診所職場事 寶豬趣聞 身分證上集 珍寶豬

診所職場事【寶豬趣聞】身分證上集 |珍寶豬

職場

廣告

【診所職場事】電話響起~

一位小姐都未等我講開場白,佢已經爆我:「我張身分證係咪喺你度呀?你留住我張身分證有咩企圖呀?你有冇搞錯呀?留住我張身分證做咩呀你?吓?」

撰文:珍寶豬

等我講返上晝嘅事先…
一位小姐嚟登記,我:「得㗎啦,你坐低等等啊,身分證俾返你先呀」
佢一手拎住電話,一手拎住身分證,行埋去坐低等睇醫生。
睇完醫生拎完藥離開診所,我望望出面嘅櫈,發現佢張身分證貼貼服服咁喺櫈面上。
於是我打俾佢:「喂?係咪乜小姐呀?」
佢:「唔駛呀」
嘟。佢技巧純熟地收咗我線。
我再打過去:「喂?你張身分證…」
我都未講完,又嘟咗我了。

咁我唯有等佢自己發現…

就係咁,佢就爆我:「留住我張身分證做咩呀你?吓?」
我:「乜小姐係咪?你張身分證漏咗喺度之後我有即刻打俾你㗎~」
佢:「幾時呀?咩時辰呀?WHEN呀?」
又唔駛咁激動嘅,就算你用三個問法,都只不過係問緊同一樣嘢啫,我都唔會答你三句。
我:「今日上晝十一點半,打咗兩次俾你」
佢:「我冇聽過你電話喎!而家幾點呀?三點八呀!你留住我張身分證咁耐去做咩呀?有咩不軌企圖呀?」
我份人冇咩創意動力㗎咋,人哋唔提吓我,我都唔願郁嘅。你突然提到不軌企圖就勾起晒我啲動力,我好想即刻去隔離影印舖叫佢放大你張身分證個樣,放大到4000%貼喺診所門口…『如發現此人,請與本診所職員聯絡』。

 

 

【診所職場事】有日一位婆婆等睇醫生期間拎咗一串佛珠出嚟,佢坐喺度口郁郁手郁郁。
坐喺佢對面嘅叔叔望咗婆婆一陣,再望望周圍嘅人笑兩笑。
叔叔對住婆婆講:「喂,阿婆,你喺度拜神呀?」
婆婆望住佢冇出聲。

撰文:珍寶豬
叔叔:「你噏咁耐噏緊咩呀?聽唔到有聲嘅?」
聽唔到嘈唔到你關你叉事咩~
婆婆當佢冇到,完全唔理佢。
叔叔繼續自己講:「哦~原來聾嘅,拜神都會病嘅原來」
同樣等睇醫生嘅姨姨出聲,同叔叔講:「出少句聲啦」
叔叔:「我見佢咁唔知佢係咪痴線㗎嘛」
姨姨揚揚手:「唔好再講啦」

叔叔:「怕咩啫,佢聾㗎嘛,都聽唔到我哋講嘢㗎啦。佢噏咗咁耐我都聽唔到有聲,可能啞嘅添呀」
叔叔自己講完自己笑,佢見到我望住佢,於是問我:「喂,姑娘,頭先呢個阿婆點登記㗎?佢係咪聾啞㗎下?」
關你叉事咩?你係咪撞邪呀?
我:「先生,你可唔可以靜少少,你咁大聲會騷擾到房入面嘅醫生睇症啊,唔該你啊」
婆婆繼續手郁郁口郁郁轉動佛珠。
叔叔狀甚興奮:「哈哈哈,個阿婆又嚟料啦又嚟料啦!呢啲十有九痴線㗎啦!拎住抽嘢係咁噏」
我覺得你似痴線多啲。
婆婆抬頭望叔叔:「我後生做太多唔光采嘅事,到現今都仲係咁,唸珠可以令我稍為放鬆」

叔叔企起身同我SAY個HI:「呀,姑娘,我轉頭返嚟呀,屋企好似冇閂燈」

做咩呀?人哋出聲你又淆底呀?你盞燈著到爆啦~

 

延伸閱讀:

診所職場事【寶豬趣聞】成為有錢人 下回

【診所職場事】有日有位小姐嚟到診所。

佢驚慌問:「姑娘,我俾薯片刮到呀點算呀?」

薯片割脈意粉吊頸啲朋友嚟啊~

我:「整親邊度呀?俾醫生睇吓啦~我同你登記呀」

佢:「好呀好呀」

撰文:珍寶豬

坐喺度等緊睇醫生嘅阿姨搭嗲:「熱氣啦肯定!駛咩睇醫生呀?」

喂!阿姨你唔好做架兩呀!你唔好幫醫生趕客呀!

小姐同姨姨講:「真係㗎?咁點好呀?」

我力挽:「小姐我同你登記先呀?俾醫生望望先好冇?」

姨姨:「唔駛睇醫生㗎啦,出去買枝涼茶飲就冇事㗎啦,再唔係去藥房買枝飛滋膏就得㗎啦,好小事咋嘛」

小姐行過去姨姨度,擘大口俾姨姨睇:「呢度喎」

姨姨:「咁黑睇唔到呀,有冇電筒呀?」

小姐擰轉頭同我講:「姑娘,電筒呀」

電你屎忽呀!放隻螢火蟲入去啦!

我:「我冇電筒呀」

姨姨:「咁黑我睇唔到㗎喎」

小姐:「呀!電話!電話有電筒」

小姐拎住電話照照自己口腔,姨姨探頭望望:「係啦,肯定係熱氣啦」

小姐安心:「咁我去買邊款涼茶呀?」

姨姨:「廿四啦,飲一枝包有效!」

小姐:「咁就好啦」

姨姨:「唔駛咁驚,少少嘢就睇醫生,多多錢都唔夠俾醫生賺啦,啲醫生好無良㗎,咩都叫你睇醫生㗎,少少嘢都話要睇醫生㗎」

小姐望望眼神死嘅我,一言不發咁離開咗診所。

 

嗱!今次唔係我趕客㗎!真係唔關我事㗎~

 

延伸閱讀:

診所職場事 【寶豬趣聞】 睇醫生唔俾錢