診所職場事 【寶豬趣聞】前四後六 | 珍寶豬 | 經一專欄

撰文：珍寶豬｜圖片：電視截圖

同事嘆氣：「唔係又咁唔好彩呀？」
我：「睇嚟係啦，而家走又唔係，唔走又唔係，一係等吓先啦？」
『嘭嘭嘭嘭嘭嘭』持續幾分鐘後，靜了～門外嘅人應該已經放棄。
於是我哋出去開門走人，突然有個人喺我哋面前飛撲出嚟：「仲捉你唔到？」

我情不自禁爭啲嚇到失禁大嗌：「哇，我嘟你」
我撥開佢隻搭住我膊頭嘅手：「先生，你冇嘢呀？你咁樣撲出嚟嚇死人咩？」佢：「我頭先喺度拍咗好耐門啦！」
我：「我哋收咗工㗎啦，聽日再嚟啦」
佢：「我老婆生得啦」
我個樣似執媽嗎？

我：「你老婆生得要去醫院啦」
佢：「係呀，佢去咗醫院啦，而家等生咋嘛」
同事問：「咁你喺度做咩呀？」
佢：「我要準備做個好爸爸囉」
哦。
我哋唔理佢，繼續鎖門，繼續落閘。
佢頂住度閘：「喂，你哋聽唔到我講咩呀？」

我：「你要做好爸爸嘛，快啲去醫院啦咁」
佢：「我想嚟拎前四後六侍產假㗎」
後六我都大概明點解，咁前四係咩呢？你老婆都準備生啦喎，仲前四嚟做咩呀？
我：「呢啲唔係喺診所度拎㗎，你要向你公司拎㗎喎」
佢：「我梗係問咗公司先過嚟啦，佢叫我正正常常寫返張醫生證明我係需要放假就得啦喎」

你老闆呀，射個波埋嚟俾我哋？
我：「我哋醫生都唔會寫呢啲嘅，而且醫生都走咗啦收咗工啦，不如你聽日問真啲你老闆，如果你想陪老婆BB耐啲嘅，或者可以由你嘅大假方面諗…」
佢呢個時候電話響起『喂？吓？我而家即刻返嚟！』，佢跑走了～
同事問我：「你估佢聽日會唔會再嚟呀啦？」
我：「佢聽日嚟都冇所謂呀，聽日我放假嘛～又或者佢拎到大假陪老婆呢，如果香港男人有多幾日侍產假咪好囉～佢就唔駛打診所主意～不過佢前四後六又勁啲嘅。」