【經一專欄】診所職場事 【寶豬趣聞】先試食後畀錢 |珍寶豬

【經一專欄】診所職場事 【寶豬趣聞】先試食後畀錢 |珍寶豬

經一專欄診所職場事】有日有位先生睇完醫生~
我出藥後同佢講:「呢度三百呀」
佢望住我:「我藥都未食喎?而家俾㗎咩?」
即係點呀?你夠薑咪而家即刻啪晒嗰幾日藥先俾錢囉~

撰文:珍寶豬

我:「吓?唔係而家俾嘅應該幾時俾呀?」
佢:「我以為好似食飯咁,食完先俾咋」
我:「我哋診所嚟㗎,有邊間診所係食完先收錢?」
佢低頭望望堆藥:「唔知喎,平時我唔駛俾錢㗎喎」
你而家係咪想睇霸王醫生先?
我:「嗯,我哋係要俾咗錢先可以拎藥走嘅」
佢:「哦?原來係咁㗎?我真係第一次聽,我以為食飯咁呀嘛」
咁你捨得俾錢未?
佢繼續低頭望住堆藥。
我:「先生,呢度三百呀」
佢:「呢度值三百㗎啦?」
又點呀~先係想唔俾錢,再嚟就想講價呀?
我:「其實我哋有寫明診金連藥收費係幾多喺度嘅~你頭先冇睇到張嘢咩?」
佢:「我好少用對眼嚟睇嘢」
咁你對眼用嚟食屎㗎?
我:「哦~」
佢:「我可唔可以試咗一次覺得有冇效先㗎?」
我:「先生真係唔好意思啦,我哋冇得咁樣試食㗎~我諗冇邊間診所可以咁做~或者你係咪有咩困難唔方便俾錢住?我可以俾你入返去同醫生講,再睇吓醫生幫唔幫到你嘅」
佢:「我係覺得咁樣唔係好啱數同唔公平啫,我都唔知啱唔啱食就要俾咗錢出嚟先,不過講明呀,我唔係窮㗎,我住呢區嘅樓王㗎!」
哦。咁俾錢啦樓王,咁多嗲~

The user will never see this