做到成個顛婆咁 但我又好Enjoy

社會熱話

廣告

做幼稚園老師唔好以為係好輕鬆,我唔敢講幼稚園老師係咪最辛苦嘅老師,不過我敢講做得幼稚園老師真係要有三頭六臂,同好高嘅抗壓能力。

由小朋友入校門果刻,到佢哋放學,佢哋嘅一舉一動都關我事。有啲人成日都以為做幼稚園老師淨係教ABC,係ABC之外仲要帶住小朋友唱下歌、跳下舞、食茶點、去廁所,但係小朋友嘅活力就係一下都唔可以停低,同一時間成個班房可以有好多事發生:瀨尿、打交、跑來跑去、咬人、跌親,要逐樣逐樣處理,真係少啲心血都唔得。

有時上堂都要玩啲大型玩具、波波等,最怕就係小朋友唔小心整親,因為一整親,啲家長就會不停問長問短、又話要投訴之類。我唔係無睇實,小朋友整親我都好心痛,但一班30幾人,一個老師要睇曬咁多個,都會有難處。好在有時都會遇到好體諒我哋嘅家長,講句叫個小朋友下次記住小心啲就安心畀佢繼續玩。

都係嗰句,一班30幾人,佢哋一人一句其實好大聲,要佢咃聽到我講野,就要同佢哋鬥大聲。但佢哋就算聽到都唔一定會跟住指示做,所以喺適當嘅時候都要對啲小朋友惡啲,唔可以畀佢哋蝦返轉頭。日日放工聲都沙埋、嗌破喉嚨,返屋企飲杯蜜糖水,明天又係一條好漢。

其他人返Office都有1個鐘食飯時間,做幼稚園老師有10分鐘食飯時間已經好好,食2啖又要去望下啲小朋友,拿拿淋食完仲有好多野要做。做幼稚園老師好似坐監咁,返咗工就無得撳電話,每次放工望到電話有幾十個missed call幾百個訊息,好似與世隔絕咗一個世紀咁,真係好無奈。有啲學校好啲,畀老師喺食飯個陣撳下,未至於全日都無得用,不過都只可以快睇快覆。

食完飯仲要氹佢哋瞓覺,有啲小朋友好快瞓著,我梗係想佢哋快啲瞓著,我就有多啲時間做野,不過都明白總有啲比較難瞓著。做老師嘅都要出盡法寶盡力氹到佢哋每個都瞓到晏覺,就算真係瞓唔著,都望佢哋乖乖地瞓低唔好騷擾其他同學仔。

諗秋季旅行又係一個「煩」字,小朋友有得圍埋一齊玩,去邊佢哋有咩所謂,但係啲家長就多多意見喇!揀近啲嘅地方又話去過、無新意;揀遠啲嘅地方要收返車錢食物錢又話貴、邊洗咁多錢,真係好難服侍。其實揀完地方我哋仲要去考察架,無咁多時間為咗個目的地揀來揀去。

到最後仲有一場硬仗,就係畢業典禮。畢業禮當日用「打仗」嚟形容完全無講錯,坐喺出面欣賞表演嘅家長係唔會知道後台有幾亂。一大堆化妝品攤晒出嚟,幾十件一模一樣嘅珠片衫,要用摩打手幫每個小朋友化妝、著好表演嘅衫,仲要確保無人走失,成個癲婆咁叫佢哋排好一條線。不過最後見到佢哋開開心心表演完,正正係嗰種滿足感驅使我繼續努力做好幼稚園老師呢份工。

延伸閱讀:
【7個好同事會做的窩心行為 問你點捨得走】
http://www.edigest.hk/Vip/detail?id=8512
【帶埋阿媽去見工? 千其百怪面試實錄】
http://www.edigest.hk/Vip/detail?id=8495
【咪打死一份工 教精你搵工5大秘笈】
http://www.edigest.hk/Vip/detail?id=8492