點知你食咗啲咩藥呢~」
佢:「我以為你會知㗎喎」
一定知啦,一日睇百幾個客,你一定係寧舍突出令人印象深刻嗰個啦~
我:「如果你唔記得覆診卡嘅,俾身分證號碼我都得」
佢:「XXXXXX」
我睇睇排版:「小姐,請問啲藥有咩問題呀?你都應該食咗三日啦喎?」
佢:「哇,講起你啲藥就真係誇張啦」
佢停咗。
我等緊你繼續講落去呀大佬:「係~有咩問題呢?」
佢:「我飲幾多水都覺得唔夠囉,誇呀」
我:「你一日飲幾多水呀?」
佢:「我冇計喎,幾杯囉」
我:「幾杯係幾大杯嘅水呀?」

佢:「幾大杯都要話埋你知嘅咩,你自己唔知嘅咩?」
我隻杯同你隻杯唔同㗎嘛,我點知你係咪用啤酒杯嚟飲水啫~
我:「一日飲兩公升水嘅話都係正常嘅,你有冇兩公升呀?」
佢:「我都話冇計囉,你咁煩㗎」
我:「咁除咗呢樣仲有咩問題呢?飲水多都唔係啲咩問題嚟嘅」
佢:「你啲藥好熱氣呀,熱氣到好誇」
我:「你點解會覺得熱氣呢?」
佢:「啲尿好深色呀,我有飲水㗎」
我望望排版:「小姐呀,你啲藥入面係有隻藥食完小便變橙色㗎~藥袋上面都有寫」
佢:「吓?乜真係會變橙色㗎?我以為講吓咋,乜真㗎,咁多色素會唔會食死我㗎?我仲以為係熱氣到咁,咁…」
嘟。佢cut咗我線。
做咩講講吓要cut我線呀~

The user will never see this