做銀行嘅女仔娶得過!

社會熱話

廣告

臨近情人節,受不少姊妹所託,要喺節日前清倉,特意刊登以下促銷銀行女職員廣告一則:

點解做銀行嘅女仔娶得過?睇過~

1. 見慣世面

每日打開門做生意,咩有錢人傻人名人未見過?分分鐘仲試過比人打劫!見慣大場面,大茶飯未必食過,但絕對handle到大風浪,帶出去都唔慌失禮你。

2. 盡享銀行福利

銀行女職員薪未必高,糧應該準,至少亦可以幫補下家計——小至新年唱到新銀紙、屋企永遠有一堆利是封,大至享受銀行按揭優惠。按揭利率係就係得一厘,同街外比唔著數得幾多,但如果生活喺加息嘅年代,講緊廿幾厘嗰啲,都咪話唔吸引。

3. 理財有道

識得幫人理財,自己唔會差得去邊。如果你唔認同 ,Ok,但至少,唔洗擔心佢走入分行會被人氹/夾買咗啲唔知咩返屋企,相信會嘔少好多血。唔洗為佢日夜擔驚受怕,人都長壽啲。

4. 精打細算

有咩著數優惠,產品分析比較,短短幾分鐘就諗到,唔係講笑,每日要應對千奇百怪問題,個腦隨時轉得快過部電腦!你話,咁醒目,樣樣計過度過,點會唔持家有道?

5. EQ極高

做得耐,已經練就一套「皮笑肉不笑」功夫,就算幾憎個客,都要死忍爛忍,保持良好態度,真係少啲EQ都唔掂。有個咁嘅另一半,唔單止交都嘈少啲,忍足你一世都得!

6. 識得氹人

Sell客靠把嘴,講嘢一定掂。仲有,有名你叫「Relationship Manager」,你估浪得虛名㗎!所以,絕對有能力同你屋企人保持良好關係,起碼表面上係!所謂「家和萬事興」,一個家和唔和,就要睇老婆!

7. 抗壓力極高

每日閒閒地早午晚比老闆捽幾十次數,仲未死得,都咪話生命力唔強,分分鐘強過小強!咁代表咩?易養囉!就算第時touch wood屋企有咩變故,佢一樣承受到壓力,你癲佢都未癲,都咪話唔堅!

8. 一定係靚女 =p

明白嘅,男人娶妻求咩?最重要…外表一定係上品!啲人成日話銀行女職員靠美色呃客,唔靚都唔會有咁嘅謠傳啦!你話空姐靚定銀行女職員靚?肯肯定係後者,因為我身邊大把人有空姐唔做,走去做銀行。仲有,你幾時有見過唔靚嘅銀行女職員?你講啊!夠膽就留言!

文章授權:
90後銀行小妹甩轆記

http://www.facebook.com/banker.bellawan/

延伸閱讀:
【港女擇偶條件 原來住公屋勝私樓】
http://www.edigest.hk/Vip/detail?id=5675
【月入$25,000 有資格娶日本老婆】
http://www.edigest.hk/Vip/detail?id=3409
【財金靚女 輪界最多】
http://www.edigest.hk/Vip/detail?id=2962