經一專欄 診所職場事 寶豬趣聞 閉路電視 珍寶豬

【經一專欄】診所職場事 【寶豬趣聞】閉路電視 |珍寶豬

職場

廣告

經一專欄診所職場事】有日一位小姐嚟到診所。

佢邊抬頭望向另一方向,邊行埋嚟登記處:「你嗰個閉路電視嚟呀?」
我:「係呀」
佢:「影唔影到我㗎?」
本身個閉路呢就壞咗嘅,不過你咁問得,我梗係話冇事啦!

撰文:珍寶豬

我:「影到㗎,仲高清添~」
佢:「診所有權裝㗎咩?」
我:「有啊,係房入面唔俾裝咋嘛」
佢:「唔係私隱嚟㗎咩?正確嚟講,私隱應該係連我有冇喺門口出現過都唔可以俾人知㗎喎」
我:「哦~我哋部閉路電視係唔公開俾人睇㗎~得我哋醫生先會睇到。」
佢:「醫生唔係人咩?」
哎呀呀,玩捉字蝨咁曳!
我:「….唔好意思,係其他人,除咗醫生之外,就冇其他人睇到㗎啦,不過小姐你係咪嚟睇醫生呢?」

佢:「原本係,但係你哋有閉路囉」
我:「個閉路電視同你睇醫生有咩關係呢?」

佢:「我唔鍾意上鏡呀!」
你呢個理由幾特別,我幾鍾意…
我:「放心啦小姐,呢啲過眼雲煙嚟㗎咋,冇咩特別嘢發生嘅話,條片好快就會洗咗㗎啦」
佢:「你講就咁講啫,我係被上鏡嗰個喎,我唔放心係咪有道理先,我唔知你哋會唔會拎條片去做啲咩㗎嘛,一陣擺我上去啲咩網點算呀?嗰啲this唔知咩網,我仲駛見人嘅?你一係而家熄咗佢,再俾我睇住你洗咗有我樣嘅片」
啊…this咩網係咪即係專睇深深愛情動作片嗰個呀?小姐,你認為你自己正正常常企喺度講吓廢話都可以令人起機嗎?其實我而家都硬硬哋,不過係拳頭…

我:「唔好意思呀小姐,我哋係唔會俾任何人睇閉路電視嘅片㗎」
佢:「咁你俾我走囉!」
我:「我都冇留住你…」
佢靜咗幾秒,之後自己離開診所。
小姐你其實係咪口裡說不,但身體係暗示又明示叫我將你放上去this咩網.com呀?對唔住呀,我哋個閉路同你一樣裝假狗㗎~