2016財經大笑料回顧

社會熱話

廣告

2016年財經界大放笑彈,小編為大家炮製一輯10大財經笑料回顧。香港人,笑吓啦。

1.細盤真細小小小

人類已經阻止唔到地產商起蚊型劏房!長實地產(01113)喺大埔嵐山的165呎「囚室」已經係「old news is so 唔識串」,最新終極私樓劏房係建築商俊和牽頭發展的新界屯門青棉徑2號單幢盤菁雋(TPlus),最細單位只得128呎。俊和地產發展董事仲話主打細單位係想幫助年青人上車,年青人需要的只係一間房,「就算皇帝都只係瞓張床」。

今年內推出的蚊型開放式單位仲有恒基地產(00012)何文田新盤項目「加多利軒」,最細單位實用面積161呎,同樣由恒地發展的北角尚譽,最細單位僅163呎,以及由MT Sisters Limited發展馬頭角AVA 55,最細單位只有166平方呎,黃子華1994年提過的100呎富豪,已經不知不覺出現了。

2. 梁特宣布不競逐連任 股市顯著上升

今年除咗樓市升到癲,全城矚目,仲有咩係牽動住每一個香港人呢?咪就係特首梁振英宣布來年特首換屆選舉將不爭取連任嗰日囉!消息一出,當日(9/12)個個facebook被洗版,就連股市更顯著做好。一直指受梁振英打壓的港視(01137),喺消息一出即勁升,一度飆55%,收報1.64元,飆高33%。

而特首跑馬仔最新情況,財爺曾俊華已經辭職,大有機會參選特首,財政司司長一職由財經事務及庫務局局長陳家強署任;政務司司長林鄭月娥亦表示「不能不重新考慮是否參選特首」喎!

3. 內地熔斷機制 實行4日「熔斷」自己

A股喺今年1月1日開始實施「熔斷機制」,短短4個股票交易日,4次觸及「熔斷機制」,導致2天要提早收盤,尤其是1月7日,股市開盤後僅30分鐘就收盤,創下有史以來最短的交易日。

熔斷機制原意係令市場降溫,點知場火愈救愈急,中國證監會更急著滅火,宣布由1月8日起暫停實施「熔斷機制」,成為一時佳話。

4. 內地商標官司 有贏有輸無路捉

正所謂「淘寶網沒假貨」,強國品牌當然係最強,連有110件歷史的New Balance及智能電話一哥Apple都要跪低!

New Balance喺內地被控侵權,「新百倫」呢個名係由New Barlun所有,所以要向New Barlun賠償9,800萬元人民幣,震驚全球74億人!New Balance之後上訴失敗,維持New Balance侵權原判,內地法院仲表示,New Balance的中文意譯應該係「新平衡」,但將一審的9,800萬元人民幣賠款改為500萬元人民幣。

另外,Apple出品的iPhone 6及iPhone 6 Plus,竟然被北京知識產權局裁定侵犯內地佰利公司旗下產品手機(100C)的外觀權利,更要停止Apple銷售兩款涉「侵權」手機。Apple當然不服上訴,最近更以違反程序、越權為由,怒告北京知識產權局,上演一幕審死官。

不過都唔係個個敗訴,NBA球星Michael Jordan(內地音譯:邁克爾‧喬丹)告內地體育用品商「喬丹體育」損害其姓名權一案,就出乎意料獲勝,糾纏了4年之後Jordan終獲「正名」。喬丹體育被判違反商標法,「喬丹」商標應予撤銷。

5. 亞視熄燈 最後一句:都應該要獨立

亞洲電視喺今年4月1日結束59年電視歲月,熄燈告別香港市民。亞視由2015年尾開始拖糧,捱到4月1日當晚11:59分正式結束。最抵死係熄機前臨終一幕,是前亞姐羅霖主持節目時的「遺言」:「都應該要獨立,特別是經濟獨立。」呢句俾網民瘋狂Cap圖,好似有深層次意義。

不過,近日亞視又有「白武士」出現,法庭批准協盛協豐(00707)的重組方案,亞視可避過清盤。現職協盛協豐執行董事、亞視前執董葉家寶接受訪問時表示,希望將亞視改裝成亞洲製作中心。死咗都可以翻生,亞視永恆,繼續唱「有著我,便撐著你,這亞視永不死」。

6. 黑天鵝效應新定義

今年好多黑天鵝,最黑係英國6月舉行的「脫歐」公投,正當大家都買「脫歐」不成,公投前各個股市穩步上升,結果嚟個大逆轉,以51.9%選民贊成脫離歐盟,僅48%贊成繼續留在歐盟,「脫歐派」贏咗!

公投結果一出,引發全球股市暴跌,不過跌勢只係持續一陣,歐洲及亞洲股市都開始反彈,恒生指數由6月23日的20,868點,跌至28日低見19,662點後又升過,至7月4日已經收復失地,之後一直係咁升,9月仲曾經升穿過24,000點,低位反彈逾4,000點。

另一隻黑天鵝係特朗普當選美國總統,之前大家一廂情願以為民主黨希拉莉穩操勝券,若然特朗普上場就好像會世界末日,股市必然大跌,豈料特朗當選後,市場突然憧憬他可以扭轉美國經濟困局,令美股屢創新高,道指更直逼20,000點。

以前所謂黑天鵝,是出現了市場難料的結果,令投資市場大跌。但今時今日,黑天鵝效應可能要改寫。

7. 《Pokemon GO》爆hit 任天堂股價先升後挫

要數今年最爆紅的手機遊戲,一定係《Pokemon GO》。《Pokemon GO》7月尾喺香港一上架,無論男女老幼、3歲定80歲都見喺條街度望住手機盲中中,或者一大班人晚晚喺公園跑來跑去,一齊大叫「有啟暴龍呀」、「貝貝龍呀」。

《Pokemon GO》推出之後,任天堂股價急增近70%。你以為任天堂最開心?錯喇!任天堂喺7月22日發表聲明,指出《Pokemon GO》是由 The Pokemon Company 及 Niantic 攜手推出的作品,任天堂實質上只有 The Pokemon Company的32%持有權,並表示《Pokemon GO》對佢哋財政影響有限。

當股民知道呢個真相後,任天堂股價即時嚟個大逆轉,聲明後首個股票交易日,跌幅足足有17%,單日市值蒸發7,080億日圓(約 517億港元),仲差啲跌至停板。

8. 地鐵2.0 何文田站起俾邊個用

今年港鐵有好多新線通車,除了有12月28日通車的南港島線外,觀塘線延也於10月23日正式通車,新加入黃埔及何文田站,黃埔居民當然高興啦,話晒等到頸都長,咁何文田居民呢?

依山而建的何文田站共有5個出口,當中A3出口鄰近豪宅天鑄,由站口步行至該豪宅不足1分鐘步程,梗係方便啦。住喺「附近」何文田邨同愛民邨嘅公屋居民就唔係咁講。因為由愛民邨附近愛民廣場步行至最近何文田站B2出口,步程超過15分鐘。依家天口凍咪當行路做運動,天時暑熱時,都咪話唔辛苦。

不過,更經典仲要數何文田站嘅「天梯」,皆因由山上出入口前往月台,足足要行562級樓梯。你問小編何文田站起俾邊個用?梗係俾做運動一族用啦。

9. 2016年施政報告 梁振英:一帶一路X40次

今年1月特首梁振英發表的2016年施政報告,驚喜唔多覺,最多咪係推幼稚園免費教育(其實又唔係全部都免學費)。不過,整份施政報告連同目錄「無限loop」超過40次「一帶一路」,就成為最大「亮點」,成為一時佳話。

「一帶一路」……「一帶一路」……「一帶一路」……「一帶一路」……收到喇,最多第日炒股,留意多啲「一帶一路」概念股啦!

10.概念新股升到癲

好多人都鍾意抽新股,貪佢無「蟹貨」升得快。無錯,今年真係有唔少新股升得好癲,尤其係佢。佢就係聯旺集團(08217),又叫「翠如BB股」。因為聯旺主席黃智果,就是明星「翠如BB」黃翠如個爸爸,「翠如BB」仲去埋上市儀式添。

講到聯旺就勁,4月配售上市,單單第一日股價已爆升超過14倍,之後仲愈升愈有。以依家股價計,足足升超過80倍,即係一手賬面成本僅僅2,600元,依家勁賺超過20萬元。不過,講明配售,這些機會不是屬於我的。

不過唔緊要,公開配售的癲升新股,仲有隻剛剛於11月底上市嘅膳源控股(01632),即係做越南河粉「越棧」果間。佢係公開發售(IPO),有買佢就真係幾「棧」。因為佢上市後連升7個交易日,如果你咁叻可以喺最高位17.5元放,咁就勁賺超過七倍,即係一手賺31,000元。不過,小編又無買,惟有等下次機會嚟啦再抽啦。

伸延閱讀:
【梁振英棄選港視曾升55% 特首概念股逐隻捉】
http://www.edigest.hk/Vip/detail?id=6863
【12.28通車 南港島線4站食買玩攻略】
http://www.edigest.hk/Vip/detail?id=6745
【6 個罐子理財法 有錢人的理財秘訣】
http://www.edigest.hk/Vip/detail?id=6640