診所職場事 寶豬趣聞 年齡是女人的秘密 珍寶豬 經一專欄

診所職場事 【寶豬趣聞】年齡是女人的秘密 | 珍寶豬 | 經一專欄

職場

廣告

經一專欄診所職場事】有日有位小姐嚟到診所。

佢行埋嚟登記處:「我冇帶銀包有冇得睇呀?」
我:「未睇過係咪?如果你唔需要病假紙同收據嘅…你有帶錢就可以睇㗎啦~」
佢:「哦~得呀,我唔駛要假紙收據呀」

撰文:珍寶豬|圖片:電視截圖、unsplash

唔講出生年月日

我:「咁你可以喺紙上面寫低你嘅中英文名,出生年月日,身分證號碼,下次嚟嗰時補返身分證俾我對返啲資料就OK」
佢:「哦哦好呀」
佢拎起筆默默寫一輪,之後遞張紙俾我:「得啦姑娘」
我望望:「出生年月日呢?」
佢:「你估下?」
估你屎忽。
我:「麻煩你寫返俾我呀」

「總之冇四十二啦」

佢扭扭擰擰:「我諗唔寫都得嘅,我覺得幾歲都係咁睇啫,或者由你哋覺得我幾歲咪幾歲囉」
我望望佢:「四十二嗎?」
佢:「痴線!我邊有四十二歲呀?你係咪盲㗎?」
係呀,盲嘅喺度同你登記呀,驚唔驚喜呀?房入面嗰個老花添呀,一陣可能估你五十二呀。
我:「咁你出生年月日係咩呀?」
佢:「總之冇四十二啦」
我:「你唔講我就寫四十二落去㗎啦」
佢又扭:「你估多次啦」
估你屎忽。

「我後生女嚟㗎咋」

我塊面僵硬了:「小姐,我唔估呀,麻煩你直接話我知啦」
佢抿抿嘴拎起枝筆,我望望…『198X』…
我:「嗯,好啦,小姐我登記好㗎啦,你坐低等嗌名啦,下次俾返身分證明文件我得㗎啦」
佢:「做咩呀?你覺得我唔似得三十出頭咩?我後生女嚟㗎咋」
我唔出聲。
佢:「做咩唔出聲呀?吓?」
何必苦苦追問呢….