診所職場事【寶豬趣聞】我要坐商務 ｜珍寶豬｜經一專欄

拎完藥俾緊錢時，佢問我：「呀，唔記得問醫生可唔可以寫信？」
我：「你要寫咩信呀？」
佢：「冇呀，我想問吓可唔可以寫封信方便我upgrade？」

撰文：珍寶豬｜圖片：電視截圖、unsplash

【診所職場事】「upgrade？咩嘢upgrade呀？」

我：「upgrade？咩嘢upgrade呀？」
佢：「我嚟緊會飛，不過我嗰時買嘅係econ位」
所以呢～你買經濟位就梗係坐返經濟啦。

我：「嗯，咁你記得依時食藥同多休息，祝你快啲好返」
佢：「其實我聽日飛㗎啦，我應該好唔切㗎啦」

【診所職場事】寫封信俾我upgrade我坐去商務

我：「哦？咁…唔舒服嘅搭飛機唔太好喎」
佢：「我知呀，所以我想問醫生可唔可以寫封信俾我upgrade我坐去商務之類呀？」
你個頭想俾我哋打到幾腫？

我：「我哋冇呢啲信出㗎～」
佢：「吓，但係我唔舒服喎，經濟位好多人好迫，醫生唔怕我傳染俾其他人咩？」
我以為你咋病咋，原來你真係唔舒服㗎？

【診所職場事】聽日我係拎AL㗎！

我：「如果怕傳染嘅，就最好唔好上機啦」
佢：「唔得！我book好晒㗎啦！假都拎埋，你見我都冇拎聽日病假㗎，聽日我係拎AL㗎！」
我：「咁希望你快啲好返啦，而家返屋企多休息啦」
佢：「或者你可唔可以嗌醫生照寫封信俾我呀？」
我：「我哋冇寫呢啲信㗎～」
佢：「證明我有病唔舒服呢？」
…你咁樣玩自己？

診所職場事・你照叫醫生寫俾我呀

我：「er…我哋有到診紙嘅，證明你今日嚟過睇醫生囉」
佢：「好呀好呀，俾張我呀，我聽日俾地勤睇再同佢講我因為唔舒服，所以要個位舒服啲嘅，咁咪ok囉，係咪呀？」
我：「唔舒服嘅有機會唔俾上機㗎喎…」
佢：「唔會嘅，你照叫醫生寫俾我呀，我會自己搞掂㗎啦」
到診紙到手後，小姐開心離開診所。

唔知佢成唔成功上機呢～