診所職場事 【寶豬趣聞】紫外線|珍寶豬|經一專欄

診所職場事 【寶豬趣聞】紫外線|珍寶豬|經一專欄

經一專欄診所職場事】電話響起~
我:「你好,乜乜診所」
佢:「今日紫外線係幾多呀?」
我哋係天文台咩?
我:「唔好意思小姐,你打錯電話啦,我哋診所嚟啊」

撰文:珍寶豬

佢:「我冇打錯,我係準備嚟睇醫生呀」
唔好準備啦,係就快啦~
我:「咁你問紫外線係…」
佢:「係呀,幾多呀,答我啦」
我:「不如你上網睇呀,我唔知呀」
佢:「太高嘅我唔嚟睇醫生㗎」
我:「哦~我哋今日都收七點嘅,你七點前嚟到就得啦」
佢:「七點未必天黑喎,而家夏天,你冇常識㗎?」
…你係殭屍嚟㗎?一定要天黑先出動?我哋醫生唔識醫殭屍啊,殭屍算唔算係蝙蝠呀?會唔會考慮獸醫反而幫到手呀?
我:「總之七點前嚟到就有醫生睇啦」
佢:「如果你想我早啲嚟嘅,一係你送枝防曬上嚟我度,我用晒啦」
你係咪俾太陽曬住個腦蒸發咗呀?咁都講得出嘅?
我:「小姐呢啲係你自己嘅問題~如果冇其他嘢嘅話,我收線㗎啦」
佢:「喂喂喂,咪住呀,你都冇問醫生」
我:「呢啲唔駛問醫生㗎啦,呢啲我哋真係唔會做㗎~」
佢:「有咩你係會做呀?喺電話入面同我講廢話呀?」
你都知自己講緊廢話嘅咩?突然之間良心發現呀?
我:「小姐,如果你係睇醫生嘅就直接七點前嚟就可以啦,其他嘢無謂拗啦」
佢:「你唔拎枝防曬嚟我點落嚟呀?我就住樓上咋喎」
我:「…樓上落嚟都應該唔會經過太多戶外地方,如果你連燈都怕嘅話,屋企都有㗎喎~」
佢靜咗陣,之後….『嘟』。

The user will never see this