資深洗碗工話你知 5星級酒店嘅碗碟原來咁樣洗

社會熱話

廣告

年薪17萬但又包三餐嘅洗碗工好似幾好做?但有五星級酒店嘅資深洗碗工話你知,其實洗碗工一啲都唔易做架!

撰文:JOEY

通常餐廳都會分派三四個人去做洗碗部嘅工作。以某五星級酒店嘅法國餐廳為例,洗碗重地有一套超巨型嘅洗碗系統,通常由兩個較年長嘅資深洗碗工去操作,另外就有一個散工負責將啲碗碟分類同埋倒走剩低嘅廚餘。

有時有啲痴立立嘅廚餘例如薯蓉、慕絲、芝士蛋糕或者搽麵包用嘅牛油等等都幾惡搞,就要刮咗佢。不過有一點一直令人好好奇,就係客人用剩嘅牛油係會專門被分開放返係個保鮮盒度,至於之後呢啲牛油會去邊,就無人知了…..

不過,大隻嘅男人未必打得,女神向你笑都未必代表冧你,呢部超巨型嘅洗碗機都一樣,睇得但係又唔係好洗得。所以部機洗完嘅嘢,上至杯杯碗碗碟碟,下至餐具托都要搵人逐隻逐隻用滾水再抹過,一來為左抹走啲水漬,二來就係費事有啲仲未洗乾淨嘅碗碟係啲客面前出現。一間餐廳一個鐘頭消耗嘅碗碟餐具分分鐘都上百件,真係計苦哂師兄師姐(行內同事嘅稱呼)。

不過作為五星級酒店,當然連啲碗碟餐具都一絲不苟啲,西歐出產就基本啦,有啲貴起上黎就要資深嘅長工專門處理,莫講話打爛,你錯手放咗去啲普通碗碟度都隨時畀人罵到狗血淋頭!

根據報料嗰位資深員工話,佢做過嘅餐廳有一款每隻成本價逾5,000港元嘅碟,除左每隻碟都有塊絹布包住嚟放,仲專登設置咗一個專門嘅櫃嚟放,認真巴閉呀!

呢款碟每一隻嘅出入都要得到當值經理嘅許可,話唔定仲有用紙紀錄低添!而呢隻碟實在太昂貴,酒店下令要高度保護呢批碟,連化學劑都唔掂得,因此通常都係用黎襯托而唔會真係裝嘢食(名符其實,得個托字),亦因為咁呢款碟通常都唔會洗,只係簡單用熱水抹吓,除非久唔久有客人當係骨碟用黎裝餸頭餸尾…

大家應該都想問嘅係:打爛咗會點?基本上,平時啲法國碗碟你打爛咗都無人理你,總之自己執返手尾就得喇,但係如果你打爛咗呢隻五千碟… 日日由朝早六點chur到凌晨三點嘅經理就會將佢積埋積埋嘅怨氣一次過喺你身上爆發,保證你生不如死、死又不如生呀!你哋又想像吓,一隻5,000大元碟都已經咁認真,事頭婆屋企可能隻隻都貴過5,000嘅時候… 真係伴碟如伴虎呀!

伸延閱讀:
【英國王室洗碗工唔易做 一餐國宴要上2,000餐具】
http://www.edigest.hk/Vip/detail?id=3446

【洗碗之外 英國王室仲有四份筍工】
http://www.edigest.hk/Vip/detail?id=3467