【網民熱話】公屋仔發圍  喻港女「莫欺少年窮」

【網民熱話】公屋仔發圍 喻港女「莫欺少年窮」

喺香港做男仔難,做公屋仔更難。點解?因為港女要做公主,日日high tea出入高級餐廳,仲要餐餐由男朋友找數,唔搵返幾萬蚊一個月點養到個女朋友;就算個女朋友肯同你食麥記、同你捱窮,女方的家人都唔會認同,無一對父母想見到自己的掌上明珠變灰姑娘。

睇到呢度,喺新年願望大叫「想搵到女朋友」的港男係咪好沮喪?唔洗愁,總有勵志故事,可能下一個就係發生喺你身上。

最近網上討論區一篇以「做女人千萬唔好欺少年窮…」為題的文,引起網民熱烈回應。樓主形容自己係公屋仔,女朋友又叻又靚又有家底,以前拍拖只可以食平價餐廳,就連女朋友屋企都反對佢哋。

不過女朋友甘心陪佢捱,到今時今日樓主有能力做老闆,終於向女朋友求婚,可以帶佢去歐洲結婚,仲勸喻港女「莫欺少年窮」,唔好因為現在男朋友無錢就話佢無上進心要分手,只要肯畀時間同信心個男人,一定會有回報。

仲有另一個網民喺同一個貼文分享咗佢自己的成功例子,話喺佢一無所有的時候、畢業遇上金融海嘯搵唔到工,當時的女朋友唔只無嫌棄,仲一直鼓勵佢、支持佢,到今時今日女朋友變成老婆,男方有車有樓、事業有成,都仲係好愛老婆,更話完全無諗過背叛佢。

呢個「青蛙變王子」的故事,係咪睇到熱血沸騰?有網民留言稱讚樓主苦盡甘來,恭喜樓主搵到個好老婆、祝願白頭到老;亦有網民大嘆樓主FF,直言港女本性難移,始終都係會睇眼前利益。



亦有網民形容劇情十足粵語長片,咁又無錯,以前只要肯努力,日捱晚捱都可以搵到好多錢,但現在年輕人向上流動機會少,人工又唔加,除咗父幹或者做金融行業,都好少機會發到圍做王子。