診所職場事 【寶豬趣聞】結咗婚嘅先生|珍寶豬|經一專欄

診所職場事 【寶豬趣聞】結咗婚嘅先生|珍寶豬|經一專欄

經一專欄診所職場事】有日一位先生等睇醫生時~不停喺度索鼻涕…

我諗住佢係冇紙巾,於是我同佢講:「先生,你要唔要紙巾呀?」

佢抬頭望住我:「紙巾?要嚟做咩呀?」

撰文:珍寶豬

俾你抆屎好不好?

我:「我見你啲鼻涕係咁索返入去…呻出嚟好啲啊」

佢抬頭擘大口得個窿:「你對我先係咁㗎?」

我:「吓?」

佢低頭:「我結咗婚㗎啦」

先生你真係好病喎。我俾張紙巾你呻鼻涕,唔係俾張紙巾你嚟打飛機喎~

我:「你結咗婚唔關我事㗎,我係想叫你唔好索返啲鼻涕入去啫」

佢:「唔係想Flirt我嘅又駛咩咁主動呀,我明嘅」

你明條蕉呀?你自戀成癮啊。

我冇出聲,廢事理佢。

佢見我唔出聲,過咗陣就同我講:「咁快放棄啦?」

我繼續唔出聲。

佢再講:「Flirt多兩次啦,我成日都咁俾人flirt㗎啦,男女都有,我都控制唔到。早幾日咋嘛,去買外賣都多兩啖飯」

點先知會多咗兩啖飯呀?嗰兩啖飯另上嗎?會唔會人哋見到你飯都嘔埋出嚟,跟手急急腳打包好個外賣叫你快啲扯呀?

我:「先生,你唔好誤會~我真係純粹俾紙巾你啫」

佢:「我慣㗎啦,係靚仔嘅」佢拎出電話疑似開咗前置鏡頭喺度撥頭髮。

嗯,醫生~你一陣方便嘅話轉介埋佢去眼科呀。

佢:「不過你呢啲唔係我鍾意嗰隻呀,我對阿姐冇興趣,不過我好welcome你對我好嘅,我慣㗎啦。」