【經一專欄】診所職場事 【寶豬趣聞】牙齒當金使 ｜珍寶豬

佢望望啲藥問我：「係得咁多咋？」
我：「醫生係開呢啲俾你～」
佢：「阿醫生覺得我食完兩日藥就好返？」

撰文：珍寶豬｜圖片：電視截圖、unsplash

【診所職場事】「so far so good都要四日啦」

我：「或者小姐你想要幾多日藥呀？你可以直接話我知～因為我哋平時開都係開兩日藥先嘅」
佢：「so far so good都要四日啦」
我：「咁我俾四日藥你，藥費嗰度會加多一百蚊嘅」
佢：「你叫你經理部長是但一個出嚟」

【診所職場事】搵診所經理

又咩事要搵經理呀？你覺得診所邊度有個經理呀部長呀？喺枱底嗎？
我：「唔好意思小姐，請問咩事呢？我哋呢度冇經理嘅，你有咩事可以直接同我講」

佢：「點解我要俾多一百蚊？」
我：「因為你要多兩日藥嘛，前後要四日藥呀嘛？」

佢：「我唔係好明喎，我睇醫生唔係應該包醫好嘅咩？」
萬一不幸地你一世都唔好。我哋係咪要包你一世？
我：「食藥都係減輕你嘅病徵～最主要都係你休息多啲」
佢：「咁靠休息就得嘅，你收我錢做咩啫？我自己夠識休息啦」
我：「如果小姐你唔需要醫生寫俾你嘅病假紙而放假休息嘅…」
佢好大力啪一聲放低三百蚊，之後一副厭惡嘴臉：「妖！即係威脅我啫！」
說話又唔好咁講，大家係明白事理嘅人嘛～
我唔出聲。
佢：「如果我食完啲藥都唔好嘅話呢，我保證呀！我一定會拆咗你哋個招牌呀！我牙齒當金駛呀！」

我：「嗯」
小姐離開後N個月，醫生個招牌仍然屹立不倒，一係佢好返晒，一係佢甩晒棚金牙。