我係住屯門嘅90後 唔係次等鄉下仔

我係住屯門嘅90後 唔係次等鄉下仔

係呀!我係住屯門呀!我係讀唔到大學呀!連副學士都冇資格讀添!讀唔成書咪出嚟打工囉,送外賣、企7仔、賣手機我都做過,雖然唔係咩高尚職業,但至少靠雙手搵食,你哋做乜一個二個要標籤我哋先?係咪住屯門就要打靶先?唔通我殺左你全家?

我地都有阿媽阿爸生架,住得遠已經夠慘啦,日日晨雞咁早爬起身返工返學,冬天跌到得兩、三度要起身果種滋味先至係慘,塞車迫車已經成為我哋屯門人生活習慣之一,仲要成日比你哋班 X 街笑我哋係「鄉下仔」。

家陣仲要話我地住屯門嘅 90 後係「次等」。我見到有人數我哋住屯門嘅人係「與世隔絕,社會冷感,基層,鄉村中學,生活單調,眼界陜窄,物質要求低,求穩不上進。」我個心真係好灰好灰,唔通住屯門,就真係一世要俾人睇死?

我再講多次,雖然我唔係叻到曉飛、月賺十皮八皮嘅乜師物師,但我至少真係靠自己雙手搵食,每個月搵得八千,我俾左五千阿媽做家用,閒時仲會買嘢比啲細佬妹。

我承認區內係有啲唔生性嘅死衰仔,但家陣係咪全香港得屯門有壞人先?唔通你哋住果區就個個都係博學多才、年青有為、眼光闊大、積極上進、聰慧過人、高人一等?就當你真係咁出色,用啲有色眼光去睇人,你已經相當冇品。