診所職場事 【寶豬趣聞】先生要隊人 ｜珍寶豬｜經一專欄

佢衝埋嚟登記處，『嘭』一聲趴喺枱面，抬頭同我講：「姑娘，我趕時間呀」
好呀，排隊呀。
我：「而家登記嘅排第十一個」

撰文：珍寶豬｜圖片：電視截圖、unsplash

又唔係我想打尖嘅

佢：「我趕住返工呀」
我：「唔好意思呀先生，我哋登記完都係要排要等㗎」
佢：「下個俾我即刻入去得唔得呀？」
候診大堂眾人嘅視線即刻熱熾地望住我…
我：「梗係唔得啦，個個都係咁登記咁排隊，你趕返工嘅就應該早啲嚟登記嘛，而唔係要我俾你打尖～」
佢：「咩打尖啫，講到咁難聽，又唔係我想打尖嘅」
咁唔通係我想俾你打尖呀？

「我真係趕時間㗎」

我：「如果你等嘅我就同你登記啦，第十一個，你預返兩個鐘左右啦」

佢：「你俾我下個即刻入去睇啦，我真係趕時間㗎，我唔趕時間我都唔出聲啦係咪先？」
我：「一係你自己問吓排你前面嘅人肯唔肯俾你睇先啦，你要問晒前面嗰十位～」
佢擰轉臉望望坐喺度嘅人，再擰返過嚟同我講：「喂，唔好啦，個個甩皮甩骨就死咁嘅樣，我點問得落呀，我唔做衰人㗎」
所以你覺得自己唔出聲就一定係好人？
我：「咁你要唔要登記？」
佢：「你俾我下個入啦」
我：「真係唔可以㗎～」
佢：「你唔俾我下個入，我隊你㗎」
好呀，嚟呀。隊呀，隊啦嘛，等你呀！
我唔出聲。

成功上咗一個位

佢：「我真係隊你㗎」
呢個時候，一位婆婆行埋嚟同我講：「姑娘呀，我俾佢隊啦」

阿婆，你很想要吧。你咁捨己為人自我犧牲，我點好意思呀？
婆婆同先生講：「後生仔，我俾你隊啦，我排第十㗎」
先生問我：「頭先係話我排第幾話？」
我：「十一，你成功上咗一個位」加油呀！
婆婆：「我俾你隊啦，你唔好嘈住姑娘啦」
先生：「阿婆你收皮啦，我唔睇啦！」
先生即刻離開診所。
婆婆問我：「佢講咩皮呀？」
我：「啊～佢話你好好人皮光肉滑呀～」
婆婆摸摸自己塊臉，笑住行返去坐。